କରୋନା ଭୟରେ ଲୋକେ ସହର ଛାଡି ଗାଁ ମୁହାଁ ,ଗାଁରେ ସେମାନଙ୍କ ପାଇଁ ଚିନ୍ତା

ନାଉଗାଁ,(ଯୁଗାବ୍ଦ ନ୍ୟୁଜ): ସାରା ବିଶ୍ୱରେ ଦିନକୁ ଦିନ କରୋନା ଭୂତାଣୁ କାୟା ବିସ୍ତାର କରିବାରେ ଲାଗିଛି । ଏହି ଭୁତାଣୁ ସଂକ୍ରମଣକୁ ରୋକିବା ଲାଗି ଦେଶବ୍ୟାପୀ ଲକ୍ ଡାଉନ୍ ଜାରୀ ହୋଇଛି । ରାଜ୍ୟ ବାହାରୁ ବହୁ ଲୋକ ବିଭିନ୍ନ ଉପାୟରେ ଗାଁକୁ ଆସିବା ପରେ ଗାଁ ଲୋକଙ୍କ ମଧ୍ୟରେ ଭୟ ସୃଷ୍ଟି ହୋଇଥିଲା । କିନ୍ତୁ ଏବେ ଓଡିଶାର ମୁଖ୍ୟ ସହର କଟକ ଓ ଭୁବନେଶ୍ୱର ଆଦି ସ୍ଥାନରେ କରୋନା ସଂକ୍ରମିତ ଚିହ୍ନଟ ହେବା ପରେ ସହରରେ ଥିବା ଲୋକମାନେ ଏବେ ଗାଁ ମୁହାଁ ହେଉଥିବା ଜଣାଯାଇଛି । ସେମାନଙ୍କ ପାଇଁ ଗାଁ ଲୋକଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି । ଯେଉଁମାନେ ଗାଁକୁ ଆସୁଛନ୍ତି ସେମାନେ ନିଜ ଘରେ ନ ରହି ହାଟ ବଜାର ଆଦିରେ ବୁଲୁଛନ୍ତି । ଯାହାକୁ ନେଇ ଅଧିକାଂଶ ଗାଁର ଯୁବ ଗୋଷ୍ଠୀ ସେମାନଙ୍କୁ ଗାଁରେ ପୁରାଇ ନଦେବା ପାଇଁ ଗାଁର ମୁଖ୍ୟରାସ୍ତାରେ ବାଉଁଶ ବାଡା ପକାଇ ରାସ୍ତାକୁ ବନ୍ଦ ରଖିଥିବା ଜଣାଯାଇଛି । ଏପରିକି ଏହାକୁ ନେଇ ମଧ୍ୟ ଅନେକ ସ୍ଥାନରେ ଉତେଜନା ପ୍ରକାଶ ପାଉଥିବା ଦେଖିବାକୁ ମିଳୁଛି । ସୂଚନା ମୁତାବକ ନାଉଗାଁ ବ୍ଲକର ଥିବା ବିଭିନ୍ନ ପଂଚାୟତର ଲୋକ କଟକ, ଭୁବନେଶ୍ୱର, ପୁରୀ ଆଦି ସ୍ଥାନରେ ରହୁଛନ୍ତି । ଭୁବନେଶ୍ୱର ଓ କଟକ ଆଦି ସ୍ଥାନରେ କରୋନା ସଂକ୍ରମଣ ଚିହ୍ନଟ ହୋଇଛି । ଫଳରେ ସେଠାରେ ଥିବା ଲୋକମାନେ ପ୍ରତ୍ୟେକ ଦିନ ପରିବାର ସମେତ ଉକ୍ତ ସହର ଛାଡି ଗାଁ ଆଡକୁ ମୁହାଁଉ ଥିବା ଦେଖିବାକୁ ମିଳୁଛି । ସେମାନେ ଗାଁକୁ ଆସିବା ପରେ ଗାଁରେ ଥିବା ଲୋକଙ୍କର ଚିନ୍ତା ବଢି ଯାଇଛି । ସେମାନଙ୍କୁ ଗାଁରେ ପୁରାଇ ନଦେବା ପାଇଁ ମଧ୍ୟ ଗ୍ରାମବାସୀଙ୍କ ପକ୍ଷରୁ ବିରୋଧ କରାଯାଉଛି । ଏହାକୁ ନେଇ ଅନେକ ଗ୍ରାମରେ ଉତେଜନା ମଧ୍ୟ ସୃଷ୍ଟି ହେଉଥିବାଦେଖାଯାଉଛି । ଅନ୍ୟପଟରେ ପୋଲିସ ପ୍ରଶାସନ ପକ୍ଷରୁ ଜିଲ୍ଲାର ସିମାରେ ପୋଲିସ କ୍ୟାମ୍ପ କରାଯାଇ ଜୋରଦାର ଚେକିଂ ଚାଲିଛି । ଏମିତି କି କୌଣସି ଲୋକ ଜିଲ୍ଲା ବାହାରକୁ ଯିବାକୁ ହେଲେ ବିନା ପାସରେ ବାହାରି ପାରିବେ ନାହଁ ବୋଲି ମଧ୍ୟ ପ୍ରଶାସନ ପକ୍ଷରୁ ସୂଚନା ଦିଆଯାଇଛି । ହେଲେ କଟକ ଓ ଭୁବନେଶ୍ୱର ଆଦି ସ୍ଥାନରୁ ପ୍ରତିଦିନ ନାଉଗାଁ ଅଂଚଳକୁ ଅଧିକାଂଶ ଲୋକ ଆସୁଥିବା ଜଣାଯାଉଛି । ଉକ୍ତ ଲୋକମାନେ କିପରି ଜିଲ୍ଲା ପାରି ହୋଇ ଅନ୍ୟ ଜିଲ୍ଲାକୁ ଆସୁଛନ୍ତି ଯାହାକୁ ନେଇ ପୋଲିସର କାର୍ଯ୍ୟକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ତେଣୁ ଏହି ବ୍ଲକର ପ୍ରତ୍ୟେକ ଗ୍ରାମବାସୀଙ୍କ ସୁରକ୍ଷାକୁ ଦୃଷ୍ଟିରେ ରଖି ଏହି ବ୍ଲକରେ ଥିବା ସମସ୍ତ ସିମାରେ ପୋଲିସ ପକ୍ଷରୁ ୨୪ ଘଂଟିଆ କଡା ସୁରକ୍ଷା ଯୋଗାଇ ଦେବାକୁ ନାଉଗାଁର ବିଭିନ୍ନ ସଂଗଠନ ପକ୍ଷରୁ ଦାବି ହେଉଛି ।