କୋଟିପତି ଫରେଷ୍ଟ ରେଞ୍ଜରଙ୍କୁ ଗିରଫ କଲା ଭିଜିଲାନ୍ସ

କଟକ, (ଓ୍ବାଇଏନଏସ): ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ କେନ୍ଦ୍ରାପଡ଼ା ବନାଞ୍ଚଳର ଫରେଷ୍ଟ ରେଞ୍ଜର ରବୀନ୍ଦ୍ର କୁମାର ନାୟକଙ୍କୁ ଓଡ଼ିଶା ଭିଜିଲାନ୍ସ ଗିରଫ କରିଛି। ଭିଜିଲାନ୍ସ ପକ୍ଷରୁ ରବୀନ୍ଦ୍ର କୁମାର ନାୟକଙ୍କ ବିଭିନ୍ନ ସ୍ଥାନରେ ଚଢ଼ାଉ କରାଯାଇଥିବା ବେଳେ ତାଙ୍କ ନିକଟରୁ ବିପୁଳ ପରିମାଣର ଆୟ ବହିର୍ଭୂତ ସମ୍ପତ୍ତି ଠାବ କରାଯାଇଛି। ସେଥିରେ ୨ଟି ଘର, ଯାହା ମଧ୍ୟରୁ ଗୋଟିଏ ୭,୦୩୮ ବର୍ଗଫୁଟ୍ ବିଶିଷ୍ଟ ଚାରି ମହଲା ବିଳାସପୂର୍ଣ୍ଣ ଭବନ, ୬ଟି ଦାମୀ ପ୍ଲଟ୍, ୨୮୩ ଗ୍ରାମ ସୁନା, ୨.୧୪ ଲକ୍ଷ ନଗଦ ଟଙ୍କା , ୭୬ ଲକ୍ଷ ଟଙ୍କାର ବ୍ୟାଙ୍କ ଜମା ଏବଂ ଗୋଟିଏ ଚାରି ଚକିଆ ଗାଡ଼ି ସାମିଲ ରହିଛି। ଯାହାକୁ ସେ ସଠିକ୍ ଭାବରେ ବ୍ୟାଖ୍ୟା କରିପାରି ନଥିଲେ। ଦୁର୍ନୀତି ନିବାରଣ ଆଇନ, ୨୦୧୮ ଅନୁଯାୟୀ କଟକ ଭିଜିଲାନ୍ସ ପିଏସ୍ ମାମଲା ନଂ.୨୫/୨୦୨୬ କେନ୍ଦ୍ରାପଡା ଫରେଷ୍ଟ ରେଞ୍ଜର ଶ୍ରୀ ରବିନ୍ଦ୍ର କୁମାର ନାୟକଙ୍କ ବିରୁଦ୍ଧରେ ମାମଲା ରୁଜୁ କରାଯାଇଛି।ସୂଚନାନୁଯାୟୀ, କେନ୍ଦ୍ରାପଡ଼ା ଫରେଷ୍ଟ ରେଞ୍ଜର ରବୀନ୍ଦ୍ର କୁମାର ନାୟକ ଭିଜିଲାନ୍ସ ଜାଲରେ ଫଶିଛନ୍ତି। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ତାଙ୍କ ବିଭିନ୍ନ ସ୍ଥାନରେ ଥିବା ଘରେ ଭିଜିଲାନ୍ସ ଚଢ଼ଉ କରିଥିଲା। କଟକ ଜିଲା ବାରଙ୍ଗ ଥାନା ଅନ୍ତର୍ଗତ ମୁଣ୍ଡଳିରେ ୭୦୩୮ ବର୍ଗ ଫୁଟ୍ ଜମିରେ ତାଙ୍କର ଏକ ୪ ମହଲା କୋଠା ଠାବ ହୋଇଛି। ସେହିପରି ବାଙ୍କୀରେ ଆଉ ଏକ କୋଠା ଥିବା ଭିଜିଲାନ୍ସ ଜାଣିବାକୁ ପାଇଛି। ଏହାସହ କଟକ ଜିଲା ବାରଙ୍ଗରେ ୬ଟି ମୂଲ୍ୟବାନ ଜମି ରହିଥିବାବେଳେ ତାଙ୍କ ଘରୁ ନଗଦ ଦୁଇ ଲକ୍ଷ ୧୪ ହଜାର ଟଙ୍କା ଜବତ କରାଯାଇଛି। ସେହିପରି ବ୍ୟାଙ୍କରେ ୭୩ ଲକ୍ଷ ଟଙ୍କା ରହିଛି। ଏହାସହ ତାଙ୍କ ଘରୁ ବହୁ ପରିମାଣର ସୁନାଗହଣା ଜବତ କରାଯାଇଛି। ଘରେ କେବଳ ୧୮ ଲକ୍ଷ ଟଙ୍କାର ସୌଖୀନ ଜିନିଷ ରଖିଛନ୍ତି। ତାଙ୍କ ପାଖରେ ଏକ ଦାମୀ କାର ରହିଛି। ସେ ୧୯୮୮ ମସିହାରେ ମାତ୍ର ଏକ ହଜାର ଟଙ୍କାରେ ଚାକିରି ଜୀବନ ଆରମ୍ଭ କରିଥିଲେ। ୨୦୨୧ ମସିହାରେ ସେ ରେଞ୍ଜର ପଦକୁ ପଦୋନ୍ନତି ପାଇଥିଲେ। ସରକାରୀ ଚାକିରି କାଳ ମଧ୍ୟରେ କିପରି ବହୁ କୋଟି ଟଙ୍କାର ମାଲିକ ହୋଇଗଲେ ତାହାକୁ ନେଇ ଭିଜିଲାନ୍ସ ଅଧିକାରୀମାନେ ତାଙ୍କୁ ପ୍ରଶ୍ନ କରିଛନ୍ତି। ତାଙ୍କ ଚାକିରି କାଳ ମଧ୍ୟରେ ସେ ବାଲୁଗାଁ ବନଖଣ୍ଡ, ଚନ୍ଦକା ବନଖଣ୍ଡ, ଭୁବନେଶ୍ବର ବନଖଣ୍ଡ, ମହାନଦୀ ବନଖଣ୍ଡ, ନୟାଗଡ଼ ବନଖଣ୍ଡ ଇତ୍ୟାଦି କାର୍ଯ୍ୟାଳୟରେ କାର୍ଯ୍ୟ କରିଛନ୍ତି; କିନ୍ତୁ ଏହି ସମୟ ମଧ୍ୟରେ ସେ କୋଟି କୋଟି ଟଙ୍କାର ଆୟ ବହିର୍ଭୂତ ସମ୍ପତ୍ତି ଠୁଳ କରିଥିଲେ। ସର୍ଚ୍ଚ ୱାରେଣ୍ଟ ବଳରେ ତାଙ୍କ ଗ୍ରାମରେ ଥିବା ଘର, ମୁଣ୍ଡଳିରେ ଥିବା ୪ ମହଲା ଘରେ ଚଢ଼ଉ ହୋଇଛି। ଏହାସହ କେନ୍ଦ୍ରାପଡ଼ା କାର୍ଯ୍ୟାଳୟରେ ମଧ୍ୟ ଚଢ଼ଉ କରାଯାଇଛି। ଆୟ ବହିର୍ଭୂତ ସମ୍ପତ୍ତି ଠାବ ହେବା ପରେ ଭିଜିଲାନ୍ସ ତାଙ୍କୁ ଗିରଫ କରି କଟକ ଭିଜିଲାନ୍ସ ଏସପିଙ୍କ କାର୍ଯ୍ୟାଳୟକୁ ନେଇଯାଇଛି। ତାଙ୍କ ଠାରୁ ଆହୁରି ଅଧିକ ଆୟ ବହିର୍ଭୂତ ସମ୍ପତ୍ତି ଠାବ ହେବାର ସମ୍ଭାବନା ରହିଛି ବୋଲି ଭିଜିଲାନ୍ସ ପକ୍ଷରୁ କୁହାଯାଇଛି। ଏହି ଚଢ଼ଉରେ ୫ ଜଣ ଡିଏସପି, ୯ ଜଣ ଇନ୍ସପେକ୍ଟର, ୫ ଜଣ ଏଏସଆଇ ଓ ଅନ୍ୟ ଅଧିକାରୀ ସାମିଲ ହୋଇଥିଲେ।