ରାସ୍ତା କାମକୁ ନେଇ ଅନିୟମିତତା ଅଭିଯୋଗ

ସିନାପାଲି,(ଲିଲାମ୍ବର ନାଗ): ଗ୍ରାମାଞ୍ଚଳର ବିକାଶ ପାଇଁ ସରକାର ବିଭିନ୍ନ ଯୋଜନାରେ ପ୍ରତିବର୍ଷ ଲକ୍ଷାଧିକ ଟଙ୍କା ବ୍ୟୟ କରୁଛନ୍ତି। ଗ୍ରାମବାସୀଙ୍କୁ ଉନ୍ନତ ଯୋଗାଯୋଗ ବ୍ୟବସ୍ଥା ଯୋଗାଇ ଦେବା ଉଦ୍ଦେଶ୍ୟରେ ରାସ୍ତା, ପୋଲ, କଲଭର୍ଟ ଓ ଅନ୍ୟାନ୍ୟ ବିକାଶମୂଳକ କାର୍ଯ୍ୟ କରାଯାଉଛି। କିନ୍ତୁ କେତେକ ସ୍ଥାନରେ ଏହି କାର୍ଯ୍ୟଗୁଡ଼ିକର ମାନ ଓ ସ୍ୱଚ୍ଛତାକୁ ନେଇ ପ୍ରଶ୍ନ ଉଠୁଥିବା ବେଳେ, ନୂଆପଡ଼ା ଜିଲ୍ଲା ସିନାପାଲି ବ୍ଲକ କରଣବାହେଲି ପଞ୍ଚାୟତ ଅନ୍ତର୍ଗତ ବାଦୀବାହାଲରୁ ତିଳେଇମାଲ ରାସ୍ତାର ମୁରୁମ ଓ ମେଟାଲିଂ କାର୍ଯ୍ୟକୁ ନେଇ ମଧ୍ୟ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର ଧରିଛି। ଘଟଣାସ୍ଥଳରେ ଲାଗିଥିବା ସୂଚନା ଫଳକ ଅନୁଯାୟୀ, ଉକ୍ତ କାର୍ଯ୍ୟର ଅଟକଳ ମୂଲ୍ୟ ୧୧ ଲକ୍ଷ ୫ ହଜାର ୨୫୫ ଟଙ୍କା ରହିଛି। ଫଳକରେ କାର୍ଯ୍ୟର ନାମ, ଯୋଜନା, ଅନୁମୋଦିତ ଅର୍ଥରାଶି ଏବଂ ଅନ୍ୟାନ୍ୟ ବିବରଣୀ ଉଲ୍ଲେଖ ରହିଥିବା ବେଳେ, ସ୍ଥାନୀୟ ଲୋକଙ୍କ ଅଭିଯୋଗ ଅନୁଯାୟୀ ବାସ୍ତବରେ ସେହି ଅର୍ଥରାଶି ଅନୁସାରେ କାର୍ଯ୍ୟ ହୋଇଛି କି ନାହିଁ, ତାହାର ନିରପେକ୍ଷ ଯାଞ୍ଚ ଆବଶ୍ୟକ। ଘଟଣାର ସତ୍ୟତା ଜାଣିବା ପାଇଁ ସାମ୍ବାଦିକ ଘଟଣାସ୍ଥଳରେ ପହଞ୍ଚି ସମ୍ପୃକ୍ତ ସରପଞ୍ଚଙ୍କ ସହ ଆଲୋଚନା କରିଥିଲେ। ସାମ୍ବାଦିକଙ୍କ କହିବା ଅନୁଯାୟୀ, ସେହି ସମୟରେ ସରପଞ୍ଚ ଖବର ପ୍ରକାଶ ନ କରିବାକୁ କହିଥିଲେ ଏବଂ ଉକ୍ତ କାର୍ଯ୍ୟ ସେ ନିଜେ କରିଥିବା କଥା ମଧ୍ୟ କହିଥିଲେ। ଏହାପରେ ସ୍ଥାନୀୟ ଅଞ୍ଚଳରେ ଏହି କାର୍ଯ୍ୟକୁ ନେଇ ବିଭିନ୍ନ ପ୍ରଶ୍ନ ଉଠିଛି। ଅଞ୍ଚଳବାସୀଙ୍କ କହିବା ଅନୁଯାୟୀ, କାର୍ଯ୍ୟର ମେଜରମେଣ୍ଟ ବୁକ୍ , ଅନୁମୋଦିତ ଏଷ୍ଟିମେଟ୍, କାର୍ଯ୍ୟାଦେଶ, ବିଲ୍-ଭାଉଚର ଏବଂ ବ୍ୟବହୃତ ସାମଗ୍ରୀର ଗୁଣବତ୍ତାର ସମ୍ପୂର୍ଣ୍ଣ ଯାଞ୍ଚ କରାଗଲେ ପ୍ରକୃତ ସ୍ଥିତି ସାମ୍ନାକୁ ଆସିପାରିବ। ଲୋକଙ୍କ ମତ ହେଉଛି, ସରକାର ଗ୍ରାମାଞ୍ଚଳର ବିକାଶ ପାଇଁ ଯେଉଁ ଅର୍ଥ ବ୍ୟୟ କରୁଛନ୍ତି, ତାହା ସଠିକ୍ ଭାବେ କାମରେ ବିନିଯୋଗ ହେବା ଦରକାର। ତେଣୁ ସିନାପାଲି ପ୍ରଶାସନ ଏବଂ ସମ୍ପୃକ୍ତ ବିଭାଗ ଘଟଣାସ୍ଥଳ ପରିଦର୍ଶନ କରି ନିରପେକ୍ଷ ତଦନ୍ତ କରନ୍ତୁ ଏବଂ ପ୍ରକୃତ ତଥ୍ୟ ସାର୍ବଜନୀନ କରନ୍ତୁ। ତଦନ୍ତରେ ଯଦି କୌଣସି ଅନିୟମିତତା କିମ୍ବା ନିୟମ ଉଲ୍ଲଂଘନ ସାମ୍ନାକୁ ଆସେ, ତେବେ ନିୟମାନୁଯାୟୀ ପଦକ୍ଷେପ ନିଆଯାଉ ବୋଲି ଦାବି ହେଉଛି। ଏହି ଘଟଣାକୁ ନେଇ ଅଞ୍ଚଳରେ ଆଲୋଚନା ଜୋର ଧରିଥିବା ବେଳେ, ବର୍ତ୍ତମାନ ସମସ୍ତଙ୍କ ନଜର ସମ୍ପୃକ୍ତ ବିଭାଗର ତଦନ୍ତ ଓ ପରବର୍ତ୍ତୀ ପଦକ୍ଷେପ ଉପରେ ରହିଛି।