ଚୋରି ହୋଇଥିବା ବାଇକ କଲର୍ଭଟ ତଳୁ ଉଦ୍ଧାର
ନାଉଗାଁ,(ୱାଇଏନ୍ଏସ୍): ନାଉଗାଁ ବ୍ଲକ ଅନ୍ତର୍ଗତ ଜାମୁଗାଁର ପ୍ରଦୀପ କୁମାର ମହାପାତ୍ରଙ୍କ ବାଇକ ଚୋରି ହୋଇଯାଇଥିବା ପ୍ରଦୀପ ଗତ ୨୮ ଫେବୃଆରୀ ୨୦୨୦ରେ ନାଉଗାଁ ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗକୁ ଭିତି କରି ଥାନା ପକ୍ଷରୁ କେଶ ନଂ ୩୫/୨୦୨୦ରେ ମାମଲା ରୁଜୁ କରାଯାଇଥିଲା । କିନ୍ତୁ ଦୀର୍ଘ ୨ ମାସରୁ ଉର୍ଦ୍ଧ ସମୟ ବିତି ଯାଇଥିଲେ ମଧ୍ୟ ପୋଲିସ ଗାଡିର କୌଣସି ସୁରାକ ପାଇ ନଥିଲା । ରବିବାର ନାଉଗାଁ-ଡାବରକୁ ସଂଯୋଗ କରୁଥିବା ପ୍ରଧାନମନ୍ତ୍ରୀ ଗ୍ରାମ୍ୟ ସଡକର ତିରୁଣା ଓ ଦହିପାଳ ରାସ୍ତା ମଧ୍ୟରେ ଥିବା ଏକ କଲର୍ଭଟ ତଳୁ ଏହି ଗାଡିଟିକୁ ଉଦ୍ଧାର କରାଯାଇଛି । ସୂଚନା ମୁତାବକ ସ୍ଥାନୀୟ ଦହିପାଳ ଗ୍ରାମର କିଛି ଲୋକ ଚାଷ ଜମିକୁ ଯାଇଥିବା ବେଳେ କଲର୍ଭଟ ତଳେ ଏକ ବାଇକକୁ ଦେଖଥିଲେ । କିଏ ଚୋରୀ କରି ଆଣି ରଖିଥିବା ସନ୍ଦେହ କରି ଥାନାକୁ ଖବର ଦେଇଥିଲେ । ଖବର ପାଇ ନାଉଗାଁ ଥାନା ଆଇଆଇସି ଗୋବର୍ଦ୍ଧନ ସାହୁ ଘଟଣାସ୍ଥଳରେ ପହଁଚି ବାଇକଟିକୁ ଉଦ୍ଧାର କରିଥିଲେ । ଉକ୍ତ ବାଇକ ପ୍ରଦୀପ କୁମାର ମହାପାତ୍ରଙ୍କର ବୋଲି ଜଣାପଡିଥିଲା । ଥାନା ପକ୍ଷରୁ ଉଦ୍ଧାର କରାଯାଇଥିବା ବାଇକଟିକୁ ପ୍ରଦୀପଙ୍କୁ ହସ୍ତାନ୍ତର କରାଯାଇଛି । ଏହି ବାଇକିଟିକୁ କିଏ ଆଣି ସେଠାରେ ରଖିଥିଲା ସେ ବିଷୟରେ ତଦନ୍ତ ଚାଲିଥିବା ଥାନା ଆଇଆଇସି ଗୋବର୍ଦ୍ଧନ ସାହୁ ପ୍ରକାଶ କରିଛନ୍ତି ।
