ନାବାଳିକା ଅସଦାଚରଣ ମାମଲା, ଆସାମୀକୁ ୩ ବର୍ଷ ଜେଲ

କେନ୍ଦ୍ରାପଡ଼ା (ଚିିତ୍ତ ରଞ୍ଜନ ଦାଶ):ଏକ ନାବାଳିକା ଅସଦାଚରଣ ମାମଲାର ବିଚାର କରି କେନ୍ଦ୍ରାପଡ଼ା ଅତିରିକ୍ତ ଜିଲ୍ଲା ସେସନ୍ସ ତଥା ପୋକ୍ସ କୋର୍ଟ ଆସାମୀ ମଳୟ କୁମାର ବେହେରାଙ୍କୁ ୩ ବର୍ଷ ଜେଲ ଦଣ୍ଡରେ ଦଣ୍ଡିତ କରିଛନ୍ତି। ଏଥି ସହିତ ଆସାମୀକୁ ୫ ହଜାର ଟଙ୍କା ଜୋରିମାନା ଦଣ୍ଡ ଦେଇଛନ୍ତି। ଜୋରିମାନା ଅନାଦେୟ ଆସାମୀ ଅଧିକ ତିନି ମାସ ସଶ୍ରମ କାରାଦଣ୍ଡ ଭୋଗିବ ବୋଲି ବିଚାରପତି ପ୍ରଜ୍ଞା ପରମିତା ରାଉଳ ରାୟରେ ପ୍ରକାଶ କରିଛନ୍ତି। ମାମଲାରୁ ପ୍ରକାଶ ଯେ ୨୦୨୪ ମସିହା ନଭେମ୍ବର ୧ ତାରିଖରେ ମହାକାଳପଡ଼ା ଥାନା ଅଞ୍ଚଳରେ ଜନୈକ ନାବାଳିକାଙ୍କୁ କଟକ ଜିଲ୍ଲା ନିଆଳି କଣ୍ଟିସଲା ଗ୍ରାମର ମଳୟ କୁମାର ବେହେରା ନାମକ ଗାଡି ଚାଳକ ଅସଦାଚରଣ କରିଥିଲେ। ଏ ସଂପର୍କରେ ପିଡିତା ତାଙ୍କ ପିତାମାତା ଓ ସଂପର୍କୀୟ ମଉସାଙ୍କୁ ଅବଗତ କରାଇଥିଲେ। ନଭେମ୍ବର ୫ ତାରିଖରେ ପିଡିତାଙ୍କ ସଂପର୍କୀୟ ମହାକାଳପଡ଼ା ଥାନାରେ ଅଭିଯୋଗ କରିଥିଲେ। ମହାକାଳପଡ଼ା ପୋଲିସ ଏକ ମାମଲା ରୁଜୁ କରି ଆସାମୀ ମଳୟଙ୍କୁ ଗିରଫ କରି କୋର୍ଟଚାଲାଣ କରିଥିଲା। କୋର୍ଟରେ ଜିଆର କେସ ନଂ. ୮୮/୨୦୨୪ ରୁଜୁ କରାଯାଇ ମାମଲାର ବିଚାର ଚାଲିଥିଲା। ବିଚାରପତି ସମସ୍ତ ସାକ୍ଷ୍ୟ ପ୍ରମାଣକୁ ଆଧାର କରି ଉପରୋକ୍ତ ରାୟ ପ୍ରଦାନ କରିଛନ୍ତି। ସରକାରଙ୍କ ପକ୍ଷରୁ ସ୍ୱତନ୍ତ୍ର ପବ୍ଲିକ ପ୍ରସିକ୍ୟୁଟର ନେହେରୁ କୁମାର ସାହୁ ମାମଲା ପରିଚାଳନା କରୁଥିଲେ।