ବ୍ଳକସ୍ତରୀୟ “କୌଶଳୀ” ତାଲିମ୍ ଶିବିର
ଆସିକା (ୱାଇଏନ୍ଏସ୍) : ରାଜ୍ୟ ସରକାରଙ୍କ ବିଦ୍ୟାଳୟ ଓ ଗଣଶିକ୍ଷା ବିଭାଗ ଏବଂ ଜିଲ୍ଲା ଶିକ୍ଷାବିଭାଗର ପରାମର୍ଶ ସାଙ୍ଗକୁ ଆସିକା ଗୋଷ୍ଠୀ ଶିକ୍ଷାଧିକାରୀ କାର୍ଯ୍ୟାଳୟର ପ୍ରତ୍ୟେକ୍ଷ ତତ୍ତ୍ୱାବଧାନରେ ଶନିବାର ସ୍ଥାନୀୟ ସରକାରୀ ଟେକନିକାଲ୍ ହାଇସ୍କୁଲ ପରିସରରେ ସରକାରୀ ଓ ସରକାରୀ ଅନୁଦାନପ୍ରାପ୍ତ ମାଧ୍ୟମିକ ବିଦ୍ୟାଳୟର ବିଜ୍ଞାନ (ପିସିଏମ୍) ଶିକ୍ଷକମାନଙ୍କୁ ନେଇ ବ୍ଳକସ୍ତରୀୟ ଏକ ଦିବସୀୟ କୌଶଳୀ ତାଲିମ୍ ଶିବିର ଅନୁଷ୍ଠିତ ହୋଇଯାଇଛି । ଆସିକା ଗୋଷ୍ଠୀ ଶିକ୍ଷାଧିକାରୀ ମୁନ୍ରାଣୀ ମହାନ୍ତି ଓ ସହକାରୀ ଗୋଷ୍ଠୀ ଶିକ୍ଷାଧିକାରୀ ବିଭୁନନ୍ଦନ ପଣ୍ଡା, ଭଂଜ ବେହେରା, ଶିବରାମ ବେହେରାଙ୍କ ପ୍ରତ୍ୟେକ୍ଷ ତତ୍ତ୍ୱାବଧାନରେ ଅନୁଷ୍ଠିତ ହୋଇଥିବା ଏହି ବ୍ଳକସ୍ତରୀୟ କୌଶଳୀ ତାଲିମ୍ ଶିବିରକୁ ସରକାରୀ ଟେକନିକାଲ୍ ହାଇସ୍କୁଲର ଭାରପ୍ରାପ୍ତ ପ୍ରଧାନଶିକ୍ଷୟିତ୍ରୀ ପ୍ରଜ୍ଞା ପରମିତା ପଣ୍ଡା ଓ ଗୁଣ୍ଠପଡା ସ୍ଥିତ ଜଗଦଳପୁର ହାଇସ୍କୁଲର ପ୍ରଧାନଶିକ୍ଷକ ନାରାୟଣ ମହାପାତ୍ର ଆନୁଷ୍ଠାନିକ ଭାବେ ଉଦ୍ଘାଟନ କରି ରାଜ୍ୟ ସରକାରଙ୍କ ଦ୍ୱାରା ପ୍ରଦତ୍ତ ପାଠ୍ୟଖସଡା ଅନୁଯାୟୀ ଆକାଂକ୍ଷା ଉପାଦାନରେ ସାହିତ୍ୟ ସୃଜନୀ, କୌଶଳୀ, ଜିଜ୍ଞାସା ଓ କ୍ରୀଡାଙ୍ଗନାକୁ ଯୋଗ କରାଯାଇଥିଲା ବେଳେ ଏହି କୌଶଳୀ ତାଲିମ୍ ଶିବିର ମାଧ୍ୟମରେ ଶିକ୍ଷକ ଓ ଛାତ୍ରଛାତ୍ରୀମାନେ ସୂଚନା ଓ ପ୍ରଯୁକ୍ତି ବିଦ୍ୟା ଏବଂ କୋଡିଂ ବିଷୟରେ ଜ୍ଞାନ ଆହରଣ କରିବାରେ ସକ୍ଷମ ହୋଇପାରିବେ ବୋଲି ମତବ୍ୟକ୍ତ କରିଥିଲେ । ଆସିକା ଶିକ୍ଷାବିଭାଗ ପକ୍ଷରୁ ଆୟୋଜିତ ଏହି ବ୍ଳକସ୍ତରୀୟ କୌଶଳୀ ତାଲିମ୍ ଶିବିରରେ ମାଷ୍ଟର ଟ୍ରେନର୍ ରୂପେ ଆସିକା ସରକାରୀ ଟେକନିକାଲ୍ ହାଇସ୍କୁଲର ସହକାରୀ ଶିକ୍ଷକ ଦେବାଶିଷ ପାଣିଗ୍ରାହୀ ଓ ଧରାକୋଟ ଶ୍ରୀରାଜ୍ ହାଇସ୍କୁଲର ସହକାରୀ ଶିକ୍ଷକ ସୁନିଲ୍ କୁମାର ସାହୁ ଯୋଗଦେଇ ପ୍ରଶିକ୍ଷାର୍ଥୀମାନଙ୍କୁ ଇଣ୍ଟରନେଟ୍କୁ ସଠିକ୍ ଭାବେ ବ୍ୟବହାର ନକଲେ କେତେକ ସମୟରେ ସୃଷ୍ଟି ହେଉଥିବା ବ୍ୟବହାରର ଭୟାବହ ପରିସ୍ଥିତିରୁ କିପରି ଦୂରେଇ ରହିବା କମ୍ପ୍ୟୁଟର୍ କୋଡିଂ, ସ୍କ୍ରାଚ୍ ପ୍ରୋଗ୍ରାମ୍, ଗେମ୍ ଡିଜାଇନ୍ ସମେତ ବିଭିନ୍ନ ବିଷୟ ଉପରେ ପ୍ରଶିକ୍ଷଣ ପ୍ରଦାନ କରିଥିଲେ । ଏହି ବ୍ଳକସ୍ତରୀୟ ତାଲିମ୍ ଶିବିରରେ ପ୍ରଶିକ୍ଷଣ ନେଇଥିବା ଆସିକା ଗୋଷ୍ଠୀ ଶିକ୍ଷାଧିକାରୀ କାର୍ଯ୍ୟାଳୟ ଅଧୀନସ୍ଥ ବିଭିନ୍ନ ମାଧ୍ୟମିକ ବିଦ୍ୟାଳୟର ବିଜ୍ଞାନ ଶିକ୍ଷକମାନେ ନିଜ ନିଜ ବିଦ୍ୟାଳୟରେ ଛାତ୍ରଛାତ୍ରୀମାନଙ୍କୁ କୌଶଳୀ କ୍ଳବ୍ ମାଧ୍ୟମରେ ଶିକ୍ଷାଦେବେ ବୋଲି ଜଣାପଡିଛି । ଛାତ୍ରଛାତ୍ରୀମାନେ କୌଶଳୀ ଯୋଜନା ସଂପର୍କରେ ଜ୍ଞାନ ଆହରଣ କରିବା ଦ୍ୱାରା ସେମାନଙ୍କ ମଧ୍ୟରେ କମ୍ପ୍ୟୁଟର ପ୍ରତି ଆଗ୍ରହ ଓ ବିଭିନ୍ନ ସମସ୍ୟାର ସମାଧାନ ନିମିତ୍ତ ବ୍ୟଗ୍ରତା ବୃଦ୍ଧି ପାଇବ ବୋଲି ଜଣାପଡିଛି । ଏହି ବ୍ଳକସ୍ତରୀୟ କୌଶଳୀ ତାଲିମ୍ ଶିବିରରେ ଶିକ୍ଷୟିତ୍ରୀ ସସ୍ମିତା ନାହାକ, ଶିକ୍ଷକ ଚିତ୍ତରଂଜନ ଷଡଙ୍ଗୀ, ଗୋବିନ୍ଦ ପରିଡା, ଶଙ୍କର ବେହେରା, ଇଶ୍ୱରୀ ମହାରଣା, ମୁନା ସ୍ୱାଇଁ, ସସ୍ମିତା କୁମାରୀ ନନ୍ଦ, ଅରୁଣ ମଲିକ, କୁଞ୍ଜବିହାରୀ ଜେନାଙ୍କ ସମେତ ବିଭିନ୍ନ ମାଧ୍ୟମିକ ବିଦ୍ୟାଳୟର ବହୁ ଶିକ୍ଷକ ଯୋଗଦେଇଥିଲା ବେଳେ ଟେକନିକାଲ୍ ହାଇସ୍କୁଲର ପ୍ରଧାନଶିକ୍ଷୟିତ୍ରୀ ପ୍ରଜ୍ଞା ପରମିତା ପଣ୍ଡା, ସହକାରୀ ଶିକ୍ଷକ ରାମଚନ୍ଦ୍ର ପ୍ରଧାନ, ଦେବାଶିଷ ପାଣିଗ୍ରାହୀ, କୈଳାଶ ଗୌଡ, ସର୍ମିଷ୍ଠା ସାହୁ, ଲକ୍ଷ୍ମୀ ଜେନା, ଗାୟତ୍ରୀ ବେହେରା, ରୁଚି ପ୍ରଧାନ, ସମିତ୍ରା କାର୍ଜି, ମିତାଞ୍ଜଳୀ ପଣ୍ଡା, ଇପ୍ସିତା ମଲିକ, ଭଗବାନ ସ୍ୱାଇଁ, ରାହୁଳ ପଟ୍ଟନାୟକ, ବଳରାମ ବେହେରା, ସିଦ୍ଧାନ୍ତ ସେଠୀ, ସୁବାଶିଷ ନାହାକ, ଅନିଲ୍ କୁମାର ଜେନା ପ୍ରମୁଖ ପରିଚାଳନାରେ ସହଯୋଗ କରିଥିବା ଲକ୍ଷ୍ୟ କରାଯାଇଥିଲା ।
