ପୂର୍ତ୍ତ ଡିଭିଜନର ଦୁର୍ନୀତି ଲୁଚାଇବା ଉଦ୍ୟମ: ମିଥ୍ୟା ଖବର ପ୍ରସାରଣକୁ ନେଇ ଥାନାରେ ଏତଲା
କେନ୍ଦ୍ରାପଡ଼ା,(ଚିତ୍ତ ରଞ୍ଜନ ଦାଶ):କେନ୍ଦ୍ରାପଡା ପୂର୍ତ୍ତ ଡିଭିଜନ – ୨ କରିଥିବା ଦୁର୍ନୀତିକୁ ଲୁଚାଇବାକୁ ଯାଇ ସୂଚନା ଅଧିକାର ଆଇନରେ ସମ୍ପୂର୍ଣ ତଥ୍ୟ ପ୍ରଦାନ କରିନଥିବା ବେଳେ ଆଦେଦନକାରୀଙ୍କ ବିରୋଧରେ ମିଥ୍ୟା ଅଭିଯୋଗ କରା ଯାଇଛି। ସେହି ମିଥ୍ୟା ଅଭିଯୋଗକୁ ତର୍ଜମା ନକରି କେତେକ ନିର୍ଦ୍ଦିଷ୍ଟ ଖବର କାଗଜରେ ମିଥ୍ୟା ଖବର ପ୍ରସାରଣ କରାଯାଇଛି। ଫଳରେ ଆବେଦନକାରୀ ମାନସିକ ଭାବେ ନିର୍ଯ୍ୟାତନା ପାଇଥିବାରୁ ଏନେଇ ସେ ଆଳି ଥାନାରେ ଲିଖିତ ଅଭିଯୋଗ କରିଛନ୍ତି। କେନ୍ଦ୍ରାପଡା ଜିଲ୍ଲା ଅଧିନ ମହୁ ଗ୍ରାମର ପଦ୍ମନାଭ ଆଚାର୍ଯ୍ୟଙ୍କ ପୁତ୍ର ଆଭିଯୋଗକାରୀ ଓଡ଼ିଶା ସୂଚନା ଅଧିକାର ଅଭିଯାନ ସଦସ୍ୟ ତଥା ସାମ୍ବାଦିକ ଦୁଷ୍ମନ୍ତ ନାରାୟଣ ଆଚାର୍ଯ୍ୟ କରିଥିବା ଅଭିଯୋଗରୁ ପ୍ରକାଶ ଯେ କେନ୍ଦ୍ରାପଡା ପୂର୍ତ୍ତ ଡ଼ିଭିଜନ-୨ ପକ୍ଷରୁ ମହାକାଳପଡା ବ୍ଲକ ଅନ୍ତର୍ଗତ କରଞ୍ଜ ଠାରୁ ଦହିମାଛ ଭାୟା ଗୋଖାପଡା ରାସ୍ତାର ଉନ୍ନତି କରଣ କାର୍ଯ୍ୟ ଅତ୍ୟନ୍ତ ନିମ୍ନମାନର କରାଯାଇ ବ୍ୟାପକ ଦୁର୍ନୀତି ହୋଇଛି। ଫଳରେ ସରକାରଙ୍କ କୋଟି କୋଟି ଟଙ୍କାର ଅନୁଦାନକୁ ବାଟ ମାରଣା କରି ହରିଲୁଟ କରାଯାଇଥିବା ନେଇ ଗ୍ରାମବାସୀଙ୍କ ପକ୍ଷରୁ ଲିଖିତ ଅଭିଯୋଗ ପରେ ନ୍ୟାୟ ନମିଳିବାରୁ ସେହି ଦୁର୍ନୀତି ର କାଗଜାତ୍ ପ୍ରମାଣ ନିମିତ୍ତ ସୂଚନା ଅଧିକାର ଆଇନରେ ତଥ୍ୟ ପାଇଁ ସେମାନେ ଦୁଷ୍ମନ୍ତଙ୍କୁ ନିବେଦନ କରିଥିଲେ। ସୂଚନା ଅଧିକାର ଆଇନ ଅନୁଯାଇ ଦୁଷ୍ମନ୍ତ ଆବେଦନ କରିଥିଲେ ବି ତାଙ୍କୁ ପୂର୍ତ୍ତ ବିଭାଗ ସମ୍ପୂର୍ଣ୍ଣ ତଥ୍ୟ ପ୍ରଦାନ କରିଲେ ନାହିଁ। ଫଳରେ ଆଇନ ଅନୁଯାୟୀ ସେ ପ୍ରଥମ ଅପିଲ କରିଲେ। ତଥାପି ତାଙ୍କୁ ସମ୍ପୂର୍ଣ ତଥ୍ୟ ପ୍ରଦାନ କରାଗଲା ନାହିଁ। କାରଣ ଉକ୍ତ ରାସ୍ତା ନିର୍ମାଣରେ ବ୍ୟାପକ ଦୁର୍ନୀତି କରାଯାଇଥିବା ବେଳେ ସେହି ଦୁର୍ନୀତିକୁ ଚପାଇ ରଖିବାକୁ ତାଙ୍କୁ ସମ୍ପୂର୍ଣ ନିର୍ଭୁଲ ତଥ୍ୟ ପ୍ରଦାନ କରାଗଲା ନାହିଁ ବୋଲି ମଧ୍ୟ ସେ ଲିଖିତ ଅଭିଯୋଗ କରିଛନ୍ତି । ପୂର୍ତ୍ତ ଡିଭିଜନ -୨ ପକ୍ଷରୁ ତାଙ୍କୁ ରାସ୍ତାର ନମୁନା ମଧ୍ୟ ପ୍ରଦାନ କରାଗଲା ନାହିଁ। ପୂର୍ତ୍ତ ଡ଼ିଭିଜନ-୨ର ଅଧୀକ୍ଷଣ ଯନ୍ତ୍ରୀ ଓ ମହାକାଳପଡା ପୂର୍ତ୍ତର୍ ସବଡିଭିଜନ୍ର ଅଧିକାରୀଙ୍କ ସମେତ ଅନ୍ୟ କର୍ମଚାରୀ ମାନେ ମିଳିତ ଭାବେ ଉକ୍ତ କାର୍ଯ୍ୟ କରିଥିବା ଠିକାଦାରକୁ ଅସ୍ତ୍ର କରି ମହାକାଳପଡ଼ା , କରିଲୋ ପାଟଣା ଓ ମହାକାଳପଡ଼ାର ଦୁଇ ଜଣ ସାମ୍ବାଦିକ ସମେତ ଅନ୍ୟଜଣେ ଠିକାଦରଙ୍କ ସମ୍ପର୍କୀୟଙ୍କ ମାଧ୍ୟମରେ ଦୁଷ୍ମନ୍ତଙ୍କୁ ଚୁପ୍ କରାଇବାକୁ ଚେଷ୍ଟା କରିଥିଲେ। କିନ୍ତୁ ସେଥିରେ ସେମାନେ ବିଫଳ ହେଲେ। ଏହାପରେ ସଂପୃକ୍ତ ଠିକାଦାରଙ୍କ ସାହାଯ୍ୟରେ କିଛି ଅସାଧୁ ବ୍ୟକ୍ତିଙ୍କୁ ହାତବାରିଶ କରି ନିଜ କଳା କାରନାମାକୁ ଲୁଚାଇ ରଖିବାକୁ ଦୁଷ୍ମନ୍ତଙ୍କ ବିରୋଧରେ ଷଡ଼ଯନ୍ତ୍ର ରଚି ସଂପୃକ୍ତ ଠିକାଦାରକୁ ଦୁଷ୍ମନ୍ତ ଟଙ୍କା ମାଗିଥିବା ନେଇ ଏକ ମିଛ ଅଭିଯୋଗ କରାଇ ବିନା ପ୍ରମାଣ ଓ ଅଭିଯୋଗ ଟିକୁ ତର୍ଜମା ନକରି ମିଥ୍ୟା ଖବର ପ୍ରସାରଣ କରାଇଛନ୍ତି। ସେହି ମିଥ୍ୟା ଅଭିଯୋଗକୁ ଆଧାର କରି ତୁଳସୀକ୍ଷେତ୍ର ଖବରକାଗଜ ଓ ୱେବ ମିଡିଆରେ ଦୁଷ୍ମନ୍ତଙ୍କ ଫଟୋ ବସାଇ ଖବର ପ୍ରସାରଣ କରାଯାଇଛି। ଏଭଳି ଏକ ଆକ୍ରୋଶ ମୂଳକ ଖବର ପ୍ରସାରଣ ସମ୍ପୂର୍ଣ ବେଆଇନ ତଥା ଦୁଷ୍ମନ୍ତଙ୍କ ମୌଳିକ ଅଧିକାରକୁ କ୍ଷୁର୍ଣ୍ଣ ଓ ମାନ ସମ୍ମାନ ହାନି କରି ମାନସିକ ନିର୍ଯ୍ୟାତନା ଦିଆଯାଇଥିବାରୁ ଏଥିରେ ସଂପୃକ୍ତ ସମସ୍ତ ଦୋଷୀ ଓ ଷଡ଼ଯନ୍ତ୍ର କାରୀଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ଦୁଷ୍ମନ୍ତ ସମସ୍ତ ତଥ୍ୟ ଓ ପ୍ରମାଣ ପ୍ରଦାନ କରି ଆଳି ଥାନାରେ ଲିଖିତ ଅଭିଯୋଗ କରିଛନ୍ତି । ତାଙ୍କ ଜୀବନ ପ୍ରତି ଥିବା ବିପଦକୁ ଲକ୍ଷ ରଖି ତାଙ୍କୁ ଆଇନଗତ ସୁରକ୍ଷା ଯୋଗାଇ ଦେବାକୁ ମଧ୍ୟ ସେ ନିବେଦନ ମଧ୍ୟ କରିଛନ୍ତି। ତାଙ୍କୁ ଆଇନଗତ ସୁରକ୍ଷା ପ୍ରଦାନ ସହିତ ଦୁଷ୍ମନ୍ତ କରିଥିବା ଅଭିଯୋଗରେ ଏକ ଉଚ୍ଚ ସ୍ତରୀୟ ତଦନ୍ତ କରି ସମସ୍ତ ଦୋଷୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ପୂର୍ବକ ତାଙ୍କୁ ନ୍ୟାୟ ପ୍ରଦାନ ନିମନ୍ତେ ଆଜି କେନ୍ଦ୍ରାପଡା ଜିଲ୍ଲାପାଳଙ୍କ ସମେତ କେନ୍ଦ୍ରାପଡା ଏସ.ପି, ପୋଲିସ ମହାନିର୍ଦ୍ଦେଶକ, ମୁଖ୍ୟମନ୍ତ୍ରୀ ଏବଂ ଦୁଷ୍ମନ୍ତଙ୍କ ମାନବିକ ଅଧିକାର କ୍ଷୁର୍ଣ୍ଣ ହୋଇଥିବାରୁ ରାଜ୍ୟ ୃମାନବିକ ଅଧିକାର ଆୟୋଗଙ୍କ ନିକଟରେ ସେ ଲିଖିତ ଅଭିଯୋଗ କରିଥିବା ସୂଚନା ଦେଇଛନ୍ତି।
