ପ୍ରତ୍ୟକ୍ଷ ଦେବୀ ମା’ କରଞ୍ଜେଇଙ୍କ ପୀଠରେ ନବରାତ୍ରୀ ପୂଜା
ଆସିକା (ୱାଇଏନ୍ଏସ୍) : ଆସିକା-ବ୍ରହ୍ମପୁର ୫୯ ନମ୍ବର ଜାତୀୟ ରାଜପଥର ଚେରମାରିଆ ଗ୍ରାମ ଛକ ଠାରୁ କିଛି ମିଟର ଦୂରରେ କେଉଁ ଆବାହମାନ କାଳରୁ ପୂଜା ପାଇ ଆସୁଥିବା ମା’ କରଞ୍ଜେଇଙ୍କ ପୀଠରେ ନବରାତ୍ରୀ ପୂଜା ପୂର୍ବବର୍ଷଭଳି ଚଳିତବର୍ଷ ମଧ୍ୟ ପାରମ୍ପରିକ ରୀତିନୀତି ଅନୁଯାୟୀ ଏକ ଆଧ୍ୟାତ୍ମିକ ପରିବେଶ ମଧ୍ୟରେ ଅନୁଷ୍ଠିତ ହେଉଥିବା ଲକ୍ଷ୍ୟ କରାଯାଇଛି । ବର୍ଷତମାମ ମନ୍ଦିରରେ ପାଳିତ ହେଉଥିବା ବିଭିନ୍ନ ପର୍ବପର୍ବାଣୀ ମଧ୍ୟରେ ନବରାତ୍ରୀ ପୂଜାର ଏକ ସ୍ୱତନ୍ତ୍ରତା ରହିଛି । ଏହି ନବରାତ୍ର ସମୟରେ ମା’ କରଞ୍ଜେଇଙ୍କୁ ଦର୍ଶନକଲେ ଅଧିକ ପୂଣ୍ୟ ମିଳେ ବୋଲି ଲୋକକଥା ପ୍ରଚଳିତ ରହିଥିବାରୁ ଏହି ଶକ୍ତିପୀଠରେ ଦିନ ତମାମ ଶ୍ରଦ୍ଧାଳୁ ଭକ୍ତଙ୍କ ଭିଡ଼ ଲାଗି ରହୁଥିବା ଦେଖିବାକୁ ମିଳୁଛି । ନବରାତ୍ର ଅବସରରେ ଆସିକା ତଥା ଏହାର ଆଖପାଖ ଅଞ୍ଚଳର ଶକ୍ତିପୀଠ ଗୁଡ଼ିକରେ ଚଣ୍ଡିପାଠ, ହୋମଯଜ୍ଞ ଓ ବିଶେଷ ପୂଜାର୍ଚ୍ଚନା ଚାଲିଥିବାରୁ ଶ୍ରଦ୍ଧାଳୁଙ୍କ ଭିଡ଼ ଲାଗି ରହୁଥିବା ବେଳେ ସାନ୍ଧ୍ୟ ଆଳତୀ ସମୟରେ ଶ୍ରଦ୍ଧାଳୁଙ୍କ ସଂଖ୍ୟା ଅତି ମାତ୍ରାରେ ବୃଦ୍ଧି ପାଇଥାଏ । ଘଣ୍ଟଧ୍ୱନି, ହୁଳହୁଳି ଶବ୍ଦରେ ମନ୍ଦିର ପରିବେଶ ପ୍ରକମ୍ପିତ ହୋଇପଡ଼ୁଥିବା ଲକ୍ଷ୍ୟ କରାଯାଇଛି । ଶାରଦୀୟ ଦୁର୍ଗାପୂଜା ଅବସରରେ ମା’ କରଞ୍ଜେଇଙ୍କ ପୀଠରେ ଅନୁଷ୍ଠିତ ହେଉଥିବା ନବରାତ୍ର ପୂଜାକୁ ସୁପରିଚାଳନା କରିବା ଦିଗରେ ଆଧ୍ୟାତ୍ମିକ ପ୍ରେମୀ ତଥା ମନ୍ଦିର ପରିଚାଳନା କମିଟି ସଭାପତି ଶିବରାମ ଉପାଧ୍ୟାୟ, ସଂପାଦକ ଅନନ୍ତ ପ୍ରସାଦ ପାଢୀ, ଉପସଭାପତି କାଳୀଚରଣ ବେହେରା, ଉପଦେଷ୍ଟା ଶରତ ଚନ୍ଦ୍ର ଦାଶ ଓ ଲମ୍ବୋଦର ଦାଶ, ଶ୍ରଦ୍ଧାଳୁ ଭକ୍ତ ଗୌତମ ନାହାକ, ଗନ୍ଧିଆ ପଣ୍ଡା, ଗୋକୁଳ ସାହୁ, ସୁରେଶ ଗୌଡ, କୁମର ସ୍ୱାଇଁ, ଧୋବା ପ୍ରଧାନ, ଦୀପୁ ପାତ୍ର, ଗୁରୁନାଥ ପୋଲାଇ ପ୍ରମୁଖ ସହଯୋଗ କରୁଥିବା ବେଳେ ପିତଳ ଗ୍ରାମର ଅଭିଜ୍ଞ ପଣ୍ଡିତ ତଥା ଚଣ୍ଡିପାଠ ବିିଶାରଦ ଦେବାଶିଷ ମିଶ୍ର ଓ ସହଯୋଗୀ ରବିଶଙ୍କର ମିଶ୍ର ଚଣ୍ଡୀପାଠ କରୁଥିବା ବେଳେ ପୂଜକ ଦେବାନନ୍ଦ ଦାଶ ସକ୍ରିୟ ସହଯୋଗ କରୁଥିବା ଦେଖିବାକୁ ମିଳୁଛି । ମା’ କରଞ୍ଜେଇଙ୍କ ପୀଠରେ ନବରାତ୍ରୀ ପୂଜା ଅବସରରେ ତୃତୀୟ ଦିବସରେ କଲ୍ୟାଣମୟୀ ମା’ କରଞ୍ଜେଇଙ୍କୁ ଚନ୍ଦ୍ରଘଣ୍ଟା ବେଶରେ ସଜ୍ଜିତ କରାଯାଇଥିବା ଦେଖିବାକୁ ମିଳିଥିଲା। ଗଞ୍ଜାମ ଜିଲ୍ଲାର ଅନ୍ୟତମ ପ୍ରସିଦ୍ଧ ଶକ୍ତିପୀଠ ରୂପେ ପରିଚିତ ଥିବା ପ୍ରତ୍ୟକ୍ଷ ଦେବୀ ମା କରଞ୍ଜେଇଙ୍କ ମନ୍ଦିରରେ ନବରାତ୍ରୀ ପୂଜା ଏକ ଆଧ୍ୟାତ୍ମିକ ପରିବେଶ ମଧ୍ୟରେ ଚାଲିଥିବା ଲକ୍ଷ୍ୟ କରାଯାଇଛି । ଏଥିପାଇଁ ମନ୍ଦିର ପରିସର ଚଳଚଞ୍ଚଳ ହୋଇଉଠିଛି । କଲ୍ୟାଣମୟୀ ମା କରଞ୍ଜେଇଙ୍କ ପୀଠରେ ନବରାତ୍ରୀ ଅବସରରେ ସ୍ୱତନ୍ତ୍ର ପୂଜାର୍ଚ୍ଚନା କରାଯାଉଥିବା ଦେଖିବାକୁ ମିଳୁଛି ।
