କଳିଙ୍ଗା ଘାଟି ଖୋଲିବା ଦାବିରେ ତାତିଲା ମିଳିତ ମଞ୍ଚ, ଅଧିକାରୀଙ୍କୁ ଘେରିଲେ ଜନସାଧାରଣ
କନ୍ଧମାଳ: କଳିଙ୍ଗା ଘାଟି ରାସ୍ତା କେବେ ଖୋଲିବ? ଆଉ କେତେ ଦିନ ଦୁର୍ଦ୍ଦଶା ଭୋଗିବେ କନ୍ଧମାଳ ଓ ଗଞ୍ଜାମ ଜିଲ୍ଲାର ହଜାର ହଜାର ଲୋକ? ଜାତୀୟ ରାଜପଥ ବିଭାଗ ହାଲୁକା ଯାନ ଚଳାଚଳ ପାଇଁ ରାସ୍ତା ଉପଯୁକ୍ତ ଥିବା ସୂଚନା ଦେଇଥିବା ସତ୍ତ୍ୱେ ଜିଲ୍ଲା ପ୍ରଶାସନର ଅନୁମତି ମିଳିନଥିବାରୁ ଏବେ ଏହି ପ୍ରଶ୍ନ ଜୋର ଧରିଛି। ଭୂସ୍ଖଳନ ପରବର୍ତ୍ତୀ ମରାମତି କାର୍ଯ୍ୟକୁ ନେଇ ବିଭାଗୀୟ ସୂଚନା ଓ ଯାତାୟାତ ଉପରେ ଜାରି କଟକଣା ମଧ୍ୟରେ ତାଳମେଳ ନଥିବା ଅଭିଯୋଗ କରି ଶନିବାର କଳିଙ୍ଗା ଘାଟିରେ ଯାତାୟାତ ସ୍ୱାଭାବିକ କରିବା ଦାବିରେ ମିଳିତ ମଞ୍ଚ ଜାତୀୟ ରାଜପଥ ବିଭାଗର ଅଧିକାରୀଙ୍କୁ ଘେରିଛି। କନ୍ଧମାଳ ଓ ଗଞ୍ଜାମ ଜିଲ୍ଲାକୁ ସଂଯୋଗ କରୁଥିବା କଳିଙ୍ଗା ଘାଟି କେବଳ ଏକ ରାସ୍ତା ନୁହେଁ, ଏହା ହଜାର ହଜାର ଲୋକଙ୍କ ଦୈନନ୍ଦିନ ଜୀବନ, ବ୍ୟବସାୟ, ଚିକିତ୍ସା ଓ ଜରୁରୀ ଯାତାୟାତର ଏକ ପ୍ରମୁଖ ମାଧ୍ୟମ। ଏଭଳି ଗୁରୁତ୍ୱପୂର୍ଣ୍ଣ ରାସ୍ତା ଦୀର୍ଘଦିନ ଧରି ବନ୍ଦ ରହିବା ଯୋଗୁଁ ସାଧାରଣ ଲୋକଙ୍କ ଦୁର୍ଦ୍ଦଶା ବଢ଼ିଚାଲିଛି। ଅନ୍ୟପକ୍ଷରେ, ରାସ୍ତାର ସ୍ଥିତି ସମ୍ପର୍କରେ ବିଭାଗୀୟ ଅଧିକାରୀଙ୍କ ସକାରାତ୍ମକ ସୂଚନା ପରେ ମଧ୍ୟ ଯାତାୟାତ ସ୍ୱାଭାବିକ ନହେବାକୁ ନେଇ ଅଞ୍ଚଳବାସୀ ପ୍ରଶାସନର ନିଷ୍ପତ୍ତି ଉପରେ ପ୍ରଶ୍ନ ଉଠାଇଛନ୍ତି।
ଏହି ପରିପ୍ରେକ୍ଷୀରେ କଳିଙ୍ଗା ପଥପ୍ରାନ୍ତ କେନ୍ଦ୍ରଠାରେ ମିଳିତ ମଞ୍ଚର ସଦସ୍ୟମାନେ ଏକତ୍ରିତ ହୋଇ ଘାଟି ରାସ୍ତାର ସମସ୍ୟା ଓ ତାହାର ସ୍ଥାୟୀ ସମାଧାନ ନେଇ ଆଲୋଚନା କରିଥିଲେ। ଯୁବ ସମାଜସେବୀ ଆମନ ଚନ୍ଦ୍ର ନାୟକଙ୍କ ନେତୃତ୍ୱରେ ଆୟୋଜିତ ଏହି ବୈଠକରେ ଟିକାବାଲି, ଘୁ.ଉଦୟଗିରି, କଳିଙ୍ଗା ଓ ଦୁର୍ଗାପ୍ରସାଦ ଅଞ୍ଚଳର ଶତାଧିକ ଲୋକ ଯୋଗଦେଇ ନିଜ ନିଜର ମତ ରଖିଥିଲେ। ପରେ ଜାତୀୟ ରାଜପଥ ବିଭାଗର ଅଧିକାରୀଙ୍କୁ ସାକ୍ଷାତ କରି ରାସ୍ତା ଖୋଲିବା ସମ୍ପର୍କରେ ସ୍ପଷ୍ଟ ଓ ଲିଖିତ ସୂଚନା ଦେବାକୁ ଦାବି କରାଯାଇଥିଲା। ଏହାପରେ ମିଳିତ ମଞ୍ଚର ସଦସ୍ୟମାନେ କଳିଙ୍ଗା PWD ବଙ୍ଗଳାରେ ପହଞ୍ଚି ଜାତୀୟ ରାଜପଥ ବିଭାଗର ସିସିଇ ପ୍ରକାଶ ବେହେରା ଓ ଉପଖଣ୍ଡ ଅଧିକାରୀ (ଏସ୍ଡିଓ) ସତୀଶ ପଟେଲଙ୍କ ସହ ଆଲୋଚନା କରିଥିଲେ। ଅଧିକାରୀଙ୍କ ସୂଚନା ଅନୁଯାୟୀ, ଭୂସ୍ଖଳନରେ କ୍ଷତିଗ୍ରସ୍ତ ସ୍ଥାନରେ ଗାର୍ଡ ୱାଲ୍ ନିର୍ମାଣର ଗୋଟିଏ ପର୍ଯ୍ୟାୟ କାର୍ଯ୍ୟ ଶେଷ ହୋଇଥିବା ବେଳେ ଆଉ କିଛି ନିର୍ମାଣ କାର୍ଯ୍ୟ ବାକି ରହିଛି। ତେବେ ବର୍ତ୍ତମାନର ସ୍ଥିତିରେ ହାଲୁକା ଯାନ ଚଳାଚଳ କରିପାରିବ ବୋଲି ବିଭାଗ ପକ୍ଷରୁ ସୂଚନା ଦିଆଯାଇଛି।
ଏନେଇ ଜିଲ୍ଲା ପ୍ରଶାସନକୁ ଅବଗତ କରାଯାଇଥିବା ଅଧିକାରୀମାନେ କହିଥିଲେ। ପ୍ରଶାସନ ଅନୁମତି ଦେଲେ ହାଲୁକା ଯାନ ଚଳାଚଳ ସ୍ୱାଭାବିକ ହୋଇପାରିବ ବୋଲି ସେମାନେ ସ୍ପଷ୍ଟ କରିଥିଲେ। ଆଗାମୀ ବାତ୍ୟାର ସମ୍ଭାବନା ଓ ଜନସାଧାରଣଙ୍କ ସୁରକ୍ଷାକୁ ଦୃଷ୍ଟିରେ ରଖି ଚୂଡ଼ାନ୍ତ ନିଷ୍ପତ୍ତି ଜିଲ୍ଲା ପ୍ରଶାସନ ନେବ ବୋଲି ମଧ୍ୟ ଜଣାଇଥିଲେ।
ମିଳିତ ମଞ୍ଚ ପକ୍ଷରୁ ବିଭାଗୀୟ ଅଧିକାରୀଙ୍କୁ ଲିଖିତ ସୂଚନା ଦେବାକୁ ଦାବି କରାଯିବା ପରେ ଏସ୍ଡିଓ ସତୀଶ ପଟେଲ ଏ ସମ୍ପର୍କରେ ଲିଖିତ ଭାବେ ଜଣାଇଥିବା କୁହାଯାଇଛି। ଏହାପରେ ମଧ୍ୟ ମୂଳ ପ୍ରଶ୍ନ ଅବ୍ୟାହତ ରହିଛି ଯେତେବେଳେ ଜାତୀୟ ରାଜପଥ ବିଭାଗ ହାଲୁକା ଯାନ ଚଳାଚଳ ପାଇଁ ଅନୁକୂଳ ସ୍ଥିତି ଥିବା କହୁଛି, ସେତେବେଳେ ଯାତାୟାତ ସ୍ୱାଭାବିକ କରିବା ପାଇଁ ପ୍ରଶାସନର ନିଷ୍ପତ୍ତି କାହିଁକି ବିଳମ୍ବ ହେଉଛି? ସୁରକ୍ଷା ନିଶ୍ଚିତ କରିବା ନିଶ୍ଚିତ ଭାବେ ଜରୁରୀ, କିନ୍ତୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ କଟକଣା ଜାରି ରଖିବା ପରିବର୍ତ୍ତେ ସ୍ପଷ୍ଟ କାରଣ, ସମୟସୀମା ଓ ବିକଳ୍ପ ବ୍ୟବସ୍ଥା ସମ୍ପର୍କରେ ଜନସାଧାରଣଙ୍କୁ ଅବଗତ କରାଯିବା ଉଚିତ ବୋଲି ମଞ୍ଚ ଦାବି କରିଛି।
ଆଲୋଚନା ସମୟରେ ଉଚ୍ଚପଦସ୍ଥ ଅଧିକାରୀଙ୍କ ସହ ଫୋନ୍ ଯୋଗେ ମଧ୍ୟ ଯୋଗାଯୋଗ କରାଯାଇ ଅଞ୍ଚଳବାସୀଙ୍କ ସମସ୍ୟା ଜଣାଇ ଦିଆଯାଇଥିଲା। ନଭେମ୍ବର ୧ ତାରିଖ ସୁଦ୍ଧା ଘାଟି ରାସ୍ତାରେ ଯାତାୟାତ ସ୍ୱାଭାବିକ ହୋଇପାରେ ବୋଲି ସୂଚନା ମିଳିଥିବା କୁହାଯାଇଛି। ତେବେ ଏହି ସୂଚନା ଉପରେ ଆନୁଷ୍ଠାନିକ ସ୍ପଷ୍ଟୀକରଣ ଓ ପ୍ରଶାସନିକ ନିଷ୍ପତ୍ତିକୁ ଅଞ୍ଚଳବାସୀ ଅପେକ୍ଷା କରିଛନ୍ତି। ମିଳିତ ମଞ୍ଚର ଦାବି ଜନସାଧାରଣଙ୍କ ସୁରକ୍ଷାକୁ ସର୍ବାଧିକ ଗୁରୁତ୍ୱ ଦିଆଯାଉ, କିନ୍ତୁ ସୁରକ୍ଷା ନାମରେ ନିଷ୍ପତ୍ତିହୀନତା ଚାଲିନପାରେ। ରାସ୍ତା ଖୋଲିବା ସମ୍ଭବ ହେଲେ ତୁରନ୍ତ ଅନୁମତି ଦିଆଯାଉ; ଯଦି କୌଣସି ବୈଷୟିକ କିମ୍ବା ସୁରକ୍ଷାଜନିତ ବାଧା ରହିଛି, ତେବେ ତାହାର କାରଣ ଓ ସମାଧାନର ସମୟସୀମା ସାର୍ବଜନୀନ କରାଯାଉ। ଜନସାଧାରଣଙ୍କୁ ଅନିଶ୍ଚିତତାରେ ରଖିବା ବନ୍ଦ କରି ପ୍ରଶାସନ ତୁରନ୍ତ ଦାୟିତ୍ୱପୂର୍ଣ୍ଣ ପଦକ୍ଷେପ ନେଉ। ଆଗାମୀ ବାତ୍ୟା ପରେ ମଧ୍ୟ ଯଦି ଘାଟି ରାସ୍ତାରେ ଯାତାୟାତ ସ୍ୱାଭାବିକ ନହୁଏ ଏବଂ ପ୍ରଶାସନ ପକ୍ଷରୁ ସ୍ପଷ୍ଟ ନିଷ୍ପତ୍ତି ନିଆନଯାଏ, ତେବେ ଜନସ୍ୱାର୍ଥରେ ଗଣତାନ୍ତ୍ରିକ ପଦ୍ଧତିରେ ରାଜରାସ୍ତାକୁ ଓହ୍ଲାଇବାକୁ ମିଳିତ ମଞ୍ଚ ପଛଘୁଞ୍ଚା ଦେବ ନାହିଁ ବୋଲି ଚେତାବନୀ ଦେଇଛି। ଏହି ଆଲୋଚନାରେ ଟିକାବାଲି ଅଞ୍ଚଳର ଜନସାଧାରଣ ଓ ସରପଞ୍ଚ, ଘୁ.ଉଦୟଗିରିର ସମାଜସେବୀ, ମୋଟର ଚାଳକ ସଂଘର କର୍ମକର୍ତ୍ତା, ବୁଦ୍ଧିଜୀବୀ, ମାନବାଧିକାର କର୍ମୀ, ବ୍ୟବସାୟୀ ଓ ସାମ୍ବାଦିକଙ୍କ ସମେତ କଳିଙ୍ଗା ଓ ଦୁର୍ଗାପ୍ରସାଦ ଅଞ୍ଚଳର ଯୁବକ ଏବଂ ବ୍ୟବସାୟୀମାନେ ଯୋଗଦେଇଥିଲେ। ଏବେ ସମସ୍ତଙ୍କ ନଜର ଜିଲ୍ଲା ପ୍ରଶାସନ ଉପରେ। ବିଭାଗୀୟ ସୂଚନା ପରେ ମଧ୍ୟ ଯଦି ନିଷ୍ପତ୍ତି ବିଳମ୍ବିତ ହୁଏ, ତେବେ ଏହା କେବଳ ରାସ୍ତା ଖୋଲିବାର ପ୍ରଶ୍ନ ନୁହେଁ, ବରଂ ଜନସାଧାରଣଙ୍କ ଦୁର୍ଦ୍ଦଶା ପ୍ରତି ପ୍ରଶାସନର ଦାୟିତ୍ୱବୋଧର ମଧ୍ୟ ପରୀକ୍ଷା ହେବ।


