ଚାଷୀଙ୍କ ଉପରେ ଦାଉ ସାଜୁଛି ପ୍ରକୃତି ବର୍ଷା

ନାଉଗାଁ,:ଚାଷୀଙ୍କ ଉପରେ ଦାଉ ସାଜୁଛି ପ୍ରକୃତି । ୧୫ ଦିନ ତଳେ ଲଘୁଚାପଜନୀତ ବର୍ଷାରେ ଚାଷୀଙ୍କ ଧାନ ଓ ରବି ଫସଲ ନଷ୍ଟ ହୋଇଥିବା ବେଳେ ପୁଣି ଏକ ଘୂର୍ଣ୍ଣିବଳ ବୁଲୁ ବୁଲୁ ବାତ୍ୟା ଆସିବାରୁ ବର୍ଷା ଓ ପବନରେ ଧାନ ଓ ରବି ଫସଲ ନଷ୍ଟ ହୋଇଛି । ଯାହାକି ଜଗତସିଂହପୁର ଜିଲ୍ଲା ନାଉଗାଁ ବ୍ଲକର ଚାଷୀଙ୍କ ମୁଣ୍ଡରେ ଚଡକ ପଡିଛି । ଗତ ଅକ୍ଟୋବର ମାସ ଶେଷ ଆଡକୁ ବଙ୍ଗୋପସାଗରରେ ଘୂର୍ଣ୍ଣବଳୟ ସୃଷ୍ଟି ହୋଇଥିଲା । ଏହାର ପ୍ରଭାବରେ ଲଗାଣ ବର୍ଷା ଚାଷ ଜମି ପାଣି ଜମି ରହିଥିଲା । ଏହି ବର୍ଷାରେ ଲଘୁ ଜାତୀୟ ଧାନ ବିଶେଷ ଭାବେ ପ୍ରଭାବିତ ହୋଇଥିବା ଜଣାଯାଇଥିଲା । କୃଷି ବିଭାଗର ତଥ୍ୟ ଅନୁସାରେ ଚଳିବର୍ଷ ଶିଖର, ଡେରିକି, ଓଷକଣା, ବଛାଳୋ, କୋରୁଅ, ଗଳଦାରୀ, ତିରୁଣା ଆଦି ପଂଚାୟତରେ ୨ ଶହରୁ ଉର୍ଦ୍ଧ ହେକ୍ଟର ଚାଷ ଜମିରେ ଲଘୁ ଜାତୀୟ ଧାନ ଚାଷ କରାଯାଇଥିଲା । ଏହି ଜାତୀୟ ଧାନ ସାଧାରଣତଃ ଅକ୍ଟୋବର ମାସରେ ପାଚି ଥିବାରୁ ଅନେକ ଚାଷୀ ଧାନ କାଟି କିଆରିରେ ଅମଳ ପାଇଁ ପକାଇଥିଲେ । ହେଲେ ଲଗାଣ ବର୍ଷା ଯୋଗୁଁ ଧାନ କିଆରିରେ ପାଣି ଜମି ରହିବା ହେତୁ ଧାନ ପଚି ଯାଇଥିବା ଦେଖିବାକୁ ମିଳିଥିଲା । ଯାହାଫଳରେ ଚାଷୀ ଚିନ୍ତାରେ ରହିଥିଲା ।ଏହା ର ୧୫ ଦିନ ଯାଇଛି କି ପୁଣି ଏକ ଘୁର୍ଣ୍ଣବଳୟ ବୁଲୁବୁଲୁ ବାତ୍ୟା ଯୋଗୁଁ ଗତ ଶୁକ୍ରବାର ଠାରୁ ଲଗାଣ ବର୍ଷା ଲାଗି ରହିଛି । ଏହି ୨ ଦିନ ହେବ ତୁହାକୁ ତୁହା ବର୍ଷା ଯୋଗୁଁ ବ୍ଳକର ତଳିଆ ଅଂଚଳ ଜଳମଗ୍ନ ହୋଇଥିବା ଦେଖାଦେଇଛି । ବ୍ଳକରେ ଶୁକ୍ରବାର ଦିନ ୪୦ ମିଲିମିଟର ବର୍ଷା ହୋଇଥିବା ବ୍ଳକ ପ୍ରଶାସନ କାର୍ଯ୍ୟାଳୟରୁ ଜଣାଯାଇଛି । ଏହି ବର୍ଷାରେ ଧାନ ଫସଲ ବିଶେଷ ଭାବେ ପ୍ରଭାବିତ ହୋଇଛି । ବ୍ଳକର ସମୁଦାୟ ୭ ଶହ ହେକ୍ଟର ଚାଷ ଜମିରେ ଶାରଦ ଜାତୀୟ ଧାନ ଚାଷ କରାଯାଇଛି । ଶାରଦ ଧାନ ଗୁଡିକ ମଧ୍ୟରୁ ୭୫ ଭାଗ ଧାନ ପାଚି ଯାଇଥିବା ବେଳେ ଅନେକ ଧାନ ଥୋଡ ବାହାରୁଥିଲା । ପବନ ଯୋଗୁଁ ଧାନ ଜମିରେ ଶୋଇ ପଡିବା ବେଳେ ବର୍ଷା ପାଣି ମାଡି ରହିଛି । ଯାହାଫଳରେ ପାଚିଲା ଧାନ ଗୁଡିକ ନଷ୍ଟ ହେବାର ବହୁତ ସମ୍ଭାବନା ଦେଖାଦେଇଛି । ଚାଷ ଜମିରୁ ଜଳ ନିଷ୍କାସନର ସୁବିଧା ନଥିବାରୁ ଧାନ ପଚି ଯିବାର ଆଶଙ୍କା ରହିଛି । ଯେଉଁ ଧାନ ଗୁଡିକ ଫୁଲ ବାହାରୁ ଥିଲା ପବନ ଓ ବର୍ଷା ଯୋଗୁଁ ଥୋଡ ଧାନ ମଧ୍ୟ ନଷ୍ଟ ହୋଇଛି । ଯାହାଫଳରେ ଚାଷୀ ଚିନ୍ତାରେ ରହିଛି । ଟଙ୍କା ଖର୍ଚ୍ଚ କରି ଧାନ ଚାଷ କରିଥିବା ବେଳେ ବର୍ଷା ଚାଷକୁ ଉଜାଡିବାକୁ ବସିଛି । ଧାର ଉଧାର କରି ଆଣିଥିବା ଟଙ୍କା ଚାଷୀ କିପରି ସୁଝିବା ତାହା ଚାଷୀକୁ ସମସ୍ୟାରେ ପକାଇଛି । ସେହିପରି ଡେରିକି,ତିରୁଣା ଜାମୁଗାଁ ଆଦି ପଂଚାୟତରେ ସାଧାରଣତଃ ବିରି ଛଟା ହୋଇଥାଏ । ତେଣୁ ଅଧିକାଂଶ ଚାଷି ଜମିରେ ବିରି ମଂଜି ପକାଇ ସାରିଥିଲେ । ବିରି ଗଛ ବାହାରି ଯାଇଥିବା ବେଳେ ଅକ୍ଟୋବର ମାସ ଶେଷ ଆଡୁକୁ ହୋଇଥିବା ବର୍ଷାରେ ତାହା ନଷ୍ଟ ହୋଇଯାଇଥିଲା । ପରେ ଚାଷୀମାନେ ଧାର ଉଧାର କରି ପୂର୍ଣ୍ଣବାର ବିରି ମଂଜି ଆଣି ବିଲରେ ପକାଇଥିଲେ । ଯାହା ଏବେ ହୋଇଥିବା ବର୍ଷାରେ ଉକ୍ତ ବିରି ଗଛ ବୁଡିବା ରହିବା ହେତୁ ତାହା ପଚି ଯିବାର ସମ୍ଭାବନା ଥିବା ଚାଷୀମାନେ ମତବ୍ୟକ୍ତ କରିଛନ୍ତି । ତେଣୁ ବର୍ଷାରେ କ୍ଷତି ହୋଇଥିବା ଧାନ ଓ ବିରି ଫସଲର ତଦନ୍ତ କରାଯାଇ ଚାଷୀକୁ କ୍ଷତି ପୁରଣ ଦେବା ପାଇଁ ଚାଷୀ ଓ ନବନିର୍ମାଣ କୃଷକ ସଂଗଠନର ଜିଲ୍ଲା ସହ ସଂଯୋଜକ ଅଶୋକ ସ୍ୱାଇଁ, ସମାଜସେବୀ ଅଶୋକ ମହାନ୍ତି, ସୁବାଷ ସ୍ୱାଇଁ, ନିଗମାନନ୍ଦ ପରିଡା, ଫେଲୁ ପରିଡା ପ୍ରମୁଖ ଦାବି କରିଛନ୍ତି ।