ଦକ୍ଷିଣ କୋରିଆ ନଦୀରେ ରକ୍ତସ୍ରୋତ

କୁରୁକ୍ଷେତ୍ରର ରକ୍ତନଦୀ ଭଳି ଦିଶୁଛି ଉତ୍ତର-ଦକ୍ଷିଣ କୋରିଆ ସୀମାରେ ଥିବା ଏକ ନଦୀ । ଯାହାର ବର୍ଣ୍ଣ ପାଲଟିଯାଇଛି ରକ୍ତିମ । ପ୍ରକୃତ କଥା ହେଲା ଏହି ଦେଶରେ ଆଫ୍ରିକା ସ୍ୱାଇନ୍ ଜ୍ୱର ବ୍ୟାପିଛି । ତେଣୁ ଏହାକୁ ରୋକିବା ପାଇଁ ଦକ୍ଷିଣ କୋରିଆ ପ୍ରଶାସନ ୪୭୦୦୦ ଘୁଷୁରିଙ୍କୁ ମାରିବା ପାଇଁ ଆଦେଶ ଦେଇଛି ।ବର୍ଷା ଯୋଗୁ ସୀମା ନିକଟରେ ଥିବା ଡମ୍ପିଂ ଗ୍ରାଉଣ୍ଡ୍‌ରୁ ରକ୍ତ ବୋହି କୃତ୍ରିମ ନଦୀର ଭ୍ରମ ସୃଷ୍ଟି କରିଛି । ଆଫ୍ରିକା ସ୍ୱାଇନ୍ ଜ୍ୱର ବହୁ ସଂକ୍ରାମକ ଏବଂ ଏହା ଜୀବନ ନେଇ ଯାଇଥାଏ । ସ୍ଥାନୀୟ ଅଧିକାରୀଙ୍କ ମତରେ, ବହୁଥିବା ରକ୍ତ ଅନ୍ୟ ଜୀବଜନ୍ତୁଙ୍କ ପାଇଁ ମଧ୍ୟ ଭୟଙ୍କର ହୋଇଥାଏ । ଗତ ସପ୍ତାହରେ ଘୁଷୁରି ମାରିବା ପାଇଁ ନିଷ୍ପତ୍ତି ନିଆଯାଇଥିଲା । ଦକ୍ଷିଣ କୋରିଆରେ ଆଫ୍ରିକାନ୍ ସ୍ୱାଇନ୍ ଜ୍ୱର ବ୍ୟାପିବା ପରେ ସୀମା ଚାରିପଟେ ବାଡ଼ା ମଧ୍ୟ ଦିଆଯାଇଛି । ଦକ୍ଷିଣ କୋରିଆ ସେନାର ଅନୁମତି ରହିଛି ସୀମା ପାରି ହୋଇ କୌଣସି ଜଙ୍ଗଲୀ ଜନ୍ତୁ ପ୍ରବେଶ କଲେ ସେମାନଙ୍କୁ ମାରି ଦିଆଯାଇପାରିବ । ଦକ୍ଷିଣ କୋରିଆରେ ପ୍ରାୟ ୬,୭୦୦ ଘୁଷୁରି ଫାର୍ମ ରହିଛି । ଏହି ରୋଗରେ ଚାଇନା, ଭିଏତନାମା, ଫିଲିପାଇନ୍ସ ସମେତ ଏସିଆ ପରି କେତେକ ଦେଶ ପ୍ରଭାବିତ ହୋଇଛନ୍ତି । କେବଳ ଚାଇନାରେ ୧୨ ଲକ୍ଷ ଘୁଷୁରିଙ୍କୁ ଏହି କାରଣରୁ ମରାଯାଇଛି ।