ଉଦ୍ଯାପିତ ହେଲା ରାଜ୍ୟସ୍ତରୀୟ କବ୍ ବୁଲ୍ବୁଲ୍ ଉତ୍ସବ
ଭୁବନେଶ୍ୱର, (ଯୁଗାବ୍ଦ ନ୍ୟୁଜ):ଓଡ଼ିଶା ରାଜ୍ୟ ଭାରତ ସ୍କାଉଟସ୍ ଓ ଗାଇଡ଼ସ୍ ଦ୍ୱାରା ଗତ ୧୮.୧୧.୨୦୨୪ ତାରିଖରୁ ଆରମ୍ଭ ହୋଇଥିବା “ରାଜ୍ୟ ସ୍ତରୀୟ କବ୍ ବୁଲ୍ବୁଲ୍ ଉତ୍ସବ” ଆଜି ସଂଧ୍ୟାରେ ଉଦ୍ଯାପିତ ହୋଇଅଛି । ରାଜ୍ୟ ମୁଖ୍ୟ କମିଶନର ତଥା ଜାତୀୟ ଉପସଭାପତି ଡଃ କାଳି ପ୍ରସାଦ ମିଶ୍ରଙ୍କ ସଭାପତିତ୍ୱରେ ଅନୁଷ୍ଠିତ ଉକ୍ତ ଉତ୍ସବରେ ମୁଖ୍ୟ ଅତିଥି ଭାବେ ଶ୍ରୀ ବାବୁ ସିଂହ, ମାନ୍ୟବର ବିଧାୟକ (ଏକାମ୍ର ଭୁବନେଶ୍ୱର), ସମ୍ମାନିତ ଅତିଥି ଭାବେ ଭାରତ ସ୍କାଉଟ୍ ଓ ଗାଇଡ଼୍ର ରାଜ୍ୟ କମିଶନର ଶ୍ରୀ ଦାଶରଥୀ ଶତପଥୀ ଏବଂ ରାଜ୍ୟ କମିଶନର ଶ୍ରୀ ଅଶୋକ କୁମାର ରଥ ଯୋଗଦେଇ ଏହି ଶିବିର ପିଲାମାନଙ୍କର ବ୍ୟକ୍ତିତ୍ୱ ଏବଂ ପାଠପଢ଼ା ଉପରେ କିପରି ସୁପ୍ରବାହ ପକାଇଥାଏ କହିଥିଲେ । ଉକ୍ତ ଉତ୍ସବର ବିଭିନ୍ନ ଦିବସରେ ଅନୁଷ୍ଠିତ ହୋଇଥିବା କାର୍ଯ୍ୟକ୍ରମ ଯଥା ପେପର କ୍ରାଫ୍ଟ, ମୀନା ବଜାର୍, ଦଳଗତ ନୃତ୍ୟ, ଯୋଗ, ବକ୍ତୃତା, ବ୍ୟାୟାମ ପ୍ରଦର୍ଶନ, କ୍ୟାମ୍ପ ଫାୟାର ଏବଂ କୌତୁକ ଖେଳ ପ୍ରଭୃତି ପ୍ରତିଯୋଗିତାରେ ଭାଗ ନେଇ କୃତିତ୍ୱ ହାସଲ କରିଥିଲେ । ଉଦ୍ଯାପନୀ ଦିବସରେ ରାଜ୍ୟ ସଂଗଠନ କମିଶନର ଶ୍ରୀମତୀ ଅନାମିକା ଦାସ ଅତିଥି ମାନଙ୍କର ପରିଚୟ ପ୍ରଦାନ କରି କ୍ୟାମ୍ପ ବିବରଣୀ କହିଥିଲେ । ସଭାକାର୍ଯ୍ୟ ଶେଷରେ କବ୍ ବୁଲ୍ବୁଲ୍ ଉତ୍ସବରେ ଅନୁଷ୍ଠିତ ହୋଇଥିବା ବିଭିନ୍ନ ପ୍ରତିଯୋଗିତାରେ କୃତିତ୍ୱ ହାସଲ କରିଥିବା ଜିଲ୍ଲା ଏବଂ କବ୍ ବୁଲ୍ବୁଲ୍ମାନଙ୍କୁ ମୁଖ୍ୟ ଅତିଥିଙ୍କ ଦ୍ୱାରା ମାନପତ୍ର ଓ ଫଳକ ପୁରସ୍କୃତ କରାଯାଇଥିଲା । ଶେଷରେ ରାଜ୍ୟ ସମ୍ପାଦକ ଶ୍ରୀ ଶରତ ଚନ୍ଦ୍ର ପାଇକରାୟ ଧନ୍ୟବାଦ ଅର୍ପଣ କରିଥିଲେ ।
