ଧନଦାତ୍ରୀ ମା ମହାଲକ୍ଷ୍ମୀଙ୍କ ଆଗମନରେ ଆସିକା ବଜାର ସାହି ଉତ୍ସବମୁଖର
ଆସିକା (ୱାଇଏନ୍ଏସ୍): ପୂର୍ବବର୍ଷ ମାନଙ୍କ ଭଳି ଚଳିତବର୍ଷ ମଧ୍ୟ ଆସିକା ଏନଏସି ଅନ୍ତର୍ଗତ ୫ନମ୍ବର ୱାର୍ଡ ବଜାର ସାହିରେ ଏକ ଆଧ୍ୟାତ୍ମିକମୟ ପରିବେଶ ମଧ୍ୟରେ ଧନଦାତ୍ରୀ ମା ମହାଲକ୍ଷ୍ମୀଙ୍କ ପୂଜା ଆରମ୍ଭ ହୋଇଥିଲା ବେଳେ ଏଥିପାଇଁ ସମଗ୍ର ଅଞ୍ଚଳ ଉତ୍ସବମୁଖର ହୋଇପଡିଥିବା ଲକ୍ଷ୍ୟ କରାଯାଇଛି । ବଜାର ସାହିରେ ପୂଜା ପାଉଥିବା ଧନଦାତ୍ରୀ ମା ମହାଲକ୍ଷ୍ମୀଙ୍କୁ ଆରାଧନା କରିବା ଲାଗି ସକାଳୁ ସନ୍ଧ୍ୟା ଯାଏଁ ଅସ୍ଥାୟୀ ପୂଜା ମଣ୍ଡପରେ ଶ୍ରଦ୍ଧାଳୁ ଭକ୍ତଙ୍କ ଭିଡ ଜମୁଥିବା ବେଳେ କବିସୂର୍ଯ୍ୟନଗର ନିକଟସ୍ଥ ଜରଡ ଗ୍ରାମର ବିଦ୍ୱାନ ପଣ୍ଡିତ ସନ୍ତୋଷ କୁମାର ତ୍ରିପାଠୀ ଓ ସହଯୋଗୀ ପଣ୍ଡିତ ବଟକୃଷ୍ଣ ମହାପାତ୍ରଙ୍କ ମନ୍ତ୍ରୋଚାରଣରେ ସ୍ଥାନୀୟ ଅଞ୍ଚଳ ପ୍ରକମ୍ପିତ ହୋଇପଡୁଥିବା ଦେଖିବାକୁ ମିଳୁଛି । ସମଗ୍ର ବଜାର ସାହି ବାସିନ୍ଦା ଭକ୍ତି ଭାବନାର ଡୋରିରେ ବନ୍ଧା ହୋଇ ଧନଦାତ୍ରୀ ମା ମହାଲକ୍ଷ୍ମୀଙ୍କ ଆରାଧନାରେ ନିମଗ୍ନ ରହିଛନ୍ତି । ସୁସଜ୍ଜିତ କଳାକୁଞ୍ଜ ସାଙ୍ଗକୁ ରଙ୍ଗୀନ ଆଲୋକମାଳାରେ ଝଲସି ଉଠୁଛି ଧନଦାତ୍ରୀ ମା’ ମହାଲକ୍ଷ୍ମୀଙ୍କ ଅସ୍ଥାୟୀ ପୂଜା ମଣ୍ଡପ । ଧନଦାତ୍ରୀ ମା ମହାଲକ୍ଷ୍ମୀଙ୍କ ପୂଜା ଅବସରରେ ସନ୍ଧ୍ୟାରେ ଅସ୍ଥାୟୀ ପୂଜା ମଣ୍ଡପରେ ଅନୁଷ୍ଠିତ ହୋଇଥିବା ସନ୍ଧ୍ୟା ଆଳତୀ କାର୍ଯ୍ୟକ୍ରମରେ ଶ୍ରଦ୍ଧାଳୁ ଭକ୍ତଙ୍କ ପ୍ରବଳ ଭିଡ ଜମିଥିବା ଦେଖିବାକୁ ମିଳିଥିଲା । ଧନଦାତ୍ରୀ ମା ମହାଲକ୍ଷ୍ମୀଙ୍କ ପୂଜା ପାଇଁ ଅଞ୍ଚଳବାସୀ ମନରେ ଉତ୍କଣ୍ଠା ଦେଖାଦେଇଥିଲା ବେଳେ ଅତ୍ୟନ୍ତ ନିଷ୍ଠା ଓ ଶ୍ରଦ୍ଧାର ସହ ଶ୍ରଦ୍ଧାଳୁ ଭକ୍ତମାନେ ପୂଜାର୍ଚ୍ଚନାରେ ନିମଗ୍ନ ରହିଥିବା ଦେଖିବାକୁ ମିଳୁଛି। ମାର୍ଗଶିର ମାସ ଚତୁର୍ଥ ଗୁରବାର ଅବସରରେ ଐତିହ୍ୟ ଓ ଭାଇଚାରାର ସାହି ରୂପେ ପରିଚିତ ଥିବା ଆସିକା ଏନ୍ଏସି ଅଧୀନସ୍ଥ ବଜାରସାହିରେ ମା ମହାଲକ୍ଷ୍ମୀଙ୍କ ପୂଜା ଏକ ଆଧ୍ୟାତ୍ମିକ ପରିବେଶ ମଧ୍ୟରେ ଆରମ୍ଭ ହୋଇଥିଲା ବେଳେ ପ୍ରଥମ ଦିବସରେ କର୍ତ୍ତା ରୂପେ ଯୁବ ଆଧ୍ୟାତ୍ମିକପ୍ରେମୀ ଦେବାଶିଷ ପଣ୍ଡା ଓ ତାଙ୍କ ସହଧର୍ମିଣୀ ରାଜଲକ୍ଷ୍ମୀ ଚୌଧୁରୀ ନିଷ୍ଠାର ସହ ରହି ଦାୟିତ୍ୱ ନିର୍ବାହ କରିଥିଲେ । ପୂର୍ବବର୍ଷମାନଙ୍କ ଭଳି ଚଳିତବର୍ଷ ମଧ୍ୟ ଆସିକା ଏନ୍ଏସି ଅଧୀନସ୍ଥ ବଜାରସାହିର ମା ମହାଲକ୍ଷ୍ମୀଙ୍କ ପୂଜା ଅବସରରେ ସୁସଜ୍ଜିତ ପୂଜା ମଣ୍ଡପ ସାଙ୍ଗକୁ ଆକର୍ଷଣୀୟ ତୋରଣ ଅଞ୍ଚଳର ଶୋଭାକୁ ଅତିମାତ୍ରା ବୃଦ୍ଧି କରିଥିବା ଲକ୍ଷ୍ୟ କରାଯାଇଛି। ଧନଧାତ୍ରୀ ମା ମହାଲକ୍ଷ୍ମୀଙ୍କ ଏହି ପୂଜାକୁ ସୁପରିଚାଳନା କରିବା ଦିଗରେ ଆଧ୍ୟାତ୍ମିକପ୍ରେମୀ ଦେବାଶିଷ ପଣ୍ଡା, କୃଷ୍ଣଚନ୍ଦ୍ର ନାୟକ, ଶଙ୍କର ମୁନି, ପି.ଶ୍ରୀନିବାସ ପାତ୍ର, ପି.ତିରୁପତି ପାତ୍ର, ପି.ସୁଧାକର ପାତ୍ର, ସଂଜୟ ଆଚାରୀ, ଜିତେନ୍ଦ୍ର କୁମାର ମହାରଣା, ଚଣ୍ଟି ଆଚାରୀ, କାମେଶ୍ୱର ଆଚାରୀ, ଆର୍.ଚିଦାନନ୍ଦ ଆଚାରୀ, ପି.ସୁଶାନ୍ତ କୁମାର ପାତ୍ର, ରମେଶ ଚନ୍ଦ୍ର ପଣ୍ଡା, ପି.କାହ୍ନୁ ପାତ୍ର, ପି.ପ୍ରଦୀପ କୁମାର ପାତ୍ର, ରାଜୀବ ଆଚାରୀ, ପି.ଶୁଭମ୍ ପାତ୍ର, ପି.ସ୍ୱୟମ୍ ପାତ୍ର, ପି.ମାଲାଡୁ ପାତ୍ର, ପି.ସିମାଞ୍ଚଳ ପାତ୍ର, ପି.ସୁଶାନ୍ତ କୁମାର ପାତ୍ରଙ୍କ ସମେତ ସ୍ତାନୀୟ ସାହିବାସିନ୍ଦା ଆଗେଇ ଆସିଥିବା ଲକ୍ଷ୍ୟ କରାଯାଇଛି।
