ମା’ ତାରାତାରିଣୀଙ୍କ ଚୈତ୍ର ମଙ୍ଗଳ ଯାତ୍ରା ତୃତୀୟ ପାଳି ସମ୍ପନ୍ନ: ଆୟୋଜନ ବୁଲି ଦେଖିଲେ ମନ୍ତ୍ରୀ, ବିଧାୟକ

ଛତ୍ରପୁର (ୟୁଏନ୍ଏସ୍): ମା’ ତାରା ତାରିଣୀଙ୍କ ବହୁ ପ୍ରତିକ୍ଷିତ ଚୈତ୍ର ମଙ୍ଗଳ ଯାତ୍ରା -୨୦୨୫ ତୃତୀୟ ପାଳି ଶାନ୍ତି ଶୃଙ୍ଖଳାର ସହ ସମ୍ପୂର୍ଣ୍ଣ ହୋଇପାରିଛି । ଏ ବର୍ଷ ପ୍ରଥମ କରି ଦୁଇ ଜାଗାରେ ଖୋଲା ଯାଇଥିବା ଅନ୍ନଯଜ୍ଞରେ ସକାଳ ୭  ଘଟିକା ଠାରୁ ସଂଧ୍ୟା ୫  ଘଟିକା ଯାଏଁ ପ୍ରାୟ ୩୦  ହଜାର ଶ୍ରଦ୍ଧାଳୁ ପ୍ରସାଦ ସେବନ କରିଥିଲେ । ସେହିପରି ଚାରି ଜାଗାରେ ଖୋଲା ଯାଇଥିବା ମଣ୍ଡନ ସ୍ଥଳରେ   ରାତି ଦୁଇ ଘଣ୍ଟିକା ଠାରୁ ସଂଧ୍ୟା ଯାଏଁ ୬୪୦୦  ପିଲାଙ୍କ ମଣ୍ଡନ ହୋଇଥିଲା । ବସ୍ ଯୋଗେ ୧୨ ହଜାର ଯାତ୍ରୀ ଏବଂ ରୋପ୍ ଓ୍ବେ ଯୋଗେ ୧୩୦୦  ଯାତ୍ରୀ ପୂର୍ଣ୍ଣଗିରି ପାହାଡ ଉପରକୁ   ଯାଇ ମା ସରସ୍ବତୀ ବେଶରେ ସଜ୍ଜିତ ମା ତାରା ତାରିଣୀଙ୍କୁ ଦର୍ଶନ କରିଥିଲେ । ବହୁ ଭକ୍ତ, ଯାତ୍ରୀ ଶହଶହ ସଂଖ୍ୟାରେ ୯୯୯  ପଥର ପାହାଚ ଦେଇ ଯାତାୟତ କରୁଥିବା ଲକ୍ଷ୍ୟ କରାଯାଇଥିଲା । ମନ୍ଦିର ଉତ୍ତର ପାର୍ଶ୍ବ ନିରୁପମା ହୋଟେଲ ନିକଟ ଏବଂ ଦକ୍ଷିଣ ପାର୍ଶ୍ବ ଉଡା ଜାହାଜ ପଡିଆରେ ସ୍ଥାନୀୟ ପଞ୍ଚାୟତ ପକ୍ଷରୁ ଖୋଲାଯାଇଥିବା ଅସ୍ଥାୟୀ ଯାନ ବାହନ ରହଣୀ ସ୍ଥଳରେ ହଜାର ହଜାର ବସ୍, କାର୍, ମଟରସାଇକେଲ, ଅଟୋରିକ୍ସା, ପାର୍କିଂ ହୋଇଥିଲା। ପୂର୍ବାଗ୍ନ ଘ.୦୩.୩୦ ମି. ରେ ମନ୍ଦିର ଖୋଲାଯାଇ ରିତିନୀତି ସହ ଆଳତୀ ହେବା ପରେ  ସର୍ବ ସାଧାରଣ ଦର୍ଶନ ନିମନ୍ତେ ଦ୍ବାର ଫିଟାଯାଇଥିଲା । ରାଜ୍ୟ ସରକାରଙ୍କ ଅତିରିକ୍ତ ମୁଖ୍ୟ ଶାସନ ସଚିବ ସତ୍ୟବ୍ରତ ସାହୁ  ପ୍ରତି ବର୍ଷ ଭଳି ଏବର୍ଷ ମଧ୍ୟ ଆଳତୀ ଦର୍ଶ କରିଥିଲେ । କବି ସୂର୍ଯ୍ୟ ନଗର ମାନ୍ୟବର ବିଧାୟକ ପ୍ରତାପ ଚନ୍ଦ୍ର ନାୟକ ଏଠାରେ ଆୟୋଜିତ ବିଶ୍ବଶାନ୍ତି ସପ୍ତସତୀ ଚଣ୍ଡୀ ମହାଯଜ୍ଞରେ ଅଂଶ ଗ୍ରହଣ କରିଥିଲେ । ବାଣିଜ୍ୟ ଓ ପରିବହନ, ଖଣି ଓ ଇସ୍ପାତ  ବିଭାଗୀୟ ମାନ୍ୟବର ମନ୍ତ୍ରୀ  ବିଭୂତି ଭୂଷଣ ଜେନା , ଖଲ୍ଲିକୋଟ ମାନ୍ୟବର ବିଧାୟକ ପୂର୍ଣ୍ଣ ଚନ୍ଦ୍ର ସେଠୀ ପ୍ରମୁଖ ମାଆ ଙ୍କୁ ଦର୍ଶନ କରି ଏଠାରେ ଯାତ୍ରା ପାଇଁ ହୋଇଥିବା ଆୟୋଜନ ବୁଲି ଦେଖିଥିଲେ । ପରେପରେ ଅନ୍ନଯଜ୍ଞ ପ୍ରସ୍ତୁତି ସମୀକ୍ଷା କରିଥିଲେ । ସୋମବାର ରାତିରେ ଜିଲ୍ଲା ସଂସ୍କୃତି ପରିଷଦ ପକ୍ଷରୁ ପାହାଡ ପାଦ ଦେଶରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଜିଲ୍ଲା ପ୍ରଶାସନ, ମନ୍ଦିର ପ୍ରଶାସନ ଏବଂ ପୋଲିସ୍ ପ୍ରଶାସନ ପକ୍ଷରୁ ସୁପରିଚାଳନା କରାଯାଇଥିବା ମନ୍ତ୍ରୀ ଶ୍ରୀ ଜେନା ପ୍ରକାଶ କରିଛନ୍ତି ।