ଲୁଟିଆ ଗ୍ୟାଙ୍ଗର ୫ଜଣଙ୍କୁ ଧରିଲା ପୁଲିସ

ବାଲେଶ୍ୱର, (ସରୋଜ ପଣ୍ଡା) :-ବାଇକ ଚୋରି ଓ ଡକାୟତି ଏକାଧିକ ମାମଲା ସହ ଜଡିତ ଲୁଟିଆ ଗ୍ୟାଙ୍ଗକୁ ଧରିବାରେ ବାଲେଶ୍ୱର ପୁଲିସକୁ ମିଳିଛି ସଫଳତା । ଗ୍ୟାଙ୍ଗର ମୁଖିଆ ସହ ୫ ଅଭିଯୁକ୍ତଙ୍କୁ ଗିରଫ କରିଛି ପୁଲିସ । ଗିରଫ ଅଭିଯୁକ୍ତମାନେ ହେଲେ ବସ୍ତା ଥାନା ଅନ୍ତର୍ଗତ ରେଣୁପଦା ଅଞ୍ଚଳର ଗୌରାଙ୍ଗ ନାୟକଙ୍କ ପୁତ୍ର ମାନସ ନାୟକ ଓରଫ ସିକୁ (ମାଷ୍ଟର ମାଇଣ୍ଡ), ବାଲେଶ୍ୱର ଟାଉନ ଥାନା ଅନ୍ତର୍ଗତ ବାଲୁବଜାର ଅଞ୍ଚଳର ଶେଖ ଅବଦୁଲ ଖାଲିଦଙ୍କ ପୁତ୍ର ବଣ୍ଟି ଓରଫ ଶେଖ ଜାଫର (୨୦), ଅବଦୁଲ ଜବାର ଖାନଙ୍କ ପୁତ୍ର ମଙ୍ଗଲୁ ଓରଫ ଅବଦୁଲ ହମିଦ ଖାନ (୨୦), ଶେଖ ତାହିର ହୋସେନଙ୍କ ପୁତ୍ର ଜାହିଦ ଓରଫ ଶେଖ ଜାହିଦ ହୋସେନ (୨୨) ଓ ଶେଖ ସାଉଦ୍ଦିନଙ୍କ ପୁତ୍ର ପାପୁଲୁ ଓରଫ ଶେଖ ଅରବାଜ (୨୧) । ସେମାନଙ୍କଠାରୁ ନଗଦ ୫୭ ହଜାର ଟଙ୍କା ସହିତ ତିନୋଟି ମୋବାଇଲ ଫୋନ, ତିନୋଟି ତେଲେଙ୍ଗା କଟୁରୀ, ଗୋଟିଏ ଖେଳନା ବନ୍ଧୁକ ଓ ତିନୋଟି ବାଇକ ଜବତ କରାଯାଇଥିବା ସହଦେବଖୁଣ୍ଟା ଥାନାରେ ଆୟୋଜିତ ସାମ୍ବାଦିକ ସମ୍ମିନଳୀରେ ଏସପି ସୁଧାଂଶୁ ଶେଖର ମିଶ୍ର ସୂଚନା ଦେଇଛନ୍ତି । ଏହି ଡକାୟତି ଗ୍ୟାଙ୍ଗ ବିଭିନ୍ନ ସମୟରେ ବ୍ୟାଙ୍କରୁ ଟଙ୍କା ଉଠାଉଥିବା ବ୍ୟକ୍ତିଙ୍କ ଉପରେ ନଜର ରଖିବା ସହ ସୁଯୋଗ ପାଇ ସେମାନଙ୍କ ଠାରୁ ଲୁଟ କରିଥାଆନ୍ତି ବୋଲି ସେ ପ୍ରକାଶ କରିଛନ୍ତି । ଯୋଜନାବଦ୍ଧ ଭାବେ ଡକାୟତି ଓ ଲୁଟ କରୁଥିବା ଏହି ଅଭିଯୁକ୍ତଙ୍କ ବିରୋଧରେ ସହଦେବଖୁଣ୍ଟା ଥାନାରେ ଦୁଇଟି ଏବଂ ବାଲେଶ୍ୱର ଟାଉନଥାନା, ସୋର ଓ ସଦର ଥାନାରେ ଗୋଟିଏ ଲେଖାଏଁ ମାମଲା ରହିଛି । ଏ ପର୍ଯ୍ୟନ୍ତ ବିଭିନ୍ନ ବ୍ୟକ୍ତିଙ୍କ ଠାରୁ ଅଭିଯୁକ୍ତମାନେ ୧୦ଲକ୍ଷ ୫୫ହଜାର ଟଙ୍କା ଲୁଟି କରିବା ନେଇ ସୂଚନା ଥିବା ଏସପି ଶ୍ରୀ ମିଶ୍ର କହିଛନ୍ତି । ଅନ୍ୟମାନଙ୍କ ମଧ୍ୟରେ ସଦର ଏସଡିପିଓ, ସିଟି ଡିଏସପି ଅମୂଲ୍ୟ ଧର, ସହଦେଖୁଣ୍ଟା ଓ ଟାଉନଥାନା ଅଧିକାରୀ ଏହି ସାମ୍ବାଦିକ ସମ୍ମିଳନୀରେ ଉପସ୍ଥିତ ଥିଲେ ।