କାମ୍ବୋଡିଆ ଗସ୍ତରେ ଯିବେ ସୁପ୍ରିମକୋର୍ଟ ଆଡଭୋକେଟ୍ ସୁଶାନ୍ତ କୁମାର ମଲ୍ଲିକ

ପୋଲସରା(ଅନୀଲ କୁମାର ମହାରଣା): ଭାରତୀୟ ଆଇନ ଜଗତ ପାଇଁ ଏକ ଉଲ୍ଲେଖନୀୟ ଖବର। ସୁପ୍ରିମକୋର୍ଟ ଅଫ୍ ଇଣ୍ଡିଆର ଆଡଭୋକେଟ୍ ତଥା ସୁପ୍ରିମକୋର୍ଟ ବାର୍ ଆସୋସିଏସନ୍ ଓ ବାର୍ ଆସୋସିଏସନ୍ ଅଫ୍ ଇଣ୍ଡିଆର ସଦସ୍ୟ ତଥା ଗଞ୍ଜାମ ଜିଲ୍ଲାର ପୋଲସରା ବ୍ଲକ ଅନ୍ତର୍ଗତ ଜେ. ଡେଙ୍ଗାପଦର ଗ୍ରାମର ସୁଶାନ୍ତ କୁମାର ମଲ୍ଲିକ ଆସନ୍ତା ୧୬ ନଭେମ୍ବରରୁ ୨୦ ନଭେମ୍ବର ୨୦୨୬ ପର୍ଯ୍ୟନ୍ତ କାମ୍ବୋଡିଆ ଗସ୍ତ କରିବେ। ନୋମ୍ ପେନ୍‌ରେ ଅନ୍ତର୍ଜାତୀୟ ଆଇନ ଓ ଶିକ୍ଷାଗତ ଆଦାନପ୍ରଦାନ କାର୍ଯ୍ୟକ୍ରମରେ ଯୋଗଦେବେ; ଏହି ସମୟରେ ଫ୍ରାନ୍ସ ରାଷ୍ଟ୍ରପତି ଓ କାନାଡାର ଗଭର୍ଣ୍ଣର ଜେନେରାଲଙ୍କ ଗସ୍ତକୁ ନେଇ ବିଶ୍ୱର ନଜର ରହିଛି। କାମ୍ବୋଡିଆର ରାଜଧାନୀ ନୋମ୍ ପେନ୍‌ସ୍ଥିତ National University of Management (NUM) ର International Program of Legal Studies (NUM iLAW) ପକ୍ଷରୁ ତାଙ୍କୁ ଏହି ଗସ୍ତ ପାଇଁ ଆନୁଷ୍ଠାନିକ ନିମନ୍ତ୍ରଣ ପ୍ରଦାନ କରାଯାଇଛି। ୩୧ ଅକ୍ଟୋବର ୨୦୨୬ ତାରିଖରେ ଜାରି ନିମନ୍ତ୍ରଣପତ୍ରରେ ତାଙ୍କୁ ଜଣେ ଅଭିଜ୍ଞ ଭାରତୀୟ ଆଇନ ବୃତ୍ତିଜୀବୀ ଭାବେ ଆମନ୍ତ୍ରଣ କରାଯାଇଛି। ଏହି ଗସ୍ତର ମୁଖ୍ୟ ଉଦ୍ଦେଶ୍ୟ ହେଉଛି ଭାରତ ଓ କାମ୍ବୋଡିଆ ମଧ୍ୟରେ ଆଇନ ଶିକ୍ଷା, ନ୍ୟାୟିକ ବ୍ୟବସ୍ଥା, ଆନ୍ତର୍ଜାତୀୟ ଆଇନ ଏବଂ ବୃତ୍ତିଗତ ସହଯୋଗକୁ ସୁଦୃଢ଼ କରିବା। ଏହି ଅବସରରେ ଆଇନ ଛାତ୍ରଛାତ୍ରୀ, ଅଧ୍ୟାପକ ଓ ଆଇନ ବୃତ୍ତି ସହ ଜଡ଼ିତ ବ୍ୟକ୍ତିବିଶେଷଙ୍କ ସହ ଜ୍ଞାନ ଓ ଅଭିଜ୍ଞତାର ଆଦାନପ୍ରଦାନ, ଅତିଥି ବକ୍ତୃତା ଏବଂ ବୃତ୍ତିଗତ ଆଲୋଚନାର କାର୍ଯ୍ୟକ୍ରମ ରହିଛି। ଏହି ସମୟରେ କାମ୍ବୋଡିଆର ରାଜଧାନୀ ନୋମ୍ ପେନ୍‌ରେ ୧୫ ଓ ୧୬ ନଭେମ୍ବର ୨୦୨୬ରେ ୨୦ତମ Francophonie Summit (ସୋମେ ଦେ ଲା ଫ୍ରାଙ୍କୋଫୋନି) ଅନୁଷ୍ଠିତ ହେବ। ଏହା କାମ୍ବୋଡିଆ ଇତିହାସରେ ପ୍ରଥମ ଥର