ଦୁଇଟି ସ୍ଥାନରେ ଦୁର୍ଘଟଣା, ଜଣେ ମୃତ ଜଣେ ଆହତ ଉତ୍ୟକ୍ତ ଲୋକମାନେ ଟାୟାର ଜାଳି ରାଜପଥ ଅବରୋଧ କଲେ 

ପାରାଦୀପ,(ୱାଏନଏସ): ପାରାଦୀପ ଚଣ୍ଡିଖୋଲ ଜାତୀୟ ରାଜପଥର ପିପିଏଲ ଛକ ଓ ତାରିଣୀଗଡା ଛକରେ ସୋମବାର ସନ୍ଧ୍ୟାରେ ଦୁର୍ଘଟଣା ଘଟିଛି।ଏଥିରେ ଜଣେ ଝାଲମୁଡି ବ୍ୟବସାୟୀଙ୍କ ମୃତ୍ୟୁ ଘଟିଥିଲା ବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି।ଏହି ଘଟଣା ପରେ ଅଠରବାଙ୍କି ଲକପଡା, ଶୁଖୁଆଖଳା ଲୋକମାନେ ରାସ୍ତା ଉପରେ ଟାୟାର ଜାଳି ପ୍ରତିବାଦ କରିଛନ୍ତି।ରିପୋର୍ଟ ଲେଖା ହେବା ସୁଦ୍ଧା ପାରାଦୀପ ଆଦର୍ଶଥାନା ପୋଲିସ ପହଞ୍ଚି ଧାରଣାକାରୀ ଙ୍କ ସହିତ ଆଲୋଚନା ଚଳାଇଛନ୍ତି।ମୃତକ ହେଲେ ଶୁଖୁଆଖଳା ବସ୍ତିର ହିମାଂଶୁ ମଣ୍ଡଳ।ସେ ସବୁଦିନ ପରି ଝାଲମୁଡି ପିପିଏଲ ଛକ ପାଖରେ ବିକୁଥିବା ବେଳେ ଟ୍ରକ ତାଙ୍କ ଉପରେ ଚଢ଼ି ଯାଇଥିଲା।ଗୁରୁତର ଆହତ ଅବସ୍ଥାରେ ସ୍ଥାନୀୟ ଲୋକମାନେ ଉଦ୍ଧାର କରି ବିଜୁ ମେମୋରିଆଲ ହସପିଟାଲରେ ଭର୍ତ୍ତି କରିଥିଲେ।ତାଙ୍କୁ କଟକ ନେବାପାଇଁ ଆମ୍ବୁଲାନ୍ସ ଯୋଗାଡ କରିବା ମଧ୍ୟରେ ତାଙ୍କର ମୃତ୍ୟୁ ହୋଇଥିଲା।ଏହି ଘଟଣାର ଅଧଘଣ୍ଟା ମଧ୍ୟରେ ତାରିଣୀଗଡା ପାଖରେ ଜଣେ ବାଇକ ଆରୋହୀଙ୍କୁ ଟ୍ରକ ଧକ୍କା ଦେଇଥିଲା।ତାଙ୍କର ପରିଚୟ ମିଳିନାହିଁ।ପ୍ରଥମେ ବିଜୁ ମେମୋରିଆଲ ହସପିଟାଲ ଓ ପରେ କଟକ ସ୍ଥାନାନ୍ତରିତ କରାଯାଇଛି।