ସବୁଜ ଭାରତ ତରଫରୁ ବୃକ୍ଷରୋପଣ
ଭୁବନେଶ୍ୱର – : ପରିବେଶ ସୁରକ୍ଷା ଭିତ୍ତିକ ଅନୁଷ୍ଠାନ ସବୁଜ ଭାରତ ଏବଂ ହରିଜନ ସେବକ ସଂଘର ମିଳିତ ଆନୁକୂଲ୍ୟରେ ଭୁବନେଶ୍ୱରସ୍ଥିତ ନଳିନୀଦେବୀ ମହିଳା ମହାବିଦ୍ୟାଳୟ ପରିସରରେ ବୃକ୍ଷରୋପଣ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ସବୁଜ ଭାରତର ସଭାପତି ସତ୍ୟବ୍ରତ ଜେନାଙ୍କ ସଭାପତିତ୍ୱରେ ଅନୁଷ୍ଠିତ ଉକ୍ତ କାର୍ଯ୍ୟକ୍ରମରେ ହରିଜନ ସେବକ ସଂଘର ସମ୍ପାଦକ ଆର୍ଯ୍ୟଭଟ୍ଟ ମହାନ୍ତି, ପ୍ରିୟବ୍ରତ ମହାନ୍ତି, ନଳିନୀଦେବୀ ମହିଳା ମହାବିଦ୍ୟାଳୟର ସମସ୍ତ ଶିକ୍ଷୟିତ୍ରୀ ଓ ଛାତ୍ରୀମାନଙ୍କୁ ନେଇ ବିଭିନ୍ନ ପ୍ରକାର ଚାରା ରୋପଣ କରାଯାଇଥିଲା । ଉକ୍ତ କାର୍ଯ୍ୟକ୍ରମରେ ଅବସରପ୍ରାପ୍ତ ପ୍ରଶାସନିକ ଅଧିକାରୀ ଶ୍ରୀଯୁକ୍ତ ଦେବରାଜ ସେନାପତି ମୁଖ୍ୟ ଅତିଥି ଏବଂ ସି.ସି.ଏଫ୍. ଓଡ଼ିଶାର ଶ୍ରୀଯୁକ୍ତ ପ୍ରବୀର ମହାନ୍ତି ସମ୍ମାନିତ ଅତିଥି ଭାବେ ଯୋଗଦାନ କରି ସମ୍ପ୍ରତି ମନୁଷ୍ୟ ଦ୍ୱାରା ବୃକ୍ଷ ଛେଦନ ଫଳରେ ଜଙ୍ଗଲ ଆଜି ଧ୍ୱଂସାଭିମୁଖୀ । ପ୍ରତିଦିନ ଶହ ଶହ ବୃକ୍ଷ ବଳି ପଡୁଛନ୍ତି । ଛଅ ଋତୁ ଆଜି ସାତସପନ । ଜୈବ ବିବିଧତା ବି ଧ୍ୱଂସାଭିମୁଖୀ । ଜଙ୍ଗଲ ଧ୍ୱଂସ ଫଳରେ ପୃଥିବୀରେ ଦେଖା ଦେଇଛି ଅନେକ ସମସ୍ୟା । ସୃଷ୍ଟି ହେଉଛି ବିଶ୍ୱତାପନ ଆଉ ବୃଦ୍ଧି ପାଉଛି ପୃଥିବୀର ତାପମାତ୍ରା । ଗ୍ଲୋବାଲ ୱାର୍ମିଂର ପ୍ରଭାବ ମଣିଷର ଜୀବନକୁ ଦୁର୍ବିସହ କରିବାରେ ଲାଗିଛି । ଦେଖାଦେଇଛି ଭୂତଳ ଜଳସ୍ତର ହ୍ରାସ, ବିବର୍ତ୍ତମାନ ପରିବେଶ, ଜଳବାୟୁ ଓ ବିପର୍ଯ୍ୟୟମୁଖୀ ସବୁଜିମା ଜୀବଜଗତକୁ ଠେଲି ଦେଇଛି । ଜୀବଜଗତର ସୃଷ୍ଟି ଓ ସ୍ଥିତି ପାଇଁ ବନ ତଥା ବନ୍ୟଜନ୍ତୁଙ୍କର ଭୂମିକା ଗୁରୁତ୍ୱପୂର୍ଣ୍ଣ । ପ୍ରକୃତିକୁ ସୁରକ୍ଷିତ ରଖିଲେ ପ୍ରକୃତି ଆମକୁ ସୁରକ୍ଷା ଦେବ ବୋଲି ମତବ୍ୟକ୍ତ କରିଥିଲେ । କାର୍ଯ୍ୟକ୍ରମକୁ ନଳିନୀଦେବୀ ମହିଳା ମହାବିଦ୍ୟାଳୟର ଅଧ୍ୟକ୍ଷା ଜୟଶ୍ରୀ ମହାନ୍ତି, ପ୍ରତିମା ଦାସ, ଗାୟତ୍ରୀ ମହାନ୍ତି, ସବିତା ନାୟକ, ଜ୍ୟୋତ୍ସ୍ନା ପଟ୍ଟନାୟକ, ସୁଚରିତା ପରିଡ଼ା, ନମିତା ଦାସ, ସରିତା ପଟ୍ଟନାୟକ, କାଳିପ୍ରସାଦ ମିଶ୍ର, ହରପ୍ରସାଦ ମହାପାତ୍ର, ସୁଜାତା ମଲ୍ଲିକ, କଳ୍ପତରୁ ସେନାପତି, ସମାଜସେବୀ ସୁଧୀର ଭୂୟାଁ ପ୍ରମୁଖ ସହଯୋଗ କରିବା ସହିତ ସେପଟା, ପିଜୁଳି, ଚମ୍ପା, ଲିଚୁ, ଆତ ପ୍ରଭୃତି ଚାରା ରୋପଣ କରାଯାଇଥିଲା ।
