ପୂଣ୍ୟ ଉତ୍କଳ ଫାଉଣ୍ଡେସନର ଅଷ୍ଟମ ବାର୍ଷିକ ପ୍ରତିଷ୍ଠା ଦିବସ

ଭୁବନେଶ୍ୱର, (ଯୁଗାବ୍ଦ ନ୍ୟୁଜ) :-ପବିତ୍ର ଓଡ଼ିଆ ନବବର୍ଷରେ ଓଡ଼ିଶାର ଅଗ୍ରଣୀ ସାମାଜିକ ଅନୁଷ୍ଠାନ ପୂଣ୍ୟ ଉତ୍କଳ ଫାଉଣ୍ଡେସନର ଅଷ୍ଟମ ବାର୍ଷିକ ପ୍ରତିଷ୍ଠା ଦିବସ ଭୁବନେଶ୍ୱରସ୍ଥିତ ଗୁରୁ କେଳୁଚରଣ ଓଡ଼ିଶୀ ଗବେଷଣା କେନ୍ଦ୍ରଠାରେ ପାଳିତ ହୋଇଯାଇଛି । ଏହି ଉତ୍ସବରେ ମୁଖ୍ୟ ଅତିଥି ଭାବେ ପୂର୍ବତନ ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀଯୁକ୍ତ ଉପେନ୍ଦ୍ରନାଥ ବେହେରା, ଉଦ୍‌ଘାଟକ ଭାବେ ପୂର୍ବତନ ମୁଖ୍ୟ ଶାସନ ସଚିବ ଶ୍ରୀଯୁକ୍ତ ବିଜୟ କୁମାର ପଟ୍ଟନାୟକ, ବିଶିଷ୍ଟ ଅତିଥି ଭାବେ ପୂର୍ବତନ ଅତିିରିକ୍ତ ପୋଲିସ୍ ମହାନିର୍ଦ୍ଦେଶକ ଶ୍ରୀଯୁକ୍ତ ଗୋପବନ୍ଧୁ ମଲ୍ଲିକ, ମୁଖ୍ୟବକ୍ତା ଭାବେ ବରିଷ୍ଠ କବି ଶ୍ରୀଯୁକ୍ତ ପ୍ରବୀର କୁମାର ମହାନ୍ତି ପ୍ରମୁଖ ଯୋଗ ଦେଇ ପୂଣ୍ୟ ଉତ୍କଳ ଫାଉଣ୍ଡେସନର ଜନହିତକର କାର୍ଯ୍ୟକୁ ଭୂୟସୀ ପ୍ରଶଂସା କରିଥିଲେ । ପୂଣ୍ୟ ଉତ୍କଳ ଯେଉଁଭଳି ଭାବରେ ଲୋକଙ୍କୁ ସେବା ଯୋଗାଇ ଆସୁଛି, ସୁଖଦୁଃଖରେ ସେମାନଙ୍କ ସହିତ ଛିଡ଼ା ହେଉଛି ତାକୁ ଯଦି ଅନ୍ୟ ଅନୁଷ୍ଠାନମାନେ ଅନୁସରଣ କରି ଲୋକଙ୍କୁ ସହଯୋଗର ହାତ ବଢାଇବେ, ତେବେ ଓଡ଼ିଶାରେ ଥିବା ଅବହେଳିତ, ଗରିବ ଓ ନିଷ୍ପେସିତ ଲୋକଙ୍କ ସମସ୍ୟାର ସମାଧାନ ହୋଇପାରିବ ବୋଲି ଅତିଥିମାନେ ମତବ୍ୟକ୍ତ କରିଥିଲେ । ଏହି ଉତ୍ସବରେ ବିଜୟ ପଟ୍ଟନାୟକ କହିଥିଲେ ଯେ, ସମୟ ଥିଲା ଆନ୍ଧ୍ରପ୍ରଦେଶର ଲୋକ ଓଡ଼ିଶାକୁ ଆସି ଲୋକମାନଙ୍କର ଘରୋଇ କାର୍ଯ୍ୟ କରିବା ସହିତ ଓଡ଼ିଶାବାସୀଙ୍କ ବ୍ୟବସାୟରେ ଶ୍ରମିକଭାବେ କାର୍ଯ୍ୟ କରୁଥିଲେ । ହେଲେ ସମୟ ବଦଳି ଯାଇଛି, ଆଜିକା ଦିନରେ ଓଡ଼ିଶାଲୋକ ଆନ୍ଧ୍ରପ୍ରଦେଶ ଯାଇ ସେଠାରେ ଦାଦନ ଖଟୁଛନ୍ତି ଯାହା ଅତ୍ୟନ୍ତ ଚିନ୍ତାଜନକ ଘଟଣା । ଏହାକୁ କିପରି ରୋକାଯାଇ ପାରିବ, ସେ ନେଇ ପ୍ରତ୍ୟେକଟି ସ୍ୱାଭିମାନୀ ମଣିଷ ଚିନ୍ତା କରିବା ଦରକାର । ଖାଲି ସମାଜସେବା କରିଦେଲେ ସବୁ ସମସ୍ୟାର ସମାଧାନ ହୋଇପାରିବ ନାହିଁ, ଜଣେ ସାଧାରଣ ଓ ଖଟିଖିଆ ମେହନତୀ ମଣିଷ କିପରି ସ୍ୱାବଲମ୍ବୀ ହୋଇ ସମାଜର ମୁଖ୍ୟ ସ୍ରୋତରେ ସାମିଲ ହୋଇପାରିବ, ସେ ନେଇ ପ୍ରତ୍ୟେକ ଅନୁଷ୍ଠାନ ଏଥିପ୍ରତି ଦୃଷ୍ଟି ଦେଇ କାର୍ଯ୍ୟ କରିବା ଦରକାର । ଫାଉଣ୍ଡେସନର ଅଧ୍ୟକ୍ଷ ମନୋରଞ୍ଜନ ମହପାତ୍ରଙ୍କ ପୌରହିତ୍ୟରେ ଅନୁଷ୍ଠିତ ଏହି ପ୍ରତିଷ୍ଠା ଦିବସରେ ସମାଜରେ ଉଲ୍ଲେଖନୀୟ ଅବଦାନ ପାଇଁ ୧୫ଜଣ ବିଶିଷ୍ଟ ବ୍ୟକ୍ତିଙ୍କୁ ଅତିଥିମାନେ ସମ୍ବର୍ଦ୍ଧିତ କରିଥିଲେ । ଏହା ପରେ ପରେ ଆରମ୍ଭ ହୋଇଥିଲା ସାଂସ୍କୃତିକ କାର୍ଯ୍ୟକ୍ରମ ଯାହା ଦର୍ଶକଙ୍କ ସମେତ ଅତିଥିମାନଙ୍କୁ ଆକର୍ଷିତ କରିଥିଲା । ଫାଉଣ୍ଡେସନର ଅଧ୍ୟକ୍ଷ ମନୋରଞ୍ଜନ ମହାପାତ୍ର କହିଥିଲେ ଯେ, ମୁଁ ବଞ୍ôଚଥିବା ପର୍ଯ୍ୟନ୍ତ ମୋ ଫାଉଣ୍ଡେସନ ଲୋକଙ୍କ ସହିତ ଅଛି ଓ ଭବିଷ୍ୟତରେ ମଧ୍ୟ ଲୋକଙ୍କୁ ସେବା ଯୋଗାଇ ଚାଲିଥିବି । ଶେଷରେ ବିଶିଷ୍ଟ ସ୍ତମ୍ଭକାର ଶ୍ରୀଯୁକ୍ତ ଶ୍ରୀରାମ ଦାସ ଧନ୍ୟବାଦ ଅର୍ପଣ କରିଥିଲେ । କାର୍ଯ୍ୟକ୍ରମକୁ ସମାଜସେବୀ ଭରତ ଚନ୍ଦ୍ର ବେହେରା, ବୀରବର ଜେନା, ଦେବବ୍ରତ ଦାସ, ଶ୍ରୀମନ୍ତ ମହାନ୍ତି, ବିଭାସ ଜେନା ପ୍ରମୁଖ ପରିଚାଳନାରେ ସହଯୋଗ କରିଥିଲେ ।