ରାତ୍ରି ପାଟ୍ରୋଲିଂ ବେଳେ ଦୁଇଲକ୍ଷରୁ ଅଧିକ ଟଙ୍କା ଜବତ

କନ୍ଧମାଳ, (ସଞ୍ଜୟ କୁମାର ପାଣିଗ୍ରାହୀ):କନ୍ଧମାଳ ଜିଲା ଖଜୁରୀପଡା ପୁଲିସ ତରଫରୁ ଚଳିତ ସାଧାରଣ ନିର୍ବାଚନକୁ ଶାନ୍ତିଶୃଙ୍ଖଳା ସହ ପରିଚାଳନା ପାଇଁ ଅନେକ ପଦକ୍ଷେପ ଗ୍ରହଣ କରୁଥିବା ବେଳେ ରାତ୍ରି କାଳୀନ ପାଟ୍ରୋଲିଂ ଏବଂ ଯାନ ବାହାନ ଯାଞ୍ଚ ମଧ୍ୟ କଡାକଡ଼ି କରିଛି। ଖଜୁରୀପଡା ସ୍ଥିତ ଗଡ଼ପଦର ଠାରେ ନାକା ଗେଟ କରି ସବୁଦିନ ଜିଲା ଭିତରକୁ ଏବଂ ବାହାରକୁ ଯାଉଥିବା ସମସ୍ତ ଗାଡି ମୋଟର ଯାଞ୍ଚ ଚାଲିଥିବା ବେଳେ ଗତ ରାତି ଦୁଇଟା ବେଳେ ଏକ ଅଶୋକ ଲେଲ୍ୟାଣ୍ଡ ଡାଲା ଗାଡ଼ିରେ ଖଣ୍ଡପଡା ଅନଳାପାଟ୍ଟ ଅଞ୍ଚଳର ଚିତ୍ତରଞ୍ଜନ ସାହୁ ୨ ଲକ୍ଷ ୪ ହଜାର ୨୦୦ ଟଙ୍କା ନେଇ ଯାଉଥିବା ବେଳେ ଏହି ଟଙ୍କା କ’ଣ ପାଇଁ ନେଉଥିଲେ କୌଣସି ସଠିକ ଉତ୍ତର ଦେଇ ପାରିନଥିଲେ । ଫଳରେ ଫ୍ଲାଇଙ୍ଗ ସ୍କ୍ୱାଡ଼ ଏବଂ ପୁଲିସ ଉକ୍ତ ଟଙ୍କା ଜବତ କରି ଜିଲା କୋଷାଗାରରେ ଦାଖଲ କରିଛନ୍ତି।ଟଙ୍କା ଗଣନା ବେଳେ ଖଜୁରୀପଡା ଅତିରିକ୍ତ ତହସିଲଦାର ବ୍ରହ୍ମକ୍ଷନନ୍ଦ ଥାଟ୍ଟୀ ଉପସ୍ଥିତ ଥିଲେ। ଏହାର ତଦନ୍ତ ଦାୟିତ୍ୱ ସବଇନ୍ସପେକ୍ଟର ଦିନବନ୍ଧୁ ପ୍ରଧାନ ନେଇଥିବା ଥାନା ଅଧିକାରୀ ଚାପଧାରୀ ପ୍ରଧାନ ସୂଚନା ପ୍ରଦାନ କରିଛନ୍ତି। ଆଗାମୀ ଦିନରେ ମଧ୍ୟ ଯାଞ୍ଚକୁ କଡାକଡ଼ି ଭାବେ କରିବା ସହ ବେଆଇନ ନିଶା କାରବାର, ଜୁଆଆଡା ଏବଂ ଅନେକ ଅସାମାଜିକ କାର୍ୟ୍ୟକଳାପକୁ ରୋକିବା ପାଇଁ ପୋଲିସ ତରଫରୁ ପଦକ୍ଷେପ ନିଆଯିବ ବୋଲି ଥାନା ଅଧିକାରୀ ଶ୍ରୀ ପ୍ରଧାନ କହିଛନ୍ତି l