ହାତୀ ଦାଉରୁ ସୁରକ୍ଷା ପ୍ରଦାନ ପାଇଁ ସମନ୍ଵୟ ବୈଠକ ଅନୁଷ୍ଠିତ
ପାରଳାଖେମୁଣ୍ଡି, (ତାରିଣୀ ପ୍ରସାଦ ପଣ୍ଡା): ଗଜପତି ଜିଲ୍ଲାର କାଶୀନଗର ଅଞ୍ଚଳର 4 ଗୋଟି ପଞ୍ଚାୟତବାସୀ 4 ଟିକିଆ ଜଙ୍ଗଲୀ ହାତୀଙ୍କ ଉପଦ୍ରବ ଯୋଗୁଁ ଆତଙ୍କିତ ହୋଇପଡିଛନ୍ତି.ଏହି ଅଞ୍ଚଳବାସୀଙ୍କ ଫସଲ, ଘର ଦ୍ୱାର ଓ ଜୀବନକୁ ସୁରକ୍ଷା ପ୍ରଦାନ ପାଇଁ କାଶୀନଗର ଠାରେ ଏକ ସ୍ୱତନ୍ତ୍ର ସମନ୍ଵୟ ବୈଠକ ଆୟୋଜିତ ହୋଇଯାଇଛି. ଘଟଣାରୁ ପ୍ରକାଶ, କାଶୀନଗର ବ୍ଲକ୍ର ବୁଦୁରା, ଖାଣ୍ଡବା, ଗରିବନ୍ଧା ଓ ଶିଆଳି ପଞ୍ଚାୟତ ଅଞ୍ଚଳରେ ଏକ ଚାରିଟିକିଆ ହାତୀପଲ ଦୁଇ ମାସ ହେଲା ଡେରା ପକାଇଛନ୍ତି । କେତେବେଳେ କାହାର ଧାନକ୍ଷେତ, ଆଖୁବାଡ଼ରେ ପଶି ନଷ୍ଟ କରୁଥିବା ବେଳେ ଶିଆଳି ପଂଚାୟତର ୯ଜଣଙ୍କ କୁଡ଼ିଆ ଘର ଭାଙ୍ଗି ଦେଇଛନ୍ତି. ଏଣୁ, ହାତୀଙ୍କୁ ସେଠାରୁ ଘଉଡ଼ାଇବା ପାଇଁ ଏକ ସମନ୍ବୟ ବୈଠକ କାଶୀନଗର ପଞ୍ଚାୟତ ସମିତି ବୈଠକ ଗୃହରେ ଅନୁଷ୍ଠିତ ହୋଇଯାଇଛି। ବିଡିଓ ଡମ୍ବରୁଧର ମଲ୍ଲିକଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ବ୍ଲକ ଅଧ୍ୟକ୍ଷା ବାଲା ସାଇଆମ୍ମା, କାଶୀନଗର ବନାଞ୍ଚଳ ଅଧିକାରୀ ବ୍ରହ୍ମାନନ୍ଦ ସାହୁ, ବିଦ୍ୟୁତ ବିଭାଗ କାର୍ଯ୍ୟନିର୍ବାହୀ ଯନ୍ତ୍ରୀ ବିଜୟ, ସରପଞ୍ଚ ରାମପ୍ରସାଦ ପଟ୍ଟନାୟକଙ୍କ ସମେତ ବିଭିନ୍ନ ବିଭାଗର ଅଧିକାରୀମାନେ ଯୋଗଦେଇ ସବିଶେଷ ନିଷ୍ପତ୍ତି ନେଇଥିଲେ। କାଶୀନଗର ଫରେଷ୍ଟର ବଳରାମ ଶବର ବର୍ତମାନ ହାତୀର ଗତିବିଧି ଉପରେ ନଜର ରଖିଛନ୍ତି। ହାତୀପଲ କୀତିଙ୍ଗି ଜଙ୍ଗଲରେ ଡେରା ଜମାଇଥିବା ବେଳେ ଦିନେ ଦୁଇ ଦିନ ମଧ୍ୟରେ ସେମାନେ ବଂଶଧାରା ନଦୀ ପାର ହୋଇ ଆନ୍ଧ୍ରମୁହାଁ ହେବେ ବୋଲି ଅନୁମାନ କରାଯାଉଥିବା ବନ ବିଭାଗ ସୂଚନା ଦେଇଛି।
