ପୂର୍ବତନ ସମବାୟ ସମିତି ସମ୍ପାଦକ ବ୍ରଜ କିଶୋର ବିଶ୍ୱାଳଙ୍କ ପରଲୋକ

ବନ୍ତ, (ଚାନ୍ଦିନୀ ମହାନ୍ତି):ବନ୍ତ ବ୍ଲକ ଟିଲୋ ଗ୍ରାମର ତଥା ଟିଲୋ ସେବା ସମବାୟ ସମିତିର ପୂର୍ବତନ ସମ୍ପାଦକ ବ୍ରଜ କିଶୋର ବିଶ୍ୱାଳ(୬୨)ଙ୍କର ଆଜି ହୃଦ୍‌ଘାତରେ ପରଲୋକ ଘଟିଛି । ଆଜି ପୂର୍ବାହ୍ନ ସମୟରେ ସେ ହଠାତ୍ ଛାତିରେ ଯନ୍ତ୍ରଣା ଅନୁଭବ କରିବାରୁ ପରିବାରଲୋକେ ତାଙ୍କୁ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟକୁ ନେଇ ଯାଇଥିଲୋ । ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ମୃତ୍ୟୁ ଶର୍ଯ୍ୟା ନିକଟରେ ପତ୍ନୀ, ୩ ଝିଅ, ଜ୍ୱାଇଁ, ନାତିନାତୁଣୀଙ୍କ ସମେତ ପରିବାରବର୍ଗ ଓ ଆତ୍ମୀୟ ସ୍ୱଜନ ଉପସ୍ଥିତ ଥିଲେ । ତାଙ୍କ ମରଶରୀରକୁ ଏକ ଶୋଭା ଯାତ୍ରାରେ ନିଆଯାଇ ଅନ୍ତିିମ ସତ୍କାର କରାଯାଇଥିଲା । ପୁତୁରା ଶିବଶକ୍ତି ବିଶ୍ୱାଳ ମୁଖାଗ୍ନି ଦେଇଥିଲେ । ସେ ଗତ ୪୦ ବର୍ଷ ଧରି ଟିଲୋ ସେବା ସମବାୟ ସମିତିରେ ସମ୍ପାଦକ ଭାବେ କାର୍ଯ୍ୟ କରି ଗତ ୨ ବର୍ଷ ତଳେ ଚାକିରୀରୁ ଅବସର ନେଇଥିଲେ । ଏଥିସହ ସେ ପୁରୁଷଣ୍ଢ, ପଧାନପଡା, ଗଣିଜାଙ୍ଗ, ରାମକୃଷ୍ଣପୁର, ଚାଇଁପୁର ଆଦି ସେବା ସମବାୟ ସମିତିର ସମ୍ପାଦକ ଭାବେ ଅତିରିକ୍ତ ଦାୟୀତ୍ୱ ତୁଲାଇଥିଲେ । ସେ ଜଣେ କର୍ତ୍ତବ୍ୟନିଷ୍ଠ, ପରୋପକାରୀ କର୍ମଚାରୀ ଭାବେ ବେଶ ପରିଚିତ ଥିଲେ । ତାଙ୍କର କାର୍ଯ୍ୟ ଦକ୍ଷତା ପାଇଁ ସେ ସବୁ ବେଳେ ଉଚ୍ଚ ଅଧିକାରୀଙ୍କ ଠାରେ ପ୍ରଶଂସିତ ଥିଲେ । ତାଙ୍କର ସହନଶୀଳତା ଓ ପରୋପକାରିତା ପାଇଁ ସେ ସବୁ ବେଳେ ଚାଷୀ ମାନଙ୍କର ପ୍ରିୟପାତ୍ର ଥିଲେ । ତାଙ୍କର ୩ ଝିଅ ଓ ଗୋଟିଏ ପୁଅ ଥିବା ବେଳେ ଗତ ୨୦୨୩ ମସିହା ଫେବୃଆରୀ ମାସରେ ଏକମାତ୍ର ପୁତ୍ର ଦୁର୍ଘଟଣାରେ ମୃତ୍ୟୁ ବରଣ କରିଥିଲେ । ଆଜି ତାଙ୍କର ମୃତ୍ୟୁ ଖବର ପାଇ ସ୍ଥାନୀୟ ସରପଞ୍ଚ ସଂଗ୍ରାମ କେଶରୀ ଜେନା, ଯୁବ ସମାଜସେବୀ ଇଂ.ଲକି ମାଷ୍ଟର ସ୍ୱାଇଁ, ଟିଲୋ ସମିତିର ସଭାପତି ବିଜୟ କୁମାର ନାୟକ, ସମାଜସେବୀ ରମାକାନ୍ତ ପାଣିଗ୍ରାହୀଙ୍କ ସମେତ ବହୁମାନ୍ୟ ଗଣ୍ୟ ବ୍ୟକ୍ତି ଏବଂ ବିବିସିସି ବ୍ୟାଙ୍କ ବନ୍ତ ଶାଖା ଓ ବିଭିନ୍ନ ସମବାୟ ସମିତିର କର୍ମଚାରୀ ମାନେ ତାଙ୍