ଖେତରେ ବିଛା ଯାଇଥିବା ବିଦ୍ୟୁତ୍ ତାର ସ୍ଵର୍ଷରେ ଆସି ଜଣେ ମୃତ,୪ଗୁରୁତର
କୁକୁଡାଖଣ୍ଡି : ସଦର ଥାନା ଅନ୍ତର୍ଗତ ଗୁଠବନ୍ଧ ଗ୍ରାମରେ ସୋମବାର ବଡ଼ିଭୋରରୁ ଘଟିଛି ଅଘଟଣ । ବିଜୁଳି ତାର ସଂସ୍ପର୍ଶରେ ଆସି ଜଣଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ୪ଜଣ ଗୁରୁତର ଆହତ ହୋଇଛନ୍ତି । ମୃତ ବ୍ୟକ୍ତିଜଣକ ହେଉଛନ୍ତି ଦୁର୍ଯ୍ୟୋଧନ ମଳିକ (୪୨) । ଗୁରୁତର ଆହତ ବ୍ୟକ୍ତିଙ୍କ ମଧ୍ୟରେ ସଦାନନ୍ଦ ଷଣ୍ଢ, କାଲୁ ବିଶୋୟୀ, ବାବୁଲା ପାତ୍ର ଓ ଜିତେନ୍ଦ୍ର ଦଳାଇ ପ୍ରମୁଖ ରହିଛନ୍ତି । ବ୍ରହ୍ମପୁର ସଦର ଥାନା ଅନ୍ତର୍ଗତ ଗୁଠବନ୍ଧ ଗାଁ’କୁ ଲାଗିଥିବା ପରିବା କ୍ଷେତରେ ଜନୈକ ବ୍ୟକ୍ତି ପନିପରିବା ଚାଷ କରୁଛନ୍ତି । ବଣୁଆ ବାର୍ହା ଉପଦ୍ରବରୁ ଫସଲ ରକ୍ଷା କରିବାକୁ ସେ ବ୍ୟକ୍ତିଜଣକ କ୍ଷେତ ଚାରିପଟେ ବିଦୂତ ତାର ଘେରାଇ ରାତିରେ ସେଥିରେ ବିଜୁଳି ସଂଯୋଗ କରିଦେଇଥାନ୍ତି । ପରିବା କ୍ଷେତ ପାଖରେ ଥିବା ଅନ୍ୟ କ୍ଷେତରେ କିଛି ଲୋକ ବିରି ଚାଷ କରିଥିଲେ । ବିରି ବିଲରୁ ବାର୍ହା ଘଉଡ଼ାଇବାକୁ ଉପରୋକ୍ତ ୫ଜଣ ବ୍ୟକ୍ତି ରାତିରେ ସେଠାକୁ ଯାଇଥିଲେ । ରାତି ପ୍ରାୟ ୧୨: ୩୦ ମିନିଟ୍ରେ ସେମାନେ ସେଠାରୁ ଫେରିବା ବେଳେ ପରିବା କ୍ଷେତରେ ବେଢ଼ାଯାଇଥିବା ବିଜୁଳି ପ୍ରବାହିତ ତାର ସଂସ୍ପର୍ଶରେ ଆସି ଚିତ୍କାର କରିଥିଲେ । ସେମାନଙ୍କ ପାଟି ଶୁଣି ଗାଁ ଲୋକେ ଧାଇଁ ଆସିଥିଲେ । କିନ୍ତୁ, ସେତେବେଳକୁ ଦୁର୍ଯ୍ୟୋଧନଙ୍କର ମୃତ୍ୟୁ ଘଟି ସାରିଥିଲା । ଉକ୍ତ ତା’ର ସଂସ୍ପର୍ଶରେ ଆସି ଗୋଟାଏ ବୁଲା କୁକୁର ମଧ୍ୟ ମରିଯାଇଥିବା ଜଣାପଡ଼ିଛି । ଚିକିତ୍ସା ନିମନ୍ତେ ଗାଁ ଲୋକେ ଆହତମାନଙ୍କୁ ଉଦ୍ଧାର କରି ବ୍ରହ୍ମପୁର ସିଟି ହସ୍ପିଟାଲ୍ରେ ଭର୍ତ୍ତି କରିଛନ୍ତି । ସଦରଥାନା ପୋଲିସ ଶବ ବ୍ୟବଛେଦ କରିବାସହ ତଦନ୍ତ ଜାରି ରଖିଥିବା ଥାନା ଅଧିକାରୀ ସନ୍ତୋଷିନୀ ଓରାମ ସୂଚନା ଦେଇଛନ୍ତି।
