ସବୁଜ ବାହିନୀ ପକ୍ଷରୁ “ଜଙ୍ଗଲ ପାଇଁ ମଞ୍ଜି ଟିଏ” କାର୍ଯ୍ୟକ୍ରମ

ଗଞ୍ଜାମ,  (ଯୁଗାବ୍ଦ ନ୍ୟୁଜ):ଛତ୍ରପୁର ସହର ଉପକଣ୍ଠରେ ଥିବା ମା ରାମଚଣ୍ଡୀଙ୍କ ମନ୍ଦିର ଠାରେ ଜଙ୍ଗଲ ପାଇଁ ମଞ୍ଜି ଟିଏ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏହି ଅବସରରେ ଏହାର ନିକଟରେ ଥିବା ଏକ ଲଣ୍ଡା ପାହାଡ ଉପରେ ସବୁଜ ବାହିନୀ ପକ୍ଷରୁ ଏକ ହଜାରରୁ ଉର୍ଦ୍ଧ୍ବ ଛୋଟ ଛୋଟ ଗାତ କରାଯାଇ ଖତ ସହ ବିଭିନ୍ନ ପ୍ରକାରର ମଞ୍ଜି ଯଥା ଆମ୍ବ, ପଣସ, ତେନ୍ତୁଳି, ବେଲ, ଖୁଜୁରୀ ଇତ୍ୟାଦି ପୋତା ଯାଇଥିଲା। ବର୍ତ୍ତମାନ ପୃଥିବୀରେ ଜଙ୍ଗଲ ଅବକ୍ଷୟର ମାତ୍ରା ଦିନକୁ ଦିନ ବୃଦ୍ଧି ପାଇବାରେ ଲାଗିଛି, ଅନେକ ପାହାଡ଼ ପର୍ବତ ବୃକ୍ଷ ହୀନ ହୋଇପଡିଛି l ପ୍ରକୃତି ତାର ସନ୍ତାନ ମାନଙ୍କ ସୁରକ୍ଷା ଯେତେ ଦୂର ସମ୍ଭବ କରୁଛି କିନ୍ତୁ ମନୁଷ୍ୟ ମଧ୍ୟ ପ୍ରକୃତି ସୁରକ୍ଷାକୁ ନିଜର ଦାୟିତ୍ୱ ବୋଲି ଭାବି ପ୍ରକୃତି କୁ ସହଯୋଗ କରିବା ଆବଶ୍ୟକ l ପ୍ରତ୍ୟେକ ଦିନ ଆମେ ଖାଦ୍ୟ ଭାବରେ ଆମ୍ବ, ପଣସ, ତେନ୍ତୁଳି, ଖଜୁରୀ, ବରକୋଳି, ଜାମୁ କୋଳି, ବେଲ ଏମିତି ଅନେକ ଫଳ ବ୍ୟବହାର କରୁଛନ୍ତି । ଏହାକୁ ଖାଇବା ପରେ ତାର ମଞ୍ଜିକୁ ଏଣେ ତେଣେ ଫୋପାଡ଼ି ଦେଉଛନ୍ତି ତାହା ଗଛ ହେଲେ ମଧ୍ୟ ଦୀର୍ଘାୟୁ ହେଉନାହିଁ l ଘରୁ ଦୈନିଦିନ ବ୍ୟବହାରରୁ ବାହାରୁଥିବା ବିଭିନ୍ନ ମଞ୍ଜି ସଂଗ୍ରହ କରି କିପରି ନୂତନ ଜଙ୍ଗଲ ସୃଷ୍ଟି କରିପାରିବା ତା ଉପରେ ପୂର୍ବରୁ “ଜଙ୍ଗଲ ପାଇଁ ମଞ୍ଜି ଟିଏ “କାର୍ଯ୍ୟକ୍ରମ କରାଯାଇଥିଲା। ଏହା ଦ୍ବାରା ସହରର ବିଭିନ୍ନ ସଙ୍ଗଠନ ଦ୍ବାରା ସଂଗୃହିତ କରାଯାଇ ଥିବା ମଞ୍ଜି ଗୁଡ଼ିକୁ ଆଜି ସଙ୍ଗଠନର ସଦସ୍ୟ ମାନଙ୍କ ସାହାଯ୍ୟରେ ପୋତା ଯାଇଥିଲା । ଆଗମୀ ଦିନରେ ବର୍ଷା ଋତୁ ଆଗମନ ପୂର୍ବରୁ ବିଭିନ୍ନ ଲଣ୍ଡା ପାହାଡ ଏମିତି ଅନେକ ମଞ୍ଜି ପୋତା ଯିବ ପାଇଁ ସ୍ଥିର କରାଯାଇଛି । ଏହି ଅଭିଯାନରେ ସବୁଜ ବାହିନୀର ସଭାପତି ଶିବରାମ ପାଣିଗ୍ରାହୀ, ସାମ୍ବାଦିକ ସ୍ଵାଧୀନ ସାହୁ, ସାପ ଉଦ୍ଧାରକ ରାମ ପାତ୍ର, ପି ଵିନୋଦ, ସୁଜୀତ୍ ଗୌଡ, ସାଗର ପ୍ରସାଦ ପାତ୍ର,ବାଲାଜୀ ବେହେରା, ବିନାୟକ ପ୍ରଧାନ,ପ୍ରବୀଣ ନାୟକ, ଆକାଶ ରାଉତ୍, ଜୟ ଗୌଡ଼ ପ୍ରମୁଖ ଯୋଗଦେଇ କାର୍ଯ୍ୟକ୍ରମ ପରିଚାଳନା କରିଥିଲେ l