ମୂଲ୍ୟବାନ୍ ଖେଳଣା
ବିଶ୍ୱରେ ଏମିତି କିଛି ଖେଳଣା ରହିଛି, ଯାହାକୁ ଆପଣ ଚାହିଁଲେ ମଧ୍ୟ ପିଲାମାନଙ୍କ ପାଇଁ କିଣିପାରିବେନି । କାରଣ ଏସବୁ ହେଉଛି ପୃଥିବୀର ସବୁଠାରୁ ମୂଲ୍ୟବାନ୍ ଖେଳଣା । ଏଗୁଡ଼ିକ ଖେଳିବା ପାଇଁ ନୁହେଁ, ବରଂ ତିଆରି ହୋଇଛି ସାଇତି ରଖିବା ପାଇଁ । ଚାଲନ୍ତୁ ଏହି ମୂଲ୍ୟବାନ୍ ଖେଳଣା ସମ୍ପର୍କରେ ଅବଗତ ହେବା ।
ଆଷ୍ଟୋଲାଟ୍ ଡଲ୍ ହାଉସ୍ କ୍ୟାସେଲ : ଡଲ୍ ହାଉସ୍ ବା କଣ୍ଢେଇ ଘର ପିଲାମାନଙ୍କର ବହୁତ ପ୍ରିୟ । ସେଥିରେ କଣ୍ଢେଇକୁ ରଖି ଖେଳିବାରେ ଥାଏ ଅଲଗା ମଜା । ତେବେ ଏମିତି ଏକ ଡଲ୍ ହାଉସ୍ ଅଛି, ଯାହାକୁ ଦେଖିଲେ ଇଚ୍ଛା ହେବ ତାକୁ ଘରକୁ ନେଇଯିବାକୁ । ହେଲେ ଏହାର ଦାମ ଶୁଣିଲେ ତା’ଠୁ ଦୂରେଇ ଯିବେ । କାରଣ ଏହା ହେଉଛି ପୃଥିବୀର ସବୁଠୁ ଦାମୀ ଡଲ୍ ହାଉସ୍ । ଯାହାର ମୂଲ୍ୟ ୮.୫ ମିଲିୟନ ଡଲାର । ଏତେ ମୂଲ୍ୟ ହେବା ବି ସ୍ୱାଭାବିକ । କାରଣ ଏଥିରେ ଦେଖିବାକୁ ମିଳେ ଉଚ୍ଚକୋଟୀର କାରିଗରି, ସ୍ଥାପତ୍ୟ, ଇଞ୍ଜିନିୟରିଂ ଓ ସୃଜନଶୀଳତା । ଏହା ଭିତରେ ରୋଷେଇ ଘରଠୁ ଆରମ୍ଭ କରି ବେଡରୁମ୍, ୱାଇନ୍ ସେଲାର, ବେସମେଣ୍ଟ, ହଲେ୍ୱସ୍, ଷ୍ଟେୟାରୱେସ୍, ମ୍ୟୁଜିକ ରୁମ୍, ଲାଇବ୍ରେରୀ ଆଦି ଅଛି । ଆଉ ସେଗୁଡ଼ିକୁ ଏତେ ନିଖୁଣଭାବେ କରାଯାଇଛି ଯେ, ତାହା ସମ୍ପୂର୍ଣ୍ଣ ଭାବେ ବାସ୍ତବ ଲାଗେ । ଏହାକୁ ତିଆରି କରିବା ଲାଗି ୧୩ ବର୍ଷ ଲାଗିଥିଲା ।
ଲୋଇଜ୍ଲିଉର୍(ଦି ବାର୍ଡ ଟ୍ରେନର୍) : ଏହା ଏକ ୪ ଫୁଟ୍ ଉଚ୍ଚତା ବିଶିଷ୍ଟ ଚଳପ୍ରଚଳ କରିପାରୁଥିବା ଖେଳଣା । କହିବାକୁ ଗଲେ ଏହା ଏକ ରୋବୋ ପରି ଅଟେ । ଯାହାକୁ ଡିଜାଇନ୍ କରିଛନ୍ତି ଫ୍ରାନ୍ସର କ୍ରିଷ୍ଟିୟାନ ବେଲି । ଏହି ଖେଳଣାଟି ଏକ ଯୁବକର, ଯାହା ହାତରେ ବଇଁଶୀ ଥିବା ସହ ପାଖରେ ଥାଆନ୍ତି ଦୁଇଟି ଚଢ଼େଇ । ସାଟିନ୍, ଭେଲଭେଟ୍, ସିଲ୍କର ପୋଷାକ ପିନ୍ଧିଥିବା ଏହି ଯୁବକ କଣ୍ଢେଇର ଆଖି କାଚର । ଏଥିରେ ଥିବା ଏକ ସୁବର୍ଣ୍ଣ ରଙ୍ଗର ଚାବିକୁ ମୋଡ଼ିଦେଲେ ଯୁବକ କଣ୍ଢେଇଟି ବଇଁଶୀ ବଜାଇବା ଆରମ୍ଭ କରେ । ଆଉ ହାତରେ ବସିଥିବା ଚଢ଼େଇ ଡେଣା ଝାଡ଼ି, ମୁଣ୍ଡ ହଲେଇ ଥଣ୍ଟ ଖୋଲି ଓ ବନ୍ଦ କରି ଗୀତ ଗାଇବା ପରି ହୁଅନ୍ତି । ଏହି ଖେଳଣାର ମୂଲ୍ୟ ୬.୨୫ ମିଲିୟନ ଡଲାର୍ ।
ମାଡାମ୍ ଆଲେକଜାଣ୍ଡାର ଏଲୋଇଜ୍ : କ୍ୟୁଟ୍ ବ୍ଲଣ୍ଡ ହେୟାର୍ ଥିବା ଝିଅ କଣ୍ଢେଇ ପାଖରେ ଷ୍ଟାଇଲିଶ୍ କୁକୁରର ଏହି ଖେଳଣା ଦେଖିବାକୁ ସାଧାରଣ । କିନ୍ତୁ ଏହାର ମୂଲ୍ୟ ୫ ମିଲିୟନ ଡଲାର । କାରଣ ଉକ୍ତ କଣ୍ଢେଇରେ ୯ କ୍ୟାରେଟ୍ର ହୀରା, ସ୍ୱରଭୋସ୍କି କ୍ରିଷ୍ଟାଲ୍ ଓ ଅନ୍ୟ ଦାମୀ ଆସେସରିଜ୍ ବ୍ୟବହାର କରାଯାଇଛି । ଡଲ୍ ଡିଜାଇନର୍ ମାଡାମ ଆଲେକଜାଣ୍ଡାର ଏହିଭଳି ମାତ୍ର ୫ଟି ଡଲ୍ ତିଆରି କରିଛନ୍ତି ।
ଲମ୍ବରଘିନି ଆଭେଣ୍ଟାଡର୍ ମଡେଲ୍ କାର୍ : ଜାଣି ଆଶ୍ଚର୍ଯ୍ୟ ହେବେ ଏହି ମଡେଲ୍ କାର୍ ଖେଳଣାର ମୂଲ୍ୟ ଅସଲି ଲମ୍ବରଘିନି କାରଠୁ ୧୦ ଗୁଣ ଅଧିକ । ସୁନା, ହୀରା ଓ ପ୍ଲାଟିନମ୍ରେ ତିଆରି ଏହି କାର୍ ଖେଳଣାର ମୂଲ୍ୟ ୪.୬ ମିଲିୟନ ଡଲାର ।
ଗୋଲ୍ଡେନ୍ ମନୋପଲି : ମନୋପଲି ଗେମ୍ ଅନେକେ ଖେଳିଥିବେ । ଏହା ଏକ ଲୋକପ୍ରିୟ ବୋର୍ଡ ଗେମ୍ । ସାନ୍ଫ୍ରାନ୍ସିସ୍କୋ ଗହଣା ଡିଜାଇନର୍ ସିଡ୍ନୀ ମୋବେଲ୍ ତିଆରି କରିଛନ୍ତି ଏହାର ସବୁଠାରୁ ଦାମୀ ଭର୍ସନ । ଯାହାର ମୂଲ୍ୟ ୨ ମିଲିୟନ ଡଲାର । ୧୮ କ୍ୟାରେଟ୍ ସୁନା ଓ ବିଭିନ୍ନ ଦାମୀ ରତ୍ନରେ ତିଆରି ଏହି ମନୋପଲି ଗେମ୍ର ଡାଇସ୍ ଦୁଇଟି ୪୨ଟି ଫୁଲ୍ କଟ୍ ଡାଇମଣ୍ଡରେ ତିଆରି । ଏହାର ପ୍ରପର୍ଟିଗୁଡ଼ିକରେ ଜେମ୍ସ ଖଚ୍ଚିତ । ସର୍ବମୋଟ ୧୬୫ଟି ଜେମ୍ ଷ୍ଟୋନ ଏଥିରେ ବ୍ୟବହାର ହୋଇଛି । ଏହାର ହୋଟେଲରେ ସାଫାୟର୍ ଏବଂ ହାଉସ୍ ଚିମ୍ନୀ ରୁବି ବ୍ୟବହାର କରାଯାଇଛି ।
ଦି ମାଷ୍ଟରପିସ୍ କ୍ରବ୍ ର୍ୟୁବିକ୍ କ୍ୟୁବ୍ : ଏହାର ମୂଲ୍ୟ ହେଉଛି ୧.୫ମିଲିୟନ ଡଲାର । ଏଥିରେ ୧୮୫ କ୍ୟାରେଟ୍ ବହୁମୂଲ୍ୟ ଜେମ୍ସ, ରୁବି, ଇମେରାଲ୍ଡ ଆଦି ଖଚ୍ଚିତ ହୋଇଛି ।
ଗୋଲ୍ଡ ରକିଂ ହର୍ସ- ପିଲାଦିନର ଖେଳଣା ଭିତରେ ରକିଂ ହର୍ସ ବହୁତ ପ୍ରିୟ ହୋଇଥାଏ । ଜାପାନର ଗହଣା ନିର୍ମାତା ଗିନ୍ଜା ତନାକା ତିଆରି କରିଛନ୍ତି ୨୪ କ୍ୟାରେଟ୍ ସୁନାର ରକିଂ ହର୍ସ । ୨୬ କି.ଗ୍ରା. ସୁନାର ଏହି ରକିଂ ହର୍ସକୁ ସେ ଜାପାନର ରାଜକୁମାର ହିସାହିତୋଙ୍କ ଜନ୍ମଦିନ ଅବସରରେ ତିଆରି କରିଥିଲେ । ପରେ ଏହାକୁ ହଲିଉଡ୍ ଗାୟିକା ବେୟୋନ୍ସ ଓ ତାଙ୍କ ସ୍ୱାମୀ ଜେ-ଜେଡ୍ ତାଙ୍କ ଝିଅ ପାଇଁ କିଣି ନେଇଥିଲେ ।
