ରାୟଗଡ଼ା ନିୟମଗିରିର ଏସଆଇଆର–୨୦୨୬ ସଚେତନତା ଅଭିଯାନ

ରାୟଗଡ଼ା, ୦୩/୦୬ (ଯୋଗେଶ୍ୱର ଦାସ): ପାହାଡ଼, ଜଙ୍ଗଲ ଏବଂ ଭାଷାଗତ ପ୍ରତିବନ୍ଧକତାକୁ ଅତିକ୍ରମ କରି ରାୟଗଡ଼ ଜିଲ୍ଲା ପ୍ରଶାସନ ପକ୍ଷରୁ ସ୍ୱତନ୍ତ୍ର ସଘନ ସଂଶୋଧନ ( ଏସଆଇଆର-୨୦୨୬) ପ୍ରକ୍ରିୟାକୁ ନିୟମଗିରି ପାହାଡ଼ ଅଞ୍ଚଳର ଦୁର୍ଗମ ଫାକେରୀ ଗ୍ରାମରେ ବସବାସ କରୁଥିବା ଡୋଙ୍ଗରିଆ କନ୍ଧ ପିଭିଟିଜି ସମୁଦାୟଙ୍କ ନିକଟରେ ପହଞ୍ଚାଯାଇଛି। ରାୟଗଡ଼ ଜିଲ୍ଲାର ୧୩୯–ବିଷମକଟକ ବିଧାନସଭା କ୍ଷେତ୍ର ଅନ୍ତର୍ଗତ ଏହି ଗ୍ରାମରେ ମତଦାତା ସଚେତନତା ଏବଂ ଏନ୍ୟୁମେରେସନ୍ ଫର୍ମ ବଣ୍ଟନ କାର୍ଯ୍ୟକୁ ସଫଳ କରିବା ପାଇଁ ପ୍ରଶାସନ ପକ୍ଷରୁ ଏହି ପଦକ୍ଷେପ ଗ୍ରହଣ କରାଯାଇଥିଲା। ରାୟଗଡ଼ର ଅତିରିକ୍ତ ଜିଲ୍ଲାପାଳ ଶ୍ରୀ ନବୀନ ଚନ୍ଦ୍ର ନାୟକଙ୍କ ନେତୃତ୍ୱରେ କେ.ସିଂହପୁର ବ୍ଲକର ବିଡିଓ ଶ୍ରୀମତୀ ମନୀଷା ଦାଶ, ସହକାରୀ ଜିଲ୍ଲାପାଳ ଶ୍ରୀ ଶିବ ପ୍ରସାଦ ସାହୁ ଏବଂ କେ.ସିଂହପୁରର ପିଇଓ ଶ୍ରୀ ଶ୍ୱେତାମ୍ବର ପ୍ରଧାନ ଫାକେରୀ ଗ୍ରାମ ପରିଦର୍ଶନ କରିଥିଲେ। ଏହି ଅବସରରେ ଗ୍ରାମର ସରପଞ୍ଚ ଡୋଙ୍ଗରିଆ କନ୍ଧ ଭାଷାରେ ଲୋକମାନଙ୍କ ସହ ଆଲୋଚନା କରି ଏସଆଇଆର–୨୦୨୬ର ଉଦ୍ଦେଶ୍ୟ, ଗୁରୁତ୍ୱ ଏବଂ ପ୍ରକ୍ରିୟା ସମ୍ପର୍କରେ ସଚେତନ କରିଥିଲେ। ସେହିପରି ଏନ୍ୟୁମେରେସନ୍ ଫର୍ମ ବଣ୍ଟନ ଏବଂ ପୂରଣ କାର୍ଯ୍ୟକୁ ମଧ୍ୟ ସୁଗମ କରାଯାଇଥିଲା। ପ୍ରଶାସନର ଏହି ପ୍ରୟାସ ଦ୍ୱାରା ଦୁର୍ଗମ ଅଞ୍ଚଳର ଆଦିବାସୀ ସମୁଦାୟଙ୍କୁ ଗଣତାନ୍ତ୍ରିକ ପ୍ରକ୍ରିୟା ସହ ଅଧିକ ସଂଯୁକ୍ତ କରାଯାଇପାରିଛି। ଲୋକଙ୍କ ନିଜସ୍ୱ ଭାଷାରେ ସଚେତନତା ସୃଷ୍ଟି କରିବା ଫଳରେ ସେମାନଙ୍କ ମଧ୍ୟରେ ଏସଆଇଆର–୨୦୨୬ ପ୍ରତି ଆଗ୍ରହ ଏବଂ ସହଭାଗିତା ବୃଦ୍ଧି ପାଇଛି। ପ୍ରତ୍ୟେକ ମତଦାତା ଗୁରୁତ୍ୱପୂର୍ଣ୍ଣ ଏବଂ ପ୍ରତ୍ୟେକ କଣ୍ଠସ୍ୱର ମୂଲ୍ୟବାନ ବୋଲି ବିଶ୍ୱାସ ରଖି ରାୟଗଡ଼ ଜିଲ୍ଲା ପ୍ରଶାସନ ଏସଆଇଆର୍–୨୦୨୬ ପ୍ରକ୍ରିୟାରେ ସମସ୍ତଙ୍କ ସହଭାଗିତା ସୁନିଶ୍ଚିତ କରିବା ଦିଗରେ ନିରନ୍ତର ପଦକ୍ଷେପ ଗ୍ରହଣ କରୁଛି।