୧୨ୱାର୍ଡରେ ପ୍ରାର୍ଥୀପତ୍ର ଦାଖଲ ହେଲାନି

ହାଟଡିହି, (ବିକାଶ ବିଶ୍ୱାଳ) :-ହାଟଡିହି ବ୍ଲକର ବିଭିନ୍ନ ପଞ୍ଚାୟତରେ ୪୧୯ଟି ୱାର୍ଡ ଥିବାବେଳେ ସେଥିମଧ୍ୟରୁ ୧୨ଗୋଟି ୱାର୍ଡରେ କେହି ନାମାଙ୍କନପତ୍ର ଦାଖଲ କରିନଥିବା ଜଣାପଡିଛି । କେ.ବାଲିପାଳ ପଞ୍ଚାୟତର ୩ନଂ ୱାର୍ଡରେ କେହି ନାମାଙ୍କନପତ୍ର ଦାଖଲ କରିନଥିବାବେଳେ ଶାସଙ୍ଗର ୩ନଂ ଓ ୫ନମ୍ବର ୱାର୍ଡରେ କେହି ନାମାଙ୍କନପତ୍ର ଦାଖଲ କରିନାହାନ୍ତି । ୩ନଂ ୱାର୍ଡଟି ଅନୁସୁଚିତ ଜାତି ପାଇଁ ସଂରକ୍ଷିତ ଥିବାରୁ ଓ ସେଠାରେ ମାତ୍ର ଗୋଟିଏ ପରିବାର ଅନୁସୁଚିତ ଜାତିର ଥିବାବେଳେ ତାଙ୍କର କେହି ନାମାଙ୍କନ ଦାଖଲ କରିନଥିଲେ । ସେହିପରି ୫ନଂ ୱାର୍ଡରେ ମଧ୍ୟ ସମାନ ଅବସ୍ଥା । ଏହି ୱାର୍ଡଟି ଅନୁସୁଚିତ ଜନଜାତିଙ୍କ ପାଇଁ ସଂରକ୍ଷିତ ରଖାଯାଇଥିବାବେଳେ ଏହି ୱାର୍ଡରେ ମାତ୍ର ଗୋଟିଏ ପରିବାର ଅନୁସୁଚିତ ଜନଜାତିର ଅଛନ୍ତି । ଏହି ପରିବାରରୁ କେହି ନାମାଙ୍କନପତ୍ର ଦାଖଲ କରିବାକୁ ରାଜି ହୋଇ ନଥିଲେ । ସେହିପରି କଳିଗାଁ ପଞ୍ଚାୟତର ୪ନଂ ୱାର୍ଡ ସଂରକ୍ଷିତ ଥିବା କାରଣରୁ ସେଠାରେ ମାତ୍ର ସେହି ଯାତିର ଗୋଟିଏ ପରିବାର ଥିବାରୁ କେହି ନାମାଙ୍କନପତ୍ର ଦାଖଲ କରିନଥିଲେ । ଓରାଳିର ୮ନଂ ୱାର୍ଡ, ପଞ୍ଚୁଗୋଛିଆର ୨୦ନଂ ୱାର୍ଡ, ବଡରମ୍ପାସର ୧୩ନଂ ୱାର୍ଡ, ହାବଳେଶ୍ୱରର ୧୫ନଂ ୱାର୍ଡ, ଗେଡମାର ୯ନଂ ୱାର୍ଡ, ଆମ୍ବୋ ପଞ୍ଚାୟତର ୪ନଂ ୱାର୍ଡରେ କେହି ନାମାଙ୍କନପତ୍ର ଦାଖଲ କରିନାହାନ୍ତି । ସେହିପରି ପନ୍ଦାଡୋର ୧ନଂ ୱାର୍ଡଟି ଅନୁସୁଚିତ ଜନଜାତିର ମହିଳାଙ୍କ ପାଇଁ ଉଦ୍ଦିଷ୍ଟ ସ୍ଥାନରେ ଜଣେ ପୁରୁଷ ନାମାଙ୍କନପତ୍ର ଦାଖଲ କରିଥିବାରୁ ତାହା ନାକଚ ହୋଇଥିବାବେଳେ ଓ ୫ନଂ ୱାର୍ଡରେ କେହି ନାମାଙ୍କନପତ୍ର ଦାଖଲ କରିନାହାନ୍ତି ।