ସରକାରୀ ଜମିକୁ ରେକର୍ଡ କରିଥିବା ନେଇ ବିଧାୟକଙ୍କୁ ଦେଲେ ସ୍ଥାନୀୟ ଲୋକେ ଅଭିଯୋଗ

ନାଉଗାଁ,(ଓ୍ବାଇଏନଏସ): ଜଗତସିଂହପୁର ଜିଲ୍ଲା ନାଉଗାଁ ବ୍ଲକର ଶିଖର ପଂଚାୟତ ଅନ୍ତର୍ଗତ ନଳାଙ୍ଗ ଗ୍ରାମର ସାଧୁଚରଣ ସ୍ୱାଇଁଙ୍କ ନାମରେ ସରକାରୀ ଜମି କରାଯାଇଥିବା ନେଇ ବିଧାୟକ ଅମରେନ୍ଦ୍ର ଦାସଙ୍କୁ ସ୍ଥାନୀୟ ଲୋକେ ଲିଖିତ ଅଭିଯୋଗ କରିଛନ୍ତି। ବିଧାୟକ ଅଭିଯୋଗ ପାଇଲା ପରେ ତଦନ୍ତ ଦାୟୀତ୍ୱ ତହସିଲଦାରଙ୍କୁ ପ୍ରଦାନ କରିଥିବା ଜଣାଯାଇଛି। ଏହି ଅଭିଯୋଗପତ୍ରରେ ପଦ୍ମଚରଣ ବିଶ୍ୱାଳ, ଛବିନ୍ଦ୍ର ବିଶ୍ୱାଳ, ଦୁର୍ଗାଚରଣ ସ୍ୱାଇଁ, ଉମେଶ ସ୍ୱାଇଁ, ସନ୍ତୋଷ ସ୍ୱାଇଁ ଆଦିଙ୍କ ଦସ୍ତଖତ ରହିଥିବା ଜଣାଯାଇଛି। ଅଭିଯୋଗ ମୁତାବକ ଶିଖର ଗ୍ରାମରେ ଖାତା ନମ୍ବର-୭୬୨ରେ ସରକାରୀ ପ୍ଲଟ ରହିଛି। ଏଥିରେ ଥିବା କିଛି ପ୍ଲଟ ଉପରେ ଗ୍ରାମ୍ୟ ଉନ୍ନୟନ ବିଭାଗର ରାସ୍ତା ଯାଇଥିବା ବେଳେ କିଛି ପ୍ଲଟରେ ଗ୍ରାମ୍ୟ ଜଙ୍ଗଲ ରହିଛି। କିନ୍ତୁ ଆରଆରପି ମାମଲା ନମ୍ବର-୩୦୨୪/୨୦୦୨ବଳରେ ନାଉଗାଁ ତହସିଲଦାରଙ୍କ ଦ୍ୱାରା ଏହି ପ୍ଲଟ ମଧ୍ୟରୁ କିଛି ପ୍ଲଟ ସାଧୁ ଚରଣ ସ୍ୱାଇଁଙ୍କ ନାମରେ ରେକର୍ଡ କରାଯାଇଛି। ଏହି ଜମିକୁ ତହସିଲଦାର କିପରି ସାଧୁ ଚରଣ ସ୍ୱାଇଁଙ୍କ ନାମରେ ରେକର୍ଡ କରାଇଲେ ବୋଲି ସ୍ଥାନୀୟ ଲୋକେବିଧାୟକ ଦାସଙ୍କୁ ଅଭିଯୋଗ କରିଛନ୍ତି। ଏସଂର୍ପକରେ ସାଧୁ ଚରଣ ସ୍ୱାଇଁଙ୍କ ମତାମତ ନେବା ପାଇଁ ଚେଷ୍ଠା କରାଯାଇଥିଲେ ମଧ୍ୟ ସମ୍ଭବ ହୋଇ ନଥିବା ବେଳେ ନାଉଗାଁ ତହସିଲଦାର ଅକ୍ଷୟ କୁମାର ବଡୁ ପଚାରିବାରୁ ଅତିରିକ୍ତ ସବ୍ କଲେକ୍ଟରଙ୍କ ନିର୍ଦ୍ଦେଶ ଉପରେ ରେକର୍ଡ କରାଯାଇଛି ବୋଲି କହିଛନ୍ତି।