ପଥର ବୋଝେଇ ହାଇୱା ଟ୍ରକ ଥାନାରେ ଅଟକ
ନାଉଗାଁ, (ଯୁଗାବ୍ଦ ନ୍ୟୁଜ):ନାଉଗାଁ ବ୍ଳକ ଅନ୍ତର୍ଗତ ଗାରୋଇ ଠାରେ ୪ଟି ପଥର ବୋଝେଇ ହାଇୱା ଟ୍ରକକୁ ଶୁକ୍ରବାର ନାଉଗାଁ ପୋଲିସ ଜବତ କରି ଥାନାରେ ଅଟକ ରଖି ତଦନ୍ତ ଜାରି ରହିଥିବା ଜଣାଯାଇଛି । ସୂଚନା ମୁତାବକ ଉକ୍ତ ହାଇୱା ଗାଡି ନମ୍ବର-ଓଡି୦୨ଭି୪୨୩୩, ଓଡି୦୨ଏଏଚ୮୦୦୯, ଓଡି୧୦ଏଚ୬୦୨୮, ଓଡି୩୩ପି୩୩୦୪ ରେ ଓଭର ଲୋଡ କରି ପଥର ଆସୁଥିବା ବେଳେ ଖବର ପାଇ ନାଉଗାଁ ଥାନାଧିକାରୀ ପ୍ରଜ୍ଞା ରିତାମ୍ବର କରଙ୍କ ନିର୍ଦ୍ଦେଶକ୍ରମେ ଏଏସଆଇ ଅଶୋକ କୁମାର ମହାନ୍ତି ଗାଡି ୪ଟିକୁ ଜବତ କରି ଥାନାକୁ ଆଣିଥିଲେ । ସରକାରଙ୍କ ନିର୍ଦ୍ଦେଶ କ୍ରମେ ପଥର ବୋଝେଇ ଗାଡିରେ ‘କେ’ଫର୍ମ ନଥିବା ବେଳେ ଗାଡିର ଅନ୍ୟାନ୍ୟ କାଗଜ ପତ୍ର ଯାଂଚ କରାଯାଉଥିବା ଥାନାଧିକାରୀ ପ୍ରକାଶ କରିଛନ୍ତି । ପ୍ରକାଶ ଯୋଗ୍ୟ ଯେ ଦେବୀ ନଦୀ ବନ୍ଧ ଦୁର୍ବଳ ଥିବାରୁ ବିଭିନ୍ନ ସ୍ଥାନରେ ସୁଦୃଢ କରିବା,ପୂର୍ତ ଓ ଗ୍ରାମ୍ୟ ଉନ୍ନୟନ ବିଭାଗର ବିଭିନ୍ନ ରାସ୍ତା ପାଶ୍ୱର୍ରେ ପଥର ପ୍ୟାକିଂ କରାଯାଉଛି । କାର୍ଯ୍ୟ କରୁଥିବା ଠିକାଦାରମାନେ ପ୍ରତ୍ୟେହ ଗାଡି ଗାଡି ପଥର ଚୋରାରେ ଆଣି ବ୍ୟବହାର କରୁଛନ୍ତି । ଯାହାଦ୍ୱାରା ପଥର ମାଫିଆମାନେ ସରକାରଙ୍କୁ ରାଜସ୍ୱ ଫାଙ୍କି ଠିକାଦାରମାନଙ୍କୁ ପଥର ଲୁଚାଇ ବିକ୍ରି କରୁଥିବା ଜଣାଯାଇଛି । ଜବତ ହୋଇଥିବା ୪ଟି ଗାଡି କୈାଣସି ଠିକାଦାରର ହୋଇଥିବା ବେଳେ ଉକ୍ତ ପଥର କେଉଁଠୁ ଆସୁଛି ଓ ଏହାକୁ କେଉଁ କାର୍ଯ୍ୟରେ ବ୍ୟବହାର କରାଯିବା ପାଇଁ ବିନା ଲାଇସେନ୍ସରେ ଅଣାଯାଇଛି ଏହାକୁ ସଠିକ ତଦନ୍ତ କରାଗଲେ ଅନେକ ତଥ୍ୟ ପଦାକୁ ଆସିପାରିବ ବୋଲି ସାଧାରଣରେ ଚର୍ଚ୍ଚା ହେଉଛି ।
