ବୋଲେରୋ ଧକ୍କାରେ ଶିକ୍ଷକ ଗୁରୁତର

ନାଉଗାଁ, (ଯୁଗାବ୍ଦ ନ୍ୟୁଜ):ଜଗତସିଂହପୁର ଜିଲ୍ଲା ନାଉଗାଁ ଥାନା ଅଧିନ ଘୋଡାଂଶ ପଂଚାୟତ କାର୍ଯ୍ୟାଳୟ ନିକଟସ୍ଥ ବାଲିଭଉଁରୀ-ଶିଖରଘାଟ ରାସ୍ତାରେ ମଙ୍ଗଳବାର ଏକ ବୋଲେରୋ ଗାଡି ଧକ୍କାରେ ଶିକ୍ଷକ ଗୁରୁତର ହୋଇ ଚିକିତ୍ସିତ ହେଉଥିବା ଜଣାଯାଇଛି । ଚିକିତ୍ସିତ ହେଉଥିବା ଶିକ୍ଷକ ଜଣକ ଦହିପାଳସ୍ଥିତ ନନ୍ଦକେଶ୍ୱର ଉଚ୍ଚ ବିଦ୍ୟାଳୟର ଶିକ୍ଷକ ପ୍ରଶାନ୍ତ ଦାସ ହୋଇଥିବା ବେଳେ ତାଙ୍କ ଘର ସ୍ଥାନୀୟ ଗୋଠଦା ଗ୍ରାମର ବୋଲି ଜଣାପଡିଛି । ସୂଚନା ଅନୁସାରେ ଆଜି ଦିବା ପ୍ରାୟ ୧୧ଟା ସମୟରେ ଏକ ବୋଲେରୋ ଗାଡିରେ ନାଉଗାଁ ବିଦ୍ୟୁତ କର୍ମଚାରୀମାନେ ବିଦ୍ୟୁତ ବକେୟା ବିଲ୍ ଆଦାୟ କରିବା ପାଇଁ ଅଲଣା ପଂଚାୟତ ଅଭିମୁଖେ ଯାଉଥିଲେ । ଘୋଡାଂଶ ପଂଚାୟତ କାର୍ଯ୍ୟାଳୟ ନିକଟରେ ବୋଲେରୋ ଗାଡି ଚାଳକ ନିଜର ଭାରାସାମ୍ୟ ହରାଇ ମୁଣ୍ଡାଳୋ ଆଡୁ ନାଉଗାଁ ଅଭିମୁଖେ ଏକ ସ୍କୁଟିରେ ଆସୁଥିବା ଶିକ୍ଷକଙ୍କ ସ୍କୁଟିକୁ ଧକ୍କା ଦେଇଥିଲା । ଫଳରେ ବୋଲେରୋ ଗାଡିଟି ରାସ୍ତା ତଳକୁ ଓଲଟି ପଡିଥିବା ବେଳେ ସ୍କୁଟି ଗାଡିଟି ବିଲରେ ପଡି ଭାଙ୍ଗି ନଷ୍ଟ ହୋଇଯାଇଛି । ଧକ୍କା ହେବା ଫଳରେ ବୋଲେରୋ ଗାଡିରେ ଥିବା ବିଦ୍ୟୁତ କର୍ମଚାରୀଙ୍କ କୌଣସି କ୍ଷତି ହୋଇନଥିବା ବେଳେ ସ୍କୁଟି ଚାଳକଙ୍କ ଗୁରୁତର ହୋଇ ପଡିରହିଥିଲେ । ଉପସ୍ଥିତ ବିଦ୍ୟୁତ କର୍ମଚାରୀ ଓ ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ନାଉଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରିଥିଲେ । ତାଙ୍କର ଅବସ୍ଥା ସଂକଟାପନ୍ନ ଥିବାରୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିବା ଜଣାଯାଇଛି । ଅନ୍ୟପଟରେ ନାଉଗାଁ ପୋଲିସ ଘଟଣାସ୍ଥଳରେ ପହଁଚି ବୋଲେରୋ ଗାଡି ସହ ସ୍କୁଟିକୁ ଜବତ କରି ତଦନ୍ତ ଚଳାଇଥିବା ଥାନାଧିକାରୀ ସଂଘମିତ୍ର ନାୟକ କହିଛନ୍ତି ।