ଭୁଶୁଡ଼ି ପଡ଼ିଲା ବିଦ୍ୟାଳୟ ପାଚେରୀ , ଭାସିଗଲା କଲଭର୍ଟ
ଦିଗପହଣ୍ଡି,(ଅଳକ ନାଥ ମିଶ୍ର) ଅର୍ଣ୍ଣବ ବାତ୍ୟା ଜନିତ ପବନ ଓ ଲଗାଣ ବର୍ଷା ପ୍ରଭାବରେ ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ପୋଡ଼ାମାରି ବିଜ୍ଞାନ ଉଚ୍ଚ ମାଧ୍ୟମିକ ବିଦ୍ୟାଳୟ ର ପ୍ରାୟ ୬୦ ଫୁଟ ଲମ୍ବା ବିଶିଷ୍ଟ ପାଚେରୀ ଭୁଶୁଡ଼ି ପଡ଼ିଛି।ନିକଟସ୍ଥ ପାହାଡ଼ ରୁ ପ୍ରାୟ ୮ ଫୁଟ ଉଚ୍ଚ ରେ ବର୍ଷାଜଳ ପ୍ରଖର ସ୍ରୋତ ବିଦ୍ୟାଳୟ ଭିତରେ ପଶିଯିବା କାରଣରୁ ପାଚେରୀ ଟି ଭୁଶୁଡ଼ି ପଡ଼ିଥିବା ଜଣାପଡ଼ିଛି।ସେହିପରି ବିଦ୍ୟାଳୟ ପରିସରରେ ବହୁ ବର୍ଷ ହେଲା ଥିବା ପ୍ରାୟ ୫ ଟି ଶାଗୁଆନ ଗଛ ଉପୁଡ଼ି ଯାଇଥିବା ବିଦ୍ୟାଳୟ ଅଧ୍ୟକ୍ଷ ଇ.ପ୍ରଦୀପ କୁମାର ପାତ୍ର ଜଣାଇଛନ୍ତି।ଏହି ପ୍ରାକୃତିକ ବିପର୍ଯ୍ୟୟ ରେ ପ୍ରାୟ ୫ ଲକ୍ଷରୁ ଉର୍ଦ୍ଧ୍ବ ଟଙ୍କା ର ସମ୍ପତ୍ତି କ୍ଷୟକ୍ଷତି ହୋଇଥିବା ଜଣାପଡିଛି।ସେହିପରି ଦିଗପହଣ୍ଡି ବ୍ଲକ କଇଠଖଣ୍ଡି ପ୍ରାଥମିକ ବିଦ୍ୟାଳୟର ପାଚେରୀ, ଚଷା ନିମଖଣ୍ଡି ପଞ୍ଚାୟତ ସିନ୍ଧବା ଗ୍ରାମ ର ଗ୍ରାମୀଣ ପାର୍କ ର ପାଚେରୀ କଡ଼ରେ ବର୍ଷା ପାଣି ପ୍ରବାହିତ କାରଣରୁ ଭୁଶୁଡ଼ି ପଡ଼ିଥିବା ଖବର ମିଳିଛି।ମଥୁରା ଗ୍ରାମ ନିକଟ ଶ୍ରୀ ହନୁମାନ ଗୁମ୍ଫା ନିକଟ କଲଭର୍ଟ, ନିମଖଣ୍ଡି ଗ୍ରାମକୁ ସଂଯୋଗ କରୁଥିବା କଲଭର୍ଟ ଆପ୍ରୋଚ ରୋଡ଼ ପ୍ରଖର ପାଣି ସ୍ରୋତ ରେ ଭାସି ଯାଇଛି।
