ଦ୍ୱାଦଶ ଶ୍ରେଣୀରେ ଓଡ଼ିଶା ଆଦର୍ଶ ବିଦ୍ୟାଳୟର ସଫଳତା

ପୋଲସରା, (ଅନୀଲ କୁମାର ମହାରଣା) : ହାତୀଓଟ ଗ୍ରାମରେ ସ୍ଥାପିତ ଓଡ଼ିଶା ଆଦର୍ଶ ବିଦ୍ୟାଳୟ (ଓଏଭି) ସମ୍ପ୍ରତି ଘୋଷିତ ଦ୍ୱାଦଶ ଶ୍ରେଣୀ ସିବିଏସଇ ବୋର୍ଡ ପରୀକ୍ଷାରେ ଉତ୍ତମ ପ୍ରଦର୍ଶନ କରିପାରିଛି। ବିଦ୍ୟାଳୟର ପାସ୍ ହାର ୮୮.୮୯% ହୋଇଥିବା ବେଳେ ପରୀକ୍ଷା ଦେଇଥିବା ୬୩ ଜଣ ଛାତ୍ରଛାତ୍ରୀଙ୍କ ମଧ୍ୟରୁ ୫୬ ଜଣ ପରୀକ୍ଷାର୍ଥୀ ସିବିଏସଇ ବୋର୍ଡରେ ସଫଳତାର ସହ ଉତ୍ତୀର୍ଣ୍ଣ ହୋଇଛନ୍ତି। ଝିଅ ପିଲାମାନେ ଭଲ ସଫଳତା ପାଇଛନ୍ତି। ଉତ୍ତୀର୍ଣ୍ଣ ହୋଇଥିବା ୫୬ ଜଣଙ୍କ ମଧ୍ୟରୁ ୩୧ ଜଣ ଝିଅ ପାସ କରିଥିବା ବେଳେ ୨୫ ଜଣ ପୁଅ ପାସ୍ କରିଛନ୍ତି। ସାସ୍ୱତୀ ସାହୁ ଏବଂ ସୋମବ୍ରତ ପଣ୍ଡା ଉଭୟେ ୯୦.୨୦ % ମାର୍କ ରଖି ଅନୁଷ୍ଠାନର ଯୁଗ୍ମ ଟପର ହୋଇଛନ୍ତି।  ୯ ଜଣ ଛାତ୍ରଛାତ୍ରୀ ୮୦% ରୁ ୯୦% ବର୍ଗ ମଧ୍ୟରେ ଉଚ୍ଚସ୍ତରୀୟ ମାର୍କ ରଖିବାରେ ସଫଳ ହୋଇଥିବା ବେଳେ ୧୨ ଜଣ ଛାତ୍ରଛାତ୍ରୀ ୭୫% ରୁ ୮୦% ମଧ୍ୟରେ ମାର୍କ ପାଇ ଉଚ୍ଚ ଶିକ୍ଷାଗତ ମାନଦଣ୍ଡ ବଜାୟ ରଖିଛନ୍ତି। ଏହି ସଫଳତା ସ୍କୁଲର ଗଭୀର ପ୍ରତିଭାକୁ ପ୍ରଦର୍ଶନ କରିବାରେ ସଫଳ ହୋଇପାରିଛି। ହାତୀଓଟ ଓଏଭି ର ପ୍ରିନ୍ସିପାଲ୍ ଉର୍ମିଳା ସାହୁ ଏହି ଫଳାଫଳ ପାଇଁ ଅତ୍ୟନ୍ତ ଗର୍ବ ପ୍ରକାଶ କରିବା ସହ ଛାତ୍ରଛାତ୍ରୀ ଏବଂ ଶିକ୍ଷକ/ଶିକ୍ଷୟିତ୍ରୀ ଉଭୟଙ୍କ ଆନ୍ତରିକ ଉଦ୍ୟମ ଯୋଗୁଁ ଏହି ଉଚ୍ଚ ସଫଳତା ହୋଇ ପାରିଛି ବୋଲି ପ୍ରକାଶ କରିଛନ୍ତି। ସେ କୃତିତ୍ୱ ହାସଲ କରିଥିବା ଛାତ୍ରଛାତ୍ରୀଙ୍କୁ ଅଭିନନ୍ଦନ ଜଣାଇବା ସହିତ ସେମାନଙ୍କର ଉଜ୍ଜ୍ୱଳ ଭବିଷ୍ୟତ କାମନା କରିଛନ୍ତି। ଅଭିଭାବକ ଏବଂ ସ୍ଥାନୀୟ ଜନସାଧାରଣ, ଏହି ଅଞ୍ଚଳ ପାଇଁ ଗୌରବ ଆଣିଥିବାରୁ ସ୍କୁଲର ପ୍ରଶାସନକୁ ପ୍ରଶଂସା କରିଛନ୍ତି।