ପାଇଁ ଆୟୋଜିତ ହେଉଥିବା ଏକ ବୃହତ୍ ଅନ୍ତର୍ଜାତୀୟ ସମ୍ମିଳନୀ। ଏହି ଐତିହାସିକ ସମ୍ମିଳନୀରେ ଫ୍ରାନ୍ସର ରାଷ୍ଟ୍ରପତି ମହାମହିମ ଇମାନୁଏଲ୍ ମାକ୍ରୋନ୍ (Emmanuel Macron) ଯୋଗଦେବେ। ସେ ୧୪ରୁ ୧୬ ନଭେମ୍ବର ପର୍ଯ୍ୟନ୍ତ କାମ୍ବୋଡିଆରେ ସରକାରୀ ଗସ୍ତରେ ରହିବେ। ଏହା ଫ୍ରାନ୍ସର ରାଷ୍ଟ୍ରପତିଙ୍କ ୬୦ ବର୍ଷରୁ ଅଧିକ ସମୟ ପରେ କାମ୍ବୋଡିଆକୁ ଏକ ଐତିହାସିକ ଗସ୍ତ ଭାବେ ଗୁରୁତ୍ୱ ବହନ କରୁଛି। ସେହିପରି କାନାଡାର ଗଭର୍ଣ୍ଣର ଜେନେରାଲ୍ ମହାମହିମ ଲୁଇସ୍ ଆର୍ବର୍ (Louise Arbour) ନଭେମ୍ବର ୧୫ ତାରିଖରେ ଏହି ସମ୍ମିଳନୀର ଉଦ୍‌ଘାଟନୀ ଅଧିବେଶନରେ ଯୋଗଦେବେ। ଏହା ବ୍ୟତୀତ କାନାଡା ୨୦୨୮ରେ ହେବାକୁ ଥିବା ପରବର୍ତ୍ତୀ ଫ୍ରାଙ୍କୋଫୋନି ସମ୍ମିଳନୀର ଆୟୋଜକ ଦେଶ ଭାବେ ଘୋଷିତ ହେବ। ଏହି ସମ୍ମିଳନୀର ମୁଖ୍ୟ ବିଷୟବସ୍ତୁ ରହିଛି – “Reinvest in Peace for Shared Prosperity and Sustainable Stability” ଅର୍ଥାତ୍ ସାମୂହିକ ସମୃଦ୍ଧି ଓ ସ୍ଥାୟୀ ସ୍ଥିରତା ପାଇଁ ଶାନ୍ତିରେ ପୁନଃ ନିବେଶ। ଏହି ସମ୍ମିଳନୀରେ ବିଭିନ୍ନ ଦେଶର ରାଷ୍ଟ୍ରମୁଖ୍ୟ, ସରକାରୀ ପ୍ରତିନିଧି ଓ ଅନ୍ତର୍ଜାତୀୟ ସଂଗଠନର ନେତୃବୃନ୍ଦ ଆନ୍ତର୍ଜାତୀୟ ସହଯୋଗ, ଶିକ୍ଷା, ସଂସ୍କୃତି, ମାନବାଧିକାର, ଶାନ୍ତି ଓ ସ୍ଥାୟୀ ବିକାଶ ଉପରେ ଆଲୋଚନା କରିବେ। ଏଭଳି ଏକ ଗୁରୁତ୍ୱପୂର୍ଣ୍ଣ ଅନ୍ତର୍ଜାତୀୟ କାର୍ଯ୍ୟକ୍ରମର ସମୟରେ ଭାରତର ଜଣେ ଅଭିଜ୍ଞ ଆଇନଜୀବୀ ସୁଶାନ୍ତ କୁମାର ମଲ୍ଲିକଙ୍କ କାମ୍ବୋଡିଆ ଗସ୍ତ ଭାରତୀୟ ଆଇନ ବୃତ୍ତିର ଅଭିଜ୍ଞତାକୁ ଅନ୍ତର୍ଜାତୀୟ ଶିକ୍ଷାଗତ ମଞ୍ଚରେ ଉପସ୍ଥାପନ କରିବାର ଏକ ସୁଯୋଗ ହେବ। ଏହି ଗସ୍ତ ଭାରତ ଓ କାମ୍ବୋଡିଆ ମଧ୍ୟରେ ଆଇନ ଶିକ୍ଷା, ନ୍ୟାୟିକ ଜ୍ଞାନ ଓ ବୃତ୍ତିଗତ ସହଯୋଗର ନୂତନ ଦିଗ ଉନ୍ମୋଚନ କରିବ ବୋଲି ଆଶା କରାଯାଉଛି। ଏହା ଭାରତୀୟ ଆଇନ ବୃତ୍ତିର ଅନ୍ତର୍ଜାତୀୟ ସଂଯୋଗ ଓ ଜ୍ଞାନ ଆଦାନପ୍ରଦାନ ଦିଗରେ ଏକ ଉଲ୍ଲେଖନୀୟ ପଦକ୍ଷେପ ଅଟେ।