ସରକାରୀ ସ୍କୁଲର ଲଜ୍ଜାଜନକ ଚିତ୍ର: ଶାଳଣିଆଁ ହାଇସ୍କୁଲରେ ୪୫ ଛାତ୍ରୀଛାତ୍ରଙ୍କ ପାଇଁ ଜଣେ ଶିକ୍ଷକ

ହାଟଡିହି, (ଓ୍ବାଇଏନଏସ): ସରକାର କହୁଛନ୍ତି “୫ଟି ସ୍କୁଲ, ସ୍ମାର୍ଟ ସ୍କୁଲ”। ସମସ୍ତଙ୍କୁ ଶିକ୍ଷା, ଉତ୍ତମ ଶିକ୍ଷା l  ଶିକ୍ଷା ସମସ୍ତଙ୍କର ମୌଳିକ ଅଧିକାର l କିନ୍ତୁ ସରକାରୀ ଦାବିର ଧଜିଆ ଉଡିଯିବ। ଏଠି ସ୍କୁଲ ଅଛି, ପିଲା ଅଛନ୍ତି, ବିଲଡିଂ ଅଛି, ହେଲେ ପଢାଇବାକୁ ଶିକ୍ଷକ ନାହାଁନ୍ତି l କେନ୍ଦୁଝର ଜିଲ୍ଲା ହାଟଡିହି ବ୍ଲକର ଶାଳଣିଆଁ ହାଇସ୍କୁଲର ଚିତ୍ର ବଡ଼ ବିଚିତ୍ର l ଏଠି ସ୍କୁଲ ଅଛି l କିନ୍ତୁ ଶିକ୍ଷାଦାନର ଲଜ୍ୟାଜନକ ଚିତ୍ର ଅତି ଗୁରୁତର ଏବଂ ପରିତାପର ବିଷୟ ସାଜିଛି l  ୧୯୮୪ ମସିହାରେ ସ୍ଥାପିତ ଏହି ହାଇସ୍କୁଲ ୪୩ ବର୍ଷରେ ପଦାର୍ପଣ କରିଛି l ଏଠି ନବମ ଶ୍ରେଣୀରେ ୨୪ ଜଣ, ଦଶମ ରେ ୨୧ ଜଣ ମୋଟ ୪୫ ଜଣ ଛାତ୍ରୀଛାତ୍ର ପଢୁଛନ୍ତି । ସେମାନଙ୍କୁ ପାଠ ପଢାଇବାକୁ ସରକାର ଦେଇଥିଲେ ଜଣେ ଶିକ୍ଷୟିତ୍ରୀ ଏବଂ ଜଣେ ଶିକ୍ଷକ l ମାତ୍ର ୨ ଜଣ ଶିକ୍ଷାଦାନ କରନ୍ତି l ସେଥିରୁ ଜଣେ ଶିକ୍ଷୟିତ୍ରୀ ଗତ ଜୁନ ମାସରୁ ମାଟ୍ରୋନିଆଲ ଛୁଟିରେ ଅଛନ୍ତି l ଫଳରେ ଆଜକୁ ୩ ମାସ ହେବ ପୁରା ହାଇସ୍କୁଲ ପାଇଁ ଅଛନ୍ତି ମାତ୍ର ଜଣେ ଶିକ୍ଷକ l ସେ କେବଳ ଓଡିଆ(ସାହିତ୍ୟ)ବିଷୟ ପଢ଼ାନ୍ତି l ଏଥିସହ ପ୍ରଧାନ ଶିକ୍ଷକ ଦାୟିତ୍ୱରେ ମଧ୍ୟ ଅଛନ୍ତି l ତେବେ ଏପରି ସ୍ଥଳେ ଗଣିତ,ଇଂରାଜୀ, ସଂସ୍କୃତ, ହିନ୍ଦୀ,ସାଧାରଣ ବିଜ୍ଞାନ, ସମାଜିକ ବିଜ୍ଞାନ ପଢାଇବାକୁ ଶିକ୍ଷକ ନାହାଁନ୍ତି