ଏସ୍ବିଆଇ ଆର୍ବିଓ ଆସିକା ପକ୍ଷରୁ ସଚେତନତା କର୍ମଶାଳା
ଆସିକା (ୱାଇଏନ୍ଏସ୍) :ଭାରତୀୟ ଷ୍ଟେଟ୍ ବ୍ୟାଙ୍କ କ୍ଷେତ୍ରୀୟ ବ୍ୟବସାୟିକ କାର୍ଯ୍ୟାଳୟ (ଏସ୍ବିଆଇ ଆର୍ବିଓ) ପକ୍ଷରୁ ଡିଜିଟାଲ୍ କରେନ୍ସି ସଂକ୍ରାନ୍ତୀୟ ଏକ ସଚେତନତା କର୍ମଶାଳା ଅନୁଷ୍ଠିତ ହୋଇଯାଇଛି । ଏସ୍ବିଆଇ ଆର୍ବିଓର କ୍ଷେତ୍ରୀୟ ପରିଚାଳକ ଶ୍ୟାମସୁନ୍ଦର ଠାକୁରଙ୍କ ସଂଯୋଜନାରେ ଅନୁଷ୍ଠିତ ହୋଇଥିବା ଏହି ଡିଜିଟାଲ୍ କରେନ୍ସି ସଂକ୍ରାନ୍ତୀୟ ସଚେତନତା କର୍ମଶାଳାରେ ମୁଖ୍ୟ ଅତିଥି ଭାବେ ଆର୍ବିଓର ମୁଖ୍ୟ ପ୍ରବନ୍ଧକ ରାଜେଶ୍ କୁମାର ସାହୁ, କର୍ପୋରେଟ୍ ସେଣ୍ଟରର ମୁଖ୍ୟ ପ୍ରବନ୍ଧକ ଅଭିମନ୍ୟୁ ଅନାବ, ଭୁବନେଶ୍ୱର ପ୍ରଧାନ କାର୍ଯ୍ୟାଳୟର ପରିଚାଳକ ସନ୍ତୋଷ କୁମାର ସେଠୀ, ଆର୍ବିଓ ଆସିକାର ଉପପ୍ରବନ୍ଧକ ଦେବାଶିଷ ପାଣିଗ୍ରାହୀ, ମାନବ ସମ୍ବଳ ପରିଚାଳକ ଦିଲୀପ କୁମାର ରାଉତରାୟ, ମୁଖ୍ୟ ପରିଚାଳନା ପ୍ରବନ୍ଧକ ନରସିଂହ ପାଢୀ ପ୍ରମୁଖ ଯୋଗଦେଇ ସାଂପ୍ରତିକ ପରିସ୍ଥିତିରେ ଡିଜିଟାଲ୍ କରେନ୍ସିର ବ୍ୟବହାର ଓ ଏହାର ସଫଳ ରୂପାୟନ ଉପରେ ବିସ୍ତୃତ ଭାବେ ଆଲୋକପାତ କରିଥିଲେ । ଏସ୍ବିଆଇ ଆର୍ବିଓ ଆସିକା ପକ୍ଷରୁ ଅନୁଷ୍ଠିତ ହୋଇଥିବା ଏହି ଡିଜିଟାଲ୍ କରେନ୍ସି ସଂକ୍ରାନ୍ତୀୟ କର୍ମଶାଳାରେ ଆସିକା ସହର ତଥା ଏହାର ଆଖପାଖ ଅଞ୍ଚଳର ବିଭିନ୍ନ ମହିଳା ସ୍ୱୟଂ ସହାୟିକା ଗୋଷ୍ଠୀର କାର୍ଯ୍ୟକର୍ତ୍ତା ଓ ଆର୍ବିଓର ଉପଭୋକ୍ତାମାନେ ଯୋଗଦେଇଥିଲା ବେଳେ ଏହି କର୍ମଶାଳାକୁ ସୁପରିଚାଳନା ଦିଗରେ ଆର୍ବିଓର କର୍ମଚାରୀ ଜିତେନ୍ଦ୍ର କୁମାର ମହାରଣା, ରମେଶ ଚନ୍ଦ୍ର ସାହୁ, ହୃଦାନନ୍ଦ ସାମନ୍ତସିଂହାର, ବିଜୟ କୁମାର ପ୍ରଧାନଙ୍କ ସମେତ ବହୁ କର୍ମଚାରୀ ସକ୍ରିୟ ସହଯୋଗ କରିଥିବା ଦେଖିବାକୁ ମିଳିଥିଲା ।
