କାଳୀପୂଜା ଭସାଣି ପ୍ରସ୍ତୁତିର ସମୀକ୍ଷା କଲେ ମେୟର
କଟକ, (ଓ୍ବାଇଏନଏସ): କଟକର ପ୍ରସିଦ୍ଧ କାଳୀପୂଜା ଭସାଣି ଉତ୍ସବକୁ ଶୃଙ୍ଖଳିତ, ଶାନ୍ତିପୂର୍ଣ୍ଣ ଓ ସୁରକ୍ଷିତ ଭାବେ ସମ୍ପନ୍ନ କରିବା ଲାଗି ପ୍ରଶାସନିକ ପ୍ରସ୍ତୁତି ଜୋରଦାର ହୋଇଛି। ଏହି ପରିପ୍ରେକ୍ଷୀରେ ସୋମବାର କଟକ ମହାନଗର ନିଗମର ମେୟର ସୁବାସ ସିଂହ ଦେବୀଗଡ଼ାସ୍ଥିତ ପୁରୀଘାଟ ମୂର୍ତ୍ତି ବିସର୍ଜନ ସ୍ଥଳ ପରିଦର୍ଶନ କରି ବିଭିନ୍ନ ପ୍ରସ୍ତୁତିର ସମୀକ୍ଷା କରିଛନ୍ତି। ଭସାଣି ସମୟରେ ଶାନ୍ତିଶୃଙ୍ଖଳା ରକ୍ଷା ସହିତ ସ୍ୱଚ୍ଛତା, ଆଲୋକୀକରଣ, ଜନସୁରକ୍ଷା ଓ ପରିବେଶ ସୁରକ୍ଷାକୁ ପ୍ରାଥମିକତା ଦେବାକୁ ସେ ଗୁରୁତ୍ୱ ଦେଇଛନ୍ତି। ପରିଦର୍ଶନ ସମୟରେ ମେୟର ଘାଟର ସ୍ଥିତି, ମୂର୍ତ୍ତି ବିସର୍ଜନ ପାଇଁ ନିର୍ଦ୍ଧାରିତ ସ୍ଥାନ, ପ୍ରବେଶ ଓ ପ୍ରସ୍ଥାନ ପଥ, ରାସ୍ତାଘାଟର ଅବସ୍ଥା ଏବଂ ଆଲୋକ ବ୍ୟବସ୍ଥା ଅନୁଧ୍ୟାନ କରିଥିଲେ। ବିଭିନ୍ନ ପୂଜା କମିଟିର ମେଢ଼ ଓ ଶୋଭାଯାତ୍ରା ସମୟରେ ବହୁ ସଂଖ୍ୟାରେ ଶ୍ରଦ୍ଧାଳୁଙ୍କ ସମାଗମ ହେବାକୁ ଥିବାରୁ ଯାତାୟାତ ଓ ବିସର୍ଜନ ପ୍ରକ୍ରିୟାକୁ ସୁବ୍ୟବସ୍ଥିତ କରିବା ଉପରେ ଆଲୋଚନା ହୋଇଥିଲା। ଘାଟରେ ଯେପରି ଭିଡ଼ ନିୟନ୍ତ୍ରଣରେ ରହିବ ଏବଂ ଶ୍ରଦ୍ଧାଳୁମାନେ ସୁବିଧାରେ ବିସର୍ଜନ କରିପାରିବେ, ସେଥିପାଇଁ ସମ୍ପୃକ୍ତ ବିଭାଗଗୁଡ଼ିକ ମଧ୍ୟରେ ସମନ୍ୱୟ ରଖିବା ଉପରେ ମଧ୍ୟ ଗୁରୁତ୍ୱ ଦିଆଯାଇଥିଲା। ସେହିପରି ଭସାଣି ପୂର୍ବରୁ, ଉତ୍ସବ ଚାଲିଥିବା ସମୟରେ ଏବଂ ପରେ ଘାଟ ଓ ଏହାର ଆଖପାଖ ଅଞ୍ଚଳରେ ସ୍ୱଚ୍ଛତା ବଜାୟ ରଖିବାକୁ ନିଗମ ପକ୍ଷରୁ ଆବଶ୍ୟକ ବ୍ୟବସ୍ଥା କରାଯିବା ନେଇ ଆଲୋଚନା ହୋଇଥିଲା। ପର୍ଯ୍ୟାପ୍ତ ସଫେଇ କର୍ମଚାରୀ ନିୟୋଜନ, ଅବର୍ଜନା ସଂଗ୍ରହ ଓ ଅପସାରଣ ସହିତ ବିସର୍ଜନ ପରେ ଫୁଲ, ପୂଜା ସାମଗ୍ରୀ ଓ ସାଜସଜ୍ଜା ଅବଶିଷ୍ଟାଂଶକୁ ତୁରନ୍ତ ହଟାଇବା ଉପରେ ଗୁରୁତ୍ୱ ଦିଆଯାଇଥିଲା। କେବଳ ଉତ୍ସବର ସୁପରିଚାଳନା ନୁହେଁ, ପରିବେଶ ସୁରକ୍ଷାକୁ ମଧ୍ୟ ଏଥର ପ୍ରାଧାନ୍ୟ ଦିଆଯାଉଛି। ମୂର୍ତ୍ତି ବିସର୍ଜନ ପରେ ନଦୀଜଳ ପ୍ରଦୂଷଣ ରୋକିବା, ଅବଶିଷ୍ଟ ସାମଗ୍ରୀର ସଠିକ୍ ପରିଚାଳନା ଏବଂ ଘାଟର ପରିଚ୍ଛନ୍ନତା ବଜାୟ ରଖିବା ଉପରେ ମତବିନିମୟ ହୋଇଥିଲା। ଧାର୍ମିକ ପରମ୍ପରା ଓ ଜନଭାବନାକୁ ସମ୍ମାନ ଦେବା ସହ ପରିବେଶ ପ୍ରତି ଦାୟିତ୍ୱବାନ ହେବାକୁ ସମସ୍ତଙ୍କ ସହଯୋଗ ଆବଶ୍ୟକ ବୋଲି ଆଲୋଚନାରେ ମତ ପ୍ରକାଶ ପାଇଥିଲା।ଏହି ସମୀକ୍ଷା ବୈଠକରେ ଶାନ୍ତି କମିଟି ସଭାପତି ଦେବେନ୍ଦ୍ର ସାହୁ ଉପସ୍ଥିତ ରହି ଭସାଣି ଉତ୍ସବରେ ଶାନ୍ତି ଓ ସଦ୍ଭାବ ବଜାୟ ରଖିବା ସମ୍ପର୍କରେ ମତ ରଖିଥିଲେ। ଏଥିରେ ନିଗମର ଅତିରିକ୍ତ କମିଶନର ସୋନା ଟୁଡୁ, ସ୍ୱାସ୍ଥ୍ୟ ସ୍ଥାୟୀ କମିଟି ଅଧ୍ୟକ୍ଷା ଦୀପ୍ତିମୟୀ ମୂଳିଆ, କର୍ପୋରେଟର ବନଲତା ପ୍ରଧାନ, ଦେବେନ୍ଦ୍ର କାହାଳି, ନୃସିଂହ ଚୌଧୁରୀ, ଦୀପାୟନ ପଟ୍ଟନାୟକ ଓ ଦେବେନ୍ଦ୍ର ପାଣିଗ୍ରାହୀଙ୍କ ସମେତ ନିଗମର ବିଭିନ୍ନ ବିଭାଗର ଅଧିକାରୀ ଓ କର୍ମଚାରୀ ଯୋଗଦେଇଥିଲେ। କଟକର କାଳୀପୂଜା ଓ ଭସାଣି ଉତ୍ସବ ସହରର ଦୀର୍ଘଦିନର ସାଂସ୍କୃତିକ ପରମ୍ପରା ଓ ଭାଇଚାରାର ପ୍ରତୀକ। ଏହି ପରମ୍ପରାର ମର୍ଯ୍ୟାଦା ଅକ୍ଷୁଣ୍ଣ ରଖି ଉତ୍ସବକୁ ଶାନ୍ତିପୂର୍ଣ୍ଣ ଓ ପରିବେଶ ଅନୁକୂଳ କରିବା ପାଇଁ ପୂଜା କମିଟି, ଶାନ୍ତି କମିଟି, ପ୍ରଶାସନ ଓ ସାଧାରଣ ଜନତାଙ୍କ ମିଳିତ ସହଯୋଗ ଅପରିହାର୍ଯ୍ୟ ବୋଲି ଏହି ପରିଦର୍ଶନରେ ଗୁରୁତ୍ୱାରୋପ କରାଯାଇଥିଲା।