l ଏପରିକି କିରାଣୀ ମଧ୍ୟ ନାହାଁନ୍ତି l ୭ଟା ବିଷୟ କୁ ଜଣେ ଶିକ୍ଷକ ଯାହାକି ଶିକ୍ଷା ବ୍ୟବସ୍ଥା ଉପରେ ପ୍ରଶ୍ନ ଉଠାଇଛି l ଏଠି ପାଠ ନୁହେଁ, ପ୍ରହସନ ଚାଲିଥିବା କୁହାଯାଉଛି l କିରାଣୀ କର୍ମଚାରୀ କେହି ନଥିବାରୁ ଶିକ୍ଷକ ଜଣକ ପାଠ ପଢାଇବେ ନା ହାଜିରା ଖାତା ସମ୍ଭାଳିବେ ନା ସ୍କୁଲର କାଗଜପତ୍ର ଦେଖିବେ ତାହା ବୁଝି ହେଉନି lସ୍କୁଲର ଆଗ ପଟେ ପାଚେରୀ ଅଛି, କିନ୍ତୁ ପଛ ପଟେ ନାହିଁ l ଫଳରେ ଦିନରାତି ଗୋରୁ, ଗାଈ, ଛେଳି, କୁକୁର ସ୍କୁଲ ପରିସରରେ ପଶି ମଳମୂତ୍ର କରୁଛନ୍ତି। ପିଲାମାନେ ଯେଉଁଠି ବସି ପାଠ ପଢିବେ, ସେଠି ଗୋବର l ବଡ଼ କଥା ହେଉଛି ଏହି ସ୍କୁଲରେ ଖେଳ ଶିକ୍ଷକ ମଧ୍ୟ ନାହାଁନ୍ତି l  ହାଇସ୍କୁଲର ପରିଚାଳନା କମିଟି ସଭାପତି କୈଳାସ କୁଅଁର କହିଛନ୍ତି କେବଳ ଓଡ଼ିଆ ବିଷୟର ଶିକ୍ଷକ ଅଛନ୍ତି l ଅନ୍ୟ ବିଷୟ ସବୁ କିଏ ପଢାଇବେ l ଛାତ୍ରୀଛାତ୍ର ପାଠ ପଢି ଜ୍ଞାନ ଆହୋରଣ କରିବେ ନା ମୂର୍ଖ ହୋଇ ଭବିଷ୍ୟତ ନଷ୍ଟ କରିବେ l ଆଗକୁ ଦଶମ ପରୀକ୍ଷା ଅଛି l ପିଲା କଣ ପଢି ପରୀକ୍ଷା ଦେବେ l ପିଲାଙ୍କ ଭବିଷ୍ୟତ କିଏ ଦେଖିବ l ଏଠି ଶିକ୍ଷାର ଶବ ଦାହ କରାଯାଉଛି l ଆର.ଟି.ଆଇ. ଆଇନ ଏଠି ଫେଲ ମାରିଛି l ଜୁନରୁ ଶିକ୍ଷୟିତ୍ରୀ ଛୁଟିରେ, କିନ୍ତୁ ୩ ମାସ ହେଲା ବିକଳ୍ପ ଶିକ୍ଷକ ଦିଆଗଲା ନାହିଁ କି ଅନ୍ୟ ବିଷୟର ଶିକ୍ଷକ ନିଯୁକ୍ତି ହେଲାନି l ସରକାର କିମ୍ବା ଜିଲା ଶିକ୍ଷା ଅଧିକାରୀ ଏବଂ ଜିଲା ପ୍ରଶାସନ ଏଥି ପ୍ରତି ଦୃଷ୍ଟି ଦେଉ ନାହାଁନ୍ତି l ୪୫ ଜଣ ପିଲାଙ୍କ ଭବିଷ୍ୟତ ଚୁଲିକି ଗଲା ପରେ କଣ ସରକାରଙ୍କ ନିଦ ଭାଙ୍ଗିବ ବୋଲି ଅଭିଭାବକ ମାନେ ପ୍ରଶ୍ନ କରିଛନ୍ତି। l ପ୍ରଧାନ ଶିକ୍ଷକ ଗୌତମ ଧୁରୁଆ କହିଛନ୍ତି ଯେ ମୁଁ ଓଡ଼ିଆ ବିଷୟର ଶିକ୍ଷକ ଅଟେ l ଆଉ ଅନ୍ୟ କୌଣସି ବିଷୟରେ ଏବଂ ଖେଳ ଶିକ୍ଷକ ନାହାଁନ୍ତି ଏବଂ କିରାଣୀ ମଧ୍ୟ ନାହାଁନ୍ତି l ସ୍କୁଲ ପଛ ପଟ ପାଚେରୀ ନାହିଁ l ଗାଈ, ଗୋରୁ ପଶି ଆସୁଥିବାରୁ ସମସ୍ୟା ସୃଷ୍ଟି ହେଉଛି l  ଏକୁଟିଆ ଯେତିକି ପାରୁଛି ସବୁ ବିଷୟରୁ ଟିକେ ଟିକେ ପଢାଉଛି l ପାଠ ପଢାଇବା , କିରାଣୀ କାମ କରିବା ଏବଂ ସ୍କୁଲ ଦାୟିତ୍ୱ ବୁଝିବା ମୁସ୍କିଲ ହେଉଛି l ସ୍କୁଲକୁ ଲାଗି ପଛ ପଟରେ ଥିବା ଖାଲରେ ପାଣି ଜମିକି ରହୁଛି l ବିଭିନ୍ନ ଅବ୍ୟବସ୍ଥା ନେଇ ଉପରିସ୍ଥ ଅଧିକାରୀଙ୍କୁ ଜଣାଇଛୁ l ଏପର୍ଯ୍ୟନ୍ତ କୌଣସି ସୁବ୍ୟବସ୍ଥା ହୋଇନି l ଅଭିଭାବକ  ସଞ୍ଜୟ ନାୟକ, ଦିବାକର ବାରିକ, ଶରତ ବେହେରା, ବନମାଳୀ ଜେନା, ପ୍ରତିମା କୁଅଁର କହିଛନ୍ତି ଯେ ମାଗଣା ପାଠ ପଢାଇବୁ ବୋଲି ସରକାରୀ ସ୍କୁଲ ରେ ପିଲା ଦେଲୁ । ଏଠିତ  ଶିକ୍ଷକ ହିଁ  ନାହାନ୍ତି। ଘରୋଇ ସ୍କୁଲରେ ପଢାଇବାକୁ ଆମ ଔକାତ ନାହିଁ। ଏହା ଗରିବ ପିଲାଙ୍କ ପ୍ରତି ଅନ୍ୟାୟ ଅଟେ l ଜିଲା ଶିକ୍ଷାଧିକାରୀ ପୂର୍ଣ୍ଣଚନ୍ଦ୍ର ବରିହାଙ୍କୁ ପଚାରିବାରେ ସେ କହିଛନ୍ତି ଯେ ଏହା ଏକ ଅନୁଦାନପ୍ରାପ୍ତ ବିଦ୍ୟାଳୟ ହୋଇଥିବାରୁ ସରକାରଙ୍କ ନୂତନ ଶିକ୍ଷକ ନିଯୁକ୍ତିର ବ୍ୟବସ୍ଥା ନାହିଁ, ଅତିଥି ଶିକ୍ଷକ ନିଯୁକ୍ତି କରାଯାଇ ଶିକ୍ଷାଦାନର ସୁ ବ୍ୟବସ୍ଥା କରାଯିବ ବୋଲି କହିଛନ୍ତି।