ମାଣିକେଶ୍ୱରୀ ବିଶ୍ୱବିଦ୍ୟାଳୟରେ ଖାଲି ପଡ଼ିଛି ଶିକ୍ଷକ ପଦବୀ

କଳାହାଣ୍ଡି, (ଚିତ୍ତରଞ୍ଜନ ବିଷି): କଳାହାଣ୍ଡିର ଉଚ୍ଚଶିକ୍ଷାର ପ୍ରମୁଖ ଆଶା ଭାବେ ଗଢ଼ିଉଠିଥିବା ମାଣିକେଶ୍ୱରୀ ବିଶ୍ୱବିଦ୍ୟାଳୟକୁ ନେଇ ଏବେ ଅନେକ ପ୍ରଶ୍ନ ଉଠୁଛି। ବିଶ୍ୱବିଦ୍ୟାଳୟର ବିକାଶ ପାଇଁ ସରକାରଙ୍କ ପକ୍ଷରୁ ଅର୍ଥ ବ୍ୟବସ୍ଥା ହେଉଥିବା ବେଳେ ଶିକ୍ଷକ ଅଭାବ, ଗବେଷଣା ସୁବିଧା, ଛାତ୍ରାବାସ, ଶ୍ରେଣୀଗୃହ, ପରୀକ୍ଷାଗାର ଓ କ୍ରୀଡ଼ା ଭିତ୍ତିଭୂମି ଭଳି ମୌଳିକ ପ୍ରସଙ୍ଗରେ ବିଶ୍ୱବିଦ୍ୟାଳୟ କେଉଁ ସ୍ଥିତିରେ ଅଛି, ତାହା ନେଇ ସ୍ପଷ୍ଟ ଚିତ୍ର ସାମ୍ନାକୁ ଆସିବା ଆବଶ୍ୟକ। ୨୦୨୫ ମସିହାରେ ଉପଲବ୍ଧ ତଥ୍ୟ ଅନୁସାରେ ବିଶ୍ୱବିଦ୍ୟାଳୟର ମଞ୍ଜୁରୀପ୍ରାପ୍ତ ଶିକ୍ଷକ ପଦବୀ ମଧ୍ୟରୁ ବହୁ ସଂଖ୍ୟକ ପଦବୀ ଖାଲି ଥିବା ଜଣାପଡ଼ିଥିଲା। ଏହି ପରିସ୍ଥିତିରେ ଗୋଟିଏ ବର୍ଷ ବିତିଯାଇଥିବା ବେଳେ ୨୦୨୬ ଅଗଷ୍ଟ ସୁଦ୍ଧା କେତେ ଶିକ୍ଷକ ପଦବୀ ପୂରଣ ହୋଇଛି ଏବଂ କେତେ ପଦବୀ ଏବେ ବି ଖାଲି ରହିଛି, ତାହା ସରକାର ସ୍ପଷ୍ଟ କରିବା ଆବଶ୍ୟକ। କେବଳ ନିଯୁକ୍ତି ବିଜ୍ଞପ୍ତି ପ୍ରକାଶ କଲେ ଛାତ୍ରଛାତ୍ରୀଙ୍କ ସମସ୍ୟାର ସମାଧାନ ହେବ ନାହିଁ। ନିଯୁକ୍ତି ପ୍ରକ୍ରିୟା କେବେ ଶେଷ ହେବ ଏବଂ ନିୟମିତ ଶିକ୍ଷକମାନେ କେବେ ଦାୟିତ୍ୱ ଗ୍ରହଣ କରିବେ, ତାହା ହିଁ ଏବେ ବଡ଼ ପ୍ରଶ୍ନ। କୋଟି କୋଟି ଟଙ୍କାର ଭିତ୍ତିଭୂମି, କାମର ସ୍ଥିତି କ’ଣ? ବିଶ୍ୱବିଦ୍ୟାଳୟର ଭିତ୍ତିଭୂମି ବିକାଶ ପାଇଁ ପୂର୍ବରୁ ସରକାରଙ୍କ ପକ୍ଷରୁ କୋଟି କୋଟି ଟଙ୍କାର ବ୍ୟବସ୍ଥା କରାଯାଇଛି। ଏହା ମଧ୍ୟରୁ କେତେ ଟଙ୍କା ମୁକ୍ତ ହୋଇଛି, କେତେ ଟଙ୍କା ଖର୍ଚ୍ଚ ହୋଇଛି ଏବଂ କେଉଁ କେଉଁ କାମ ସମ୍ପୂର୍ଣ୍ଣ ହୋଇଛି, ତାହାର ସମ୍ପୂର୍ଣ୍ଣ ହିସାବ ସାର୍ବଜନୀନ କରାଯିବା ଆବଶ୍ୟକ। ବିଶ୍ୱବିଦ୍ୟାଳୟର ନୂଆ ଏକାଡେମିକ୍ କୋଠା ଓ ଗବେଷଣାର୍ଥୀ ଛାତ୍ରାବାସ ପାଇଁ ପ୍ରାୟ ୧୦ କୋଟି ୪୧ ଲକ୍ଷ ଟଙ୍କାର ନିର୍ମାଣ କାମ ସମ୍ପର୍କିତ ଟେଣ୍ଡର ପ୍ରକ୍ରିୟା ହୋଇଥିବା ତଥ୍ୟ ମଧ୍ୟ ସାମ୍ନାକୁ ଆସିଛି। ଏହି କାମର ବର୍ତ୍ତମାନ ସ୍ଥିତି କ’ଣ? କାମ କେବେ ଆରମ୍ଭ ହେବ? କେବେ ଶେଷ ହେବ? ନିର୍ମାଣର ଗୁଣବତ୍ତା ଯାଞ୍ଚ କିଏ କରିବ? ଏସବୁ ପ୍ରଶ୍ନର ଉତ୍ତର ମଧ୍ୟ ଆବଶ୍ୟକ। ଗବେଷଣା ପାଇଁ ପର୍ଯ୍ୟାପ୍ତ ସୁବିଧା ଅଛି ତ? ବିଶ୍ୱବିଦ୍ୟାଳୟର ମୁଖ୍ୟ ଲକ୍ଷ୍ୟ କେବଳ ପାଠପଢ଼ା ନୁହେଁ; ଉଚ୍ଚଶିକ୍ଷା ସହିତ ଗବେଷଣାକୁ ମଧ୍ୟ ସୁଦୃଢ଼ କରିବା। କିନ୍ତୁ ଗବେଷଣାର୍ଥୀଙ୍କ ପାଇଁ ଆବଶ୍ୟକ ଆଧୁନିକ ପରୀକ୍ଷାଗାର, ପୁସ୍ତକାଳୟ, ଗବେଷଣା ଉପକରଣ ଓ ଅନ୍ୟାନ୍ୟ ସୁବିଧା କେତେ ଉପଲବ୍ଧ, ତାହା ନେଇ ମଧ୍ୟ ଆଲୋଚନା ଆବଶ୍ୟକ। ଗବେଷଣା ପାଇଁ ବାର୍ଷିକ କେତେ ଟଙ୍କା ଖର୍ଚ୍ଚ ହେଉଛି? କେତେଜଣ ଗବେଷକ ଏବେ କାର୍ଯ୍ୟରତ? କେତେଟି ଗବେଷଣା ପ୍ରକଳ୍ପ ଚାଲିଛି? ଉଚ୍ଚଶିକ୍ଷା ବିଭାଗ ଏହାର ତଥ୍ୟ ପ୍ରକାଶ କରିବ କି? ଛାତ୍ରାବାସ ଓ କ୍ରୀଡ଼ା ଭିତ୍ତିଭୂମି କେବେ ସୁଦୃଢ଼ ହେବ? ବିଶ୍ୱବିଦ୍ୟାଳୟରେ ଛାତ୍ରଛାତ୍ରୀଙ୍କ ସଂଖ୍ୟା ବଢ଼ୁଥିବା ବେଳେ ସେହି ଅନୁପାତରେ ଛାତ୍ରାବାସ ସୁବିଧା ରହିଛି କି ନାହିଁ, ତାହା ମଧ୍ୟ ଗୁରୁତ୍ୱପୂର୍ଣ୍ଣ ପ୍ରଶ୍ନ। ଦୂରଦୂରାନ୍ତରୁ ଆସୁଥିବା ଛାତ୍ରଛାତ୍ରୀଙ୍କ ପାଇଁ ପର୍ଯ୍ୟାପ୍ତ ଆବାସିକ ସୁବିଧା ନଥିଲେ ଉଚ୍ଚଶିକ୍ଷାର ସୁଯୋଗ ସୀମିତ ହୋଇପାରେ। ସେହିପରି ବିଶ୍ୱବିଦ୍ୟାଳୟରେ ଉନ୍ନତ କ୍ରୀଡ଼ା ଭିତ୍ତିଭୂମି ଓ ଏକ ସ୍ଥାୟୀ କ୍ରୀଡ଼ା ପରିସରର ଆବଶ୍ୟକତା ନେଇ ମଧ୍ୟ ପ୍ରଶ୍ନ ଉଠିଛି।
ମନ୍ତ୍ରୀଙ୍କୁ ସିଧା ପ୍ରଶ୍ନ ଏଭଳି ସ୍ଥିତିରେ ରାଜ୍ୟର ଉଚ୍ଚଶିକ୍ଷା ମନ୍ତ୍ରୀଙ୍କୁ କଳାହାଣ୍ଡିବାସୀଙ୍କ ପକ୍ଷରୁ କିଛି ସିଧାସଳଖ ପ୍ରଶ୍ନ ରହିଛି ୨୦୨୫ରେ ଖାଲି ଥିବା ଶିକ୍ଷକ ପଦବୀରୁ ୨୦୨୬ ଅଗଷ୍ଟ ସୁଦ୍ଧା କେତେ ପଦବୀ ପୂରଣ ହୋଇଛି? ଅବଶିଷ୍ଟ ପଦବୀଗୁଡ଼ିକ କେବେ ସୁଦ୍ଧା ପୂରଣ ହେବ? ବିଶ୍ୱବିଦ୍ୟାଳୟର ଭିତ୍ତିଭୂମି ପାଇଁ ମଞ୍ଜୁର ଅର୍ଥରୁ ଏପର୍ଯ୍ୟନ୍ତ କେତେ ଟଙ୍କା ଖର୍ଚ୍ଚ ହୋଇଛି? ନୂଆ ଏକାଡେମିକ୍ କୋଠା ଓ ଗବେଷଣାର୍ଥୀ ଛାତ୍ରାବାସ କେବେ ସମ୍ପୂର୍ଣ୍ଣ ହେବ? ବିଶ୍ୱବିଦ୍ୟାଳୟରେ ଆଧୁନିକ ପରୀକ୍ଷାଗାର, ପୁସ୍ତକାଳୟ ଓ ଗବେଷଣା ସୁବିଧା ବୃଦ୍ଧି ପାଇଁ ସରକାରଙ୍କ ଯୋଜନା କ’ଣ? ଛାତ୍ରଛାତ୍ରୀଙ୍କ ଚାହିଦା ଅନୁସାରେ ନୂଆ ଛାତ୍ରାବାସ ନିର୍ମାଣ କେବେ ହେବ? ବିଶ୍ୱବିଦ୍ୟାଳୟ ପାଇଁ ଆଧୁନିକ କ୍ରୀଡ଼ା ପରିସର ନିର୍ମାଣ ପାଇଁ ସରକାର କୌଣସି ନିର୍ଦ୍ଦିଷ୍ଟ ଅର୍ଥ ମଞ୍ଜୁର କରିଛନ୍ତି କି?ବିଶ୍ୱବିଦ୍ୟାଳୟର ସମସ୍ତ ନିର୍ମାଣ କାମର ଗୁଣବତ୍ତା ଯାଞ୍ଚ ଓ ଖର୍ଚ୍ଚର ସମ୍ପୂର୍ଣ୍ଣ ବିବରଣୀ ସାର୍ବଜନୀନ କରାଯିବ କି? ‘ମାତ୍ର ଘୋଷଣା ନୁହେଁ, ଆବଶ୍ୟକ ସମୟସୀମା’ କଳାହାଣ୍ଡିର ଛାତ୍ରଛାତ୍ରୀଙ୍କ ଭବିଷ୍ୟତ ସହ ଜଡ଼ିତ ଏହି ବିଶ୍ୱବିଦ୍ୟାଳୟକୁ କେବଳ ନୂଆ କୋଠା ନିର୍ମାଣରେ ସୀମିତ ନରଖି ଶିକ୍ଷକ, ଗବେଷଣା, ଗୁଣାତ୍ମକ ଶିକ୍ଷା, ଛାତ୍ରାବାସ, ପରୀକ୍ଷାଗାର, ପୁସ୍ତକାଳୟ ଓ କ୍ରୀଡ଼ା ସମସ୍ତ କ୍ଷେତ୍ରରେ ଏକ ସମନ୍ୱିତ ବିକାଶ ଯୋଜନା ଆବଶ୍ୟକ। ତେଣୁ ଉଚ୍ଚଶିକ୍ଷା ମନ୍ତ୍ରୀଙ୍କ ନିକଟରୁ କଳାହାଣ୍ଡିବାସୀଙ୍କ ଆଶା କେବଳ ଯୋଜନା ଓ ଘୋଷଣା ନୁହେଁ, କେଉଁ କାମ କେବେ ହେବ, କେତେ ଟଙ୍କା ଖର୍ଚ୍ଚ ହେବ ଓ ତାହାର ଦାୟିତ୍ୱ କାହାରଏହାର ସ୍ପଷ୍ଟ ସମୟସୀମା ସହ ଉତ୍ତର ଦିଆଯାଉ।