କେଳୁଣି ମୁହାଁଣ ସୃଷ୍ଟି କରିଛି ପର୍ଯ୍ୟଟନର ନୂଆ ସମ୍ଭାବନା

ନିମାପଡ଼ା, (ସନ୍ତୋଷ ଦାଶ):ପୁଣ୍ୟତୋୟା ପ୍ରାଚୀନଦୀ ଅବବାହିକା ଉତ୍କଳର ଧର୍ମଧାରଣା ଓ ସାଂସ୍କୃତିକ ଚେତନାର ମୂଳପିଣ୍ଡ। ପୁରୀ ଜିଲ୍ଲା ଅସ୍ତରଙ୍ଗ ବେଳାଭୂମିସ୍ଥ ଡ଼ାଳୁଅକଣି ଗ୍ରାମର ସାଗର ସଙ୍ଗମ ସ୍ଥଳ ରେ ପୂଜା ପାଇ ଆସୁଥିବା ଗୋମୁଖି କେଶବ ହେଉଛନ୍ତି ପ୍ରାଚୀ ତଟର ଅନ୍ତିମ ମାଧବ। ଏ କ୍ଷେତ୍ରର ଶମ୍ଭୁ ହେଉଛନ୍ତି ମୁକ୍ତେଶ୍ଵର (ବେଲେଶ୍ୱର) , ଶକ୍ତି ହେଉଛନ୍ତି ମା”ଅମ୍ବିକା (ମା” କେଳୁଣି ଠାକୁରାଣୀ)। ପ୍ରାଚୀ, ଚିତ୍ରୋପ୍ତଳା(କାଦୁଆ) ଓ ଦେବୀ ନଦୀର ଏକ ଅମୃତ ଧାରା ଏହି ତୀର୍ଥରେ ସମ୍ମିଳିତ ହୋଇଥିବାରୁଏହି ପାବନ କ୍ଷେତ୍ର କେଳୁଣି ମୁହାଁଣ ସାଗର ସଙ୍ଗମ ତ୍ରିବେଣୀ ତୀର୍ଥର ନାମ ପାଇଛି। ଏଠାକୁ ବର୍ଷର ସବୁ ସମୟରେ ପର୍ଯ୍ୟଟକ ଓ ଶ୍ରଦ୍ଧାଳୁଙ୍କ ଆତଯାତ ଲାଗିରହିଥାଏ। ପ୍ରାକୃତିକ ସୌନ୍ଦର୍ଯ୍ୟରେ ଭରପୁର ଅସ୍ତରଙ୍ଗର ଏହି କେଳୁଣି ମୁହାଁଣ ପର୍ଯ୍ୟଟନ ଋତୁରେ ପର୍ଯ୍ୟଟକଙ୍କ ପସନ୍ଦ ପାଲଟିଛି। ପର୍ଯ୍ୟଟନ ଲାଗି ପ୍ରସିଦ୍ଧି ଲାଭ କରିନଥିଲେ ମଧ୍ୟ କେଳୁଣି ମୁହାଁଣ ଅଞ୍ଚଳ ପର୍ଯ୍ୟଟନର ଯଥେଷ୍ଟ ସମ୍ଭାବନା ସୃଷ୍ଟି କରୁଛି। ମୁହାଁଣ ସଂଲଗ୍ନ ବେଳାଭୂମିକୁ ଡଙ୍ଗାରେ ପାର ହୋଇ ପର୍ଯ୍ୟଟକ ମାନେ ଭୋଜିଭାତ ର ମଜା ଉଠାଉଛନ୍ତି।ମୁହାଁଣ ସଂଲଗ୍ନ ନଦୀରେ ଡଙ୍ଗାରେ ବୁଲିବାର ଅନୁଭୂତି ସହ ଘଞ୍ଚ ହେନ୍ତାଳ ଜଙ୍ଗଲର ପ୍ରାକୃତିକ ପରିବେଶ ପର୍ଯ୍ୟଟକଙ୍କୁ ବିମୋହିତ କରୁଛି। ବର୍ଷର ସବୁ ସମୟରେ ମୁହାଁଣ ଆଖ ପାଖରେ ବିଭିନ୍ନ ପ୍ରଜାତିର ବହିରାଗତ ପକ୍ଷୀମାନଙ୍କ ସମାବେଶ ପର୍ଯ୍ୟଟକଙ୍କ ପାଇଁ ଅନ୍ୟତମ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି। ଜୈବ ବିବିଧତାରେ ପରିପୂର୍ଣ ଏହି ମୁହାଁଣ ଅଞ୍ଚଳରେ ବିଭିନ୍ନ ପ୍ରଜାତିର ରଙ୍ଗବେରଙ୍ଗର କଙ୍କଡା , ବିରଳ ଏକ୍ଟପାସ , ମଡସ୍କିପର ଓ ଡଲଫିନଙ୍କ ଜଳକ୍ରୀଡା ଦୂରଦୂରାନ୍ତରୁ ଆସୁଥବା ପର୍ଯ୍ୟଟକଙ୍କୁ ଅନନ୍ୟ ଅନୁଭୂତି ପରସୁଛି। କୋଣାର୍କ ଓ ଅସ୍ତରଙ୍ଗ ମଧ୍ୟଭାଗ ସମୁଦ୍ର ସଲଗ୍ନ ନୈସର୍ଗିକ ପ୍ରାକୃତିକ ଭିତ୍ତିଭୂମିରେ ଭରା ଏହି ମୁହାଁଣ ଅଞ୍ଚଳ ଆଗାମୀ ଦିନ ପାଇଁ ପର୍ଯ୍ୟଟନ କ୍ଷେତ୍ରରେ ଏକ ବଡ ସମ୍ଭାବନା ସୃଷ୍ଟି କରିବ ବୋଲି ପରିବେଶବିତ୍ ମାନେ ମତ ଦେଇଛନ୍ତି।ତେବେ ସରକାର ଙ୍କ ପର୍ଯ୍ୟଟନ ବିଭାଗ, ସ୍ଥାନୀୟ ବ୍ଲକ ପ୍ରଶାସନ ଏହି ସ୍ଥାନ ରେ ଯାତ୍ରୀ, ପର୍ଯ୍ୟଟକ ମାନଙ୍କ ପାଇଁ ବିଭିନ୍ନ ମୌଳିକ ସୁବିଧା ଉପଲବ୍ଧ କରାଇପାରିଲେ ଏଠାକୁ ବର୍ଷ ସାରା ପର୍ଯ୍ୟଟକ ମାନଙ୍କ ସୁଅ ଛୁଟନ୍ତା। ପୁରୁଷ ମହିଳା ମାନଙ୍କ ପାଇଁ ଅଲଗା ଅଲଗା ଶୌଚାଳୟ, ନଦୀ ରେ ବୋଟିଙ୍ଗ ର ସୁ ବ୍ୟବସ୍ଥା କରାଗଲେ ଏଠାକୁ ବର୍ଷସାରା ଯାତ୍ରୀ, ପର୍ଯ୍ୟଟକ ମାନେ ବୁଲିବାକୁ ଆସିବାକୁ ଇଛା ପ୍ରକାଶ କରନ୍ତେ। ଯାହା ଫଳରେ ସ୍ଥାନୀୟ ଲୋକମାନେ ବି ବିଭିନ୍ନ ଉପାୟ କରି କିଛି କିଛି ରୋଜଗାର କରି ନିଜ ଆର୍ଥିକ ମାନଦଣ୍ଡ କୁ ସୁଦୃଢ କରିପାରନ୍ତେ। ପୁରୀ ଜିଲ୍ଲା ଅସ୍ତରଙ୍ଗ ବ୍ଲକ ର କେଳୁଣି ମୁହାଁଣ ଏକ ପ୍ରସିଦ୍ଧ ପର୍ଯ୍ୟଟନସ୍ଥଳୀ ଭାବେ ପରିଚିତ ହୋଇ ପାରନ୍ତା ଏଥିରେ ସନ୍ଧେହ ନାହିଁ। ସ୍ଥାନୀୟ ବିଧାୟକ ତଥା ରାଜ୍ୟ ଗୃହ ରାଷ୍ଟ୍ର ମନ୍ତ୍ରୀ ତୁଷାର କାନ୍ତି ବେହେରା ଏ ଦିଗରେ ଦୃଷ୍ଟି ଦେଇ ଆବଶ୍ୟକୀୟ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହେଉଛି।