ରାତି ପାହିଲେ ହେବ ପିପିଲି ଉପନିର୍ବାଚନ ଲାଗି ଭୋଟଗ୍ରହଣ
ଭୁବନେଶ୍ୱର, (ୱାଇଏନ୍ଏସ୍): ରାତି ପାହିଲେ ହେବ ପିପିଲି ଉପନିର୍ବାଚନ ଲାଗି ଭୋଟଗ୍ରହଣ । ଏନେଇ ପ୍ରସ୍ତୁତି ସରିବାକୁ ବସିଲାଣି । ସକାଳ ୭ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଭୋଟ ଗ୍ରହଣ କରାଯିବାକୁ ଥିବା ବେଳେ ପୋଲିଂ ପାର୍ଟି ବୁଥ୍ରେ ପହଞ୍ଚିଛନ୍ତି। ଏହି ଉପନିର୍ବାଚନରେ ପିପିଲିର ୨ ଲକ୍ଷ ୨୯ହଜାର ୯୯୮ଜଣ ଭୋଟର ନିଜର ମତାଧିକାର ସାବ୍ୟସ୍ତ କରିବେ। ମତଦାନ ପାଇଁ ୩୪୮ କେନ୍ଦ୍ର କରାଯାଇଥିବା ବେଳେ ସେଥିରୁ ୨୦୧ ସମ୍ବେଦନଶୀଳ ରହିଛି। ମତଦାନକୁ ଦୃଷ୍ଟିରେ ରଖି ନିର୍ବାଚନମଣ୍ଡଳୀରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। କୋଭିଡ ଗାଇଡଲାଇନ୍ ଅନୁଯାୟୀ ବୁଥ୍ରେ ସାମାଜିକ ଦୂରତ୍ୱ ସହ ମାସ୍କ, ସାନିଟାଇଜର୍ ଆଦି ବ୍ୟବସ୍ଥା କରାଯାଇଛି। ଟିକାର ଡବଲ୍ ଡୋଜ୍ ନେଇଥିବା କର୍ମଚାରୀଙ୍କୁ ହିଁ ନିର୍ବାଚନ ପ୍ରକ୍ରିୟାରେ ସାମିଲ କରାଯିବ ବୋଲି ଜଣାପଡ଼ିଛି। ପ୍ରତି ବୁଥ୍ରେ ହଜାରେ ଭୋଟରଙ୍କ ମତଦାନ ଲାଗି ବ୍ୟବସ୍ଥା ହୋଇଛି। ଥର୍ମାଲ ସ୍କାନିଂ ସହ ବୁଥ୍ରେ ସାମାଜିକ ଦୂରତ୍ୱ ରକ୍ଷା କରାଯିବା ଲାଗି ନିର୍ଦ୍ଦେଶ ଦିଆଯାଇଛି। କେହି ଜ୍ୱରରେ ପୀଡ଼ିତ ଥିଲେ ସେ ଶେଷ ଘଣ୍ଟାରେ ଆସି ମତଦାନ କରିବେ।
