ପାଟିଗଡ଼ ହତ୍ୟାକାଣ୍ଡର ୨୨ ବର୍ଷ ପରେ ମୁଖ୍ୟ ଅଭିଯୁକ୍ତ ଗିରଫ

ପୋଲସରା (ଅନୀଲ କୁମାର ମହାରଣା): ପୋଲସରା ଏନଏସି ପାଟିଗଡ଼ ଗ୍ରାମର ଲିଙ୍ଗରାଜ ପାତ୍ର ହତ୍ୟାକାଣ୍ଡ ଘଟଣାର ମୁଖ୍ୟ ଅଭିଯୁକ୍ତକୁ ଦୁଇ ଦଶନ୍ଧି ପରେ ଗିରଫ କରିବାରେ ସଫଳ ହୋଇଛି ପୋଲସରା ପୋଲିସ। ବ୍ୟବସାୟକୁ ନେଇ ଉଭୟଙ୍କ ମଧ୍ୟରେ ତିକ୍ତତା ଯୋଗୁଁ ୨୦୦୩ ମସିହା ମାର୍ଚ୍ଚ ୨୫ ତାରିଖ ଅପରାହ୍ନରେ ଲିଙ୍ଗରାଜ ନିଜ ଦୋକାନକୁ ଯିବା ସମୟରେ ସଚିନ୍ଦ୍ର ସାହାଣୀ ଓ ତାର ୬ ସହଯୋଗୀ ଗ୍ରାମ ମଝି ଦାଣ୍ଡରେ ଖଣ୍ଡାରେ ହାଣି ବିଭତ୍ସ ହତ୍ୟାକାଣ୍ଡ ଘଟାଇବା ପରେ ମୁଖ୍ୟ ଆସାମୀ ସଚିନ୍ଦ୍ର ସାହାଣୀ ଓ ଅନ୍ୟ ଅଭିଯୁକ୍ତମାନେ ଫେରାର ହୋଇଯାଇଥିଲେ। ତତ୍କାଳୀନ କବିସୂର୍ଯ୍ୟନଗର ଥାନା କେସ ନଂ ୬୪/୨୦୦୩ ରେ ମାମଲା ରୁଜୁ ହୋଇଥିଲା।ଅଭିଯୋଗକୁ ଭିତି କରି ପୋଲିସ ହତ୍ୟାରେ ସମ୍ପୃକ୍ତ କିଛି ସହଯୋଗୀଙ୍କୁ ଗିରଫ କରିଥିବା ବେଳେ ମୁଖ୍ୟ ଦୁଇ ଅଭିଯୁକ୍ତ ଫେରାର ହୋଇଥିଲେ। ହତ୍ୟା କାଣ୍ଡରେ ସମ୍ପୂକ୍ତ  ଅଭିଯୁକ୍ତମାନଙ୍କୁ ଗିରଫ କରିବାକୁ ପରିବାର ଲୋକେ ବହୁବାର ଦାବୀ ପରେ ଗଞ୍ଜାମ ଏସପିଙ୍କ ନିର୍ଦ୍ଦେଶକ୍ରମେ ପୋଲସରା ଥାନାଧିକାରୀ କୌଶିକ ମାଝୀଙ୍କ ନେତୃତ୍ୱରେ ଏକ ସ୍ବତନ୍ତ୍ର ଟିମ୍ ଗଠନ କରି ବହୁ ଚେଷ୍ଟା ପରେ ମୁଖ୍ୟ ଅଭିଯୁକ୍ତ ସଚିନ୍ଦ୍ର ସାହାଣୀଙ୍କୁ ଗୁଜୁରାଟ ସୁରାଟରୁ ଗିରଫ କରିଥିଲେ। ସୁରଥରୁ ଗିରଫ ଅଭିଯୁକ୍ତକୁ କୋର୍ଟରେ ଉପସ୍ଥିତ କଲାପରେ ପୋଲସରା ଥାନାକୁ ହସ୍ତାନ୍ତର କରାଯାଇଛି l ପୋଲସରା ପୋଲିସ ଆଜି ଅପରାହ୍ନରେ ସଚିନ୍ଦ୍ର ସହାଣୀକୁ କୋର୍ଟ ଚାଲାଣ କରିଛି l ତେବେ ବର୍ତ୍ତମାନ ମଧ୍ୟ ଅନ୍ୟ ଜଣେ ଅଭିଯୁକ୍ତ ଫେରାର ରହିଥିବା ଜଣାପଡିଛି। ପୋଲସରା ଥାନାଧିକାରୀ କୌଶିକ ମାଝୀଙ୍କ ଉଦ୍ୟମରେ ୨୨ ବର୍ଷ ପୂର୍ବେ ହତ୍ୟାକାଣ୍ଡ ଘଟାଇ ଫେରାର ଥିବା ମୁଖ୍ୟ ଅଭିଯୁକ୍ତକୁ ଗିରଫ କରି ପୋଲସରା ପୋଲିସ ନିଜର ଦକ୍ଷତା ପ୍ରତିପାଦିତ କରିଛି।