ସ୍ୱାସ୍ଥ୍ୟ ପାଇଁ ଉପକାରୀ ‘ଜହ୍ନି’

ଶସ୍ତା ପରିବା ଭିତରେ ଜହ୍ନି ଅନ୍ୟତମ । ଗାଁ ଗହଳିରେ ଲୋକମାନେ ନିଜ ବାଡ଼ିରେ ଜହ୍ନି ଚାଷ କରି ବେଶ୍ ଦୁଇ ପଇସା ରୋଜଗାର କରିଥାଆନ୍ତି । କେହି କେହି କେବଳ ଘରର ଆବଶ୍ୟକତା ଲାଗି ଜହ୍ନିକୁ ଭଜା, ତରକାରି, ପୋସ୍ତ ଭାବେ ପ୍ରସ୍ତୁତ କରି ଖାଦ୍ୟ ଭାବେ ବ୍ୟବହାର କରିଥାଆନ୍ତି । ଆଜିକାଲି ଖାଦ୍ୟପେୟରେ ଅନିୟମିତତା ଯୋଗୁ ନାନା ରୋଗ ଗ୍ରାସ କରୁଛି । ଅଧିକାଂଶ ଲୋକଙ୍କଠାରେ ଗ୍ୟାସ୍‌ଟ୍ରିକ୍‌, ହୃଦ୍‌ଜନିତ ରୋଗ, ଉଚ୍ଚ ରକ୍ତଚାପ, ମେଦବହୁଳତା ପରି ସମସ୍ୟା ଦେଖାଦେଉଛି । ତେବେ ଏଥିରୁ ମୁକ୍ତି ପାଇବା ପାଇଁ ଜହ୍ନି ମହୌଷଧି ପରି କାମ କରିଥାଏ । ପୋଷକତତ୍ତ୍ୱରେ ଭରପୂର ଜହ୍ନି ଖାଇଲେ ଅନେକ ରୋଗରୁ ମୁକ୍ତି ମିଳିବ । ସ୍ୱାସ୍ଥ୍ୟ ବିଶେଷଜ୍ଞଙ୍କ ମତରେ ଏଥିରେ ଭିଟାମିନ୍ ସି, କାର୍ବୋହାଇଡ୍ରେଟ୍‌, ପ୍ରୋଟିନ୍ ଏବଂ ଫାଇବର ରହିଛି । ଏଥିରେ ଥିବା ବି’ କମ୍ପେ୍ଲକ୍ସ ଏବଂ ଫଲିକ୍ ଏସିଡ୍ ଗର୍ଭବତୀଙ୍କ ପାଇଁ ବହୁତ ଲାଭଦାୟକ । ଏଥିରେ କ୍ୟାଲୋରୀ କମ୍ ରହିଛି । ଯାହା ଓଜନ ନିୟନ୍ତ୍ରଣ କରିବାରେ ସହାୟକ ହୋଇଥାଏ । ଜହ୍ନି ହୃଦ୍‌ରୋଗୀ ଏବଂ ଉଚ୍ଚ ରକ୍ତଚାପ ରୋଗୀଙ୍କ ପାଇଁ ସବୁଠୁ ଭଲ । ଏହାକୁ ଖାଦ୍ୟରେ ସାମିଲ କଲେ ଗ୍ୟାସ ଏବଂ ପାଚନ ସମ୍ବନ୍ଧୀୟ ସମସ୍ୟାରୁ ମୁକ୍ତି ମିଳିଥାଏ । ଏଥିରେ ଭିଟାମିନ୍ “ଏ’ ରହିଛି । ଏହାକୁ ଖାଇଲେ ଦୃଷ୍ଟିଶକ୍ତି ପ୍ରଖର ହୋଇଥାଏ ।