ଦୁଷ୍କର୍ମ ଅଭିଯୋଗରେ ଯୁବକ ଗିରଫ

କନ୍ଧମାଳ, (ସଞ୍ଜୟ କୁମାର ପାଣିଗ୍ରାହୀ):କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ଗୋଛାପଡା ଥାନା ବାଲନ୍ଦାପଡା ପଞ୍ଚାୟତର ତିତେରେପଳା ଗାଁରେ ଜଣେ ବିଧବା ମହିଳାଙ୍କୁ ସେହି ଗାଁର ଜଣେ ଯୁବକ ବିବାହର ମିଥ୍ୟା ପ୍ରତିଶୃତି ଦେଇ ଦୀର୍ଘ ବର୍ଷ ଧରି ତାଙ୍କ ସହ ବାରମ୍ବାର ଦୁଷ୍କର୍ମ କରିବା ଅଭିଯୋଗରେ ଗୋଛାପଡା ପୁଲିସ ଗିରଫ କରି ଜେଲ ପଠାଇଛି। ସୂଚନା ଅନୁସାରେ ଗୋଛାପଡା ଥାନା ଅନ୍ତର୍ଗତ ଖଜୁରୀ ଗାଁର ଜଣେ ବିଧବା ମହିଳା ସେହି ତିତେରେପଳା ଗାଁର କର୍ଣ୍ଣ ଦିଗାଲ ନାମକ ଜଣେ ବ୍ୟକ୍ତିଙ୍କୁ ବିବାହ କରିଥିଲେ। ତେବେ ଗତ ୨୦୦୮ରେ ସ୍ୱାମୀ କର୍ଣ୍ଣ ଦିଗାଲଙ୍କ ହଠାତ ମୃତ୍ୟୁ ହୋଇଥିଲା। କର୍ଣ୍ଣଙ୍କ ମୃତ୍ୟୁ ପରେ ସେହି ତିତେରେପଳା ଗାଁର ଅଭିଯୁକ୍ତ ସନିଆ ଦିଗାଲଙ୍କର ସମ୍ପୃକ୍ତ ବିଧବା ମହିଳାଙ୍କ ସହ ପ୍ରେମ ସମ୍ପର୍କ ଗଢି ଉଠିଥିଲା। ଅଭିଯୁକ୍ତ ଜଣକ ସମ୍ପୃକ୍ତ ବିଧବା ମହିଳାଙ୍କୁ ବିବାହର ପ୍ରତିଶୃତି ଦେଇ ତାଙ୍କ ସହ ଦୀର୍ଘ ଦିନ ପର୍ଯ୍ୟନ୍ତ ଶାରୀରିକ ସମ୍ପର୍କ ସ୍ଥାପନ କରିଥିଲା। ଉଭୟଙ୍କ ସମ୍ପର୍କ ବିଷୟରେ ଗ୍ରାମବାସୀ ଜାଣିବା ପରେ ଗାଁରେ ଏକ ବୈଠକ କରି ଅଭିଯୁକ୍ତ ସନିଆ ଦିଗାଲକୁ ନିଜ ଜାତି କୁଳର ପରମ୍ପରା ଅନୁସାରେ ଦଣ୍ଡ ଦେବା ସହ ସମ୍ପୃକ୍ତ ବିଧବା ମହିଳାଙ୍କୁ ବିବାହ କରିବା ପାଇଁ କହିଥିଲେ। ତଥାପି ଅଭିଯୁକ୍ତ ଜଣକ ସମ୍ପୃକ୍ତ ବିଧବା ମହିଳାଙ୍କୁ ଠକି ଚାଲିବା ସହ ତାଙ୍କ ସହ ବାରମ୍ବାର ଶାରୀରିକ ସମର୍କ ରଖି ଚାଲିଥିଲା। ଶେଷରେ ବିଧବା ମହିଳା ଜଣକ ଅଭିଯୁକ୍ତ ଯୁବକର ମିଥ୍ୟା ପ୍ରତିଶୃତିରେ ଅତିଷ୍ଟ ହୋଇ ଗୋଛାପଡା ଥାନାରେ ଏକ ଲିଖିତ ଏତଲା ଦେଇଥିଲେ।