ଲୋକଙ୍କୁ ଭୟଭୀତ କରୁଥିବା ନାଗସାପକୁ ଜଙ୍ଗଲରେ ଛଡାଗଲା
ପାରଳାଖେମୁଣ୍ଡି, (ତାରିଣୀ ପ୍ରସାଦ ପଣ୍ଡା):ଗଜପତି ଜିଲ୍ଲା ଆର୍.ଉଦୟଗିରି ବ୍ଲକ ରାମଗିରି ପଞ୍ଚାୟତର ହାଟପଦା ନୂଆସାହିର ଜଣକ ଘରୁ ଏକ ନାଗ ସାପ ବନ ବିଭାଗ ଦ୍ୱାରା ଉଦ୍ଧାର କରି ଜଙ୍ଗଲରେ ଛଡାଯାଇଥିବା ଜଣାପଡିଛି । ଏହି ସାପଟି ଗତ ୫ରୁ୬ ଦିନ ହେଲାଣି ନୂଆ ସାହି ଠାରେ ଭିନ୍ନ ଭିନ୍ନ ସମୟରେ ଦେଖିବାକୁ ମିଳିଥିଲା । ସାପଟି ବାରମ୍ବାର ଏଠାରେ ବୁଲୁ ଥିବା ଦେଖି ଲୋକେ ଭୟଭୀତ ଥିଲେ । ନୁଆସାହିରେ ରହୁଥିବା କୁଞ୍ଜବିହାରୀ ପ୍ରଧାନଙ୍କ ଘରେ ସାପଟି ଗତକାଲି ଦେଖିବାକୁ ମିଳିଥିଲା । ସ୍ଥାନୀୟ ବାସୀନ୍ଦାମାନେ ଏ ସମ୍ପର୍କରେ ତୁରନ୍ତ ରାମଗିରି ବନ ବିଭାଗକୁ ଖବର ଦେଇଥିଲେ । ରାମଗିରି ବନ ବିଭାଗ ପକ୍ଷରୁ ଜଣେ ଫରେଷ୍ଟ ଗାର୍ଡ ଏବଂ ଦୁଇଜଣ ସହଯୋଗୀ ଆସି ଏହି ବିଷାକ୍ତ ସାପଟିକୁ ଉଦ୍ଧାର କରିବାପରେ ଜଙ୍ଗଲରେ ଛାଡିଦେଇଥିବା ସୂଚନା ମିଳିଛି ।
