ବେଆଇନ ବାଲି ଚୋରାଚାଲାଣ: 6 ଗିରଫ

ପାରଳାଖେମୁଣ୍ଡି (ତାରିଣୀ ପ୍ରସାଦ ପଣ୍ଡା ): ବେଆଇନ ବାଲି ଖନନ ଏବଂ ପରିବହନ ବିରୋଧରେ ପାରଳାଖେମୁଣ୍ଡି ପୋଲିସ ପକ୍ଷରୁ ୦୩.୦୬.୨୦୨୬ ତାରିଖ ସନ୍ଧ୍ୟାରୁ ଏକ ସ୍ୱତନ୍ତ୍ର ଏନଫୋର୍ସମେଣ୍ଟ ଅଭିଯାନ ଆରମ୍ଭ କରାଯାଇଥିଲା । ଏହି ଅଭିଯାନ ସମୟରେ ଏକ ସଂଗଠିତ ବାଲି ଚୋରା ଚାଲାଣ ଚକ୍ରର ସନ୍ଧାନ ମିଳିଥିବା ବେଳେ ବାଲି ବୋଝେଇ ୭ଟି ଗାଡ଼ି (ଟ୍ରାକ୍ଟର ଏବଂ ଭାରୀ ଟିପର) ଜବତ କରାଯାଇଛି। ପୋଲିସ ଟିମ୍ ରାଜ୍ୟ ରାଜପଥ-୪ ଉପରେ ଏହି ଗାଡ଼ିଗୁଡ଼ିକୁ ଅଟକାଇ ଯାଞ୍ଚ କରିଥିଲେ।  ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ବେଆଇନ ଭାବରେ ବାଲି ଉତ୍ତୋଳନ, ରୟାଲଟି ଏବଂ ଟିକସ ଫାଙ୍କି, ଜାଲିଆତିପୂର୍ଣ୍ଣ ଚାଲାଣ ବ୍ୟବହାର, ଓଭରଲୋଡିଂ ଏବଂ ସରକାରୀ ଖଣିଜ ସମ୍ପତ୍ତି ଚୋରି କରି ପରିବହନ କରାଯାଉଥିଲା । ଏହା ଦ୍ୱାରା ସରକାରଙ୍କ ରାଜସ୍ୱର ବ୍ୟାପକ କ୍ଷତି ହେଉଥିବା ଅନୁମାନ କରାଯାଉଛି।  ଏହି ଘଟଣାରେ ପାରଳାଖେମୁଣ୍ଡି ଥାନା କେସ୍ ନଂ-୧୯୯, ୨୦୦, ୨୦୧, ୨୦୨, ୨୦୩, ୨୦୪, ୨୦୫ ଏବଂ ୨୦୬/୨୦୨୬ ରୁଜୁ କରାଯାଇଛି। ଏହି ମାମଲାଗୁଡ଼ିକରେ ମୋଟ ୧୩ ଜଣ ବ୍ୟକ୍ତି, ଯଥା ଗାଡ଼ି ମାଲିକ, ଚାଳକ ଏବଂ ବାଲି ପରିବହନ ସହିତ ସଂପୃକ୍ତ ଅନ୍ୟାନ୍ୟ ବ୍ୟକ୍ତି ଜଡ଼ିତ ଥିବା ଜଣାପଡ଼ିଛି ।  ଟ୍ରାକ୍ଟର ମାମଲାରେ ଗିରଫ ହୋଇଥିବା ଅଭିଯୁକ୍ତ ଚାଳକ ସୁରେଶ ସବର ଓ ମାଲିକ ଏସ୍. ବିଜୟ କୁମାର, ଚାଳକ ଦିନେଶ ଗୌଡ଼ ଓ ମାଲିକ ଏସ୍. ବିଜୟ କୁମାର, ଏବଂ ଚାଳକ ପ୍ରକାଶ ଗୌଡ଼ ଓ ମାଲିକ ଦିବାକର ଗୌଡ଼ଙ୍କୁ ଆଜି ମାନ୍ୟବର ନ୍ୟାୟାଳୟକୁ ଚାଲାଣ କରାଯାଉଛି ।  ତଦନ୍ତରୁ ଏହା ମଧ୍ୟ ଜଣାପଡ଼ିଛି ଯେ ବେଆଇନ ବାଲି ଖନନ ଏବଂ ପରିବହନ କାର୍ଯ୍ୟକଳାପ ଏକ ସଂଗଠିତ ଚକ୍ର ମାଧ୍ୟମରେ ଚାଲିଥିଲା ଏବଂ ଏଥିରୁ ବେଆଇନ ଆର୍ଥିକ ଲାଭ ହାସଲ କରାଯାଉଥିଲା। ଏହି ଚକ୍ର ସହିତ ସଂପୃକ୍ତ ଅନ୍ୟାନ୍ୟ ବ୍ୟକ୍ତିଙ୍କ ଭୂମିକା ଓ ସଂପୃକ୍ତି ସମ୍ପର୍କରେ ତଦନ୍ତ ଜାରି ରହିଛି ।  ପାରଳାଖେମୁଣ୍ଡି ପୋଲିସ ପକ୍ଷରୁ ସ୍ପଷ୍ଟ କରାଯାଇଛି ଯେ ବେଆଇନ ଖଣିଜ ଖନନ, ଚୋରା ଚାଲାଣ ଏବଂ ପରିବହନରେ ସଂପୃକ୍ତ ସମସ୍ତ ବ୍ୟକ୍ତିଙ୍କ ବିରୋଧରେ ଆଗାମୀ ଦିନରେ ମଧ୍ୟ କଡ଼ା ଆଇନଗତ କାର୍ଯ୍ୟାନୁଷ୍ଠାନ ଜାରି ରହିବ। ବର୍ତ୍ତମାନ ମାମଲାଗୁଡ଼ିକର ତଦନ୍ତ ଚାଲୁ ରହିଛି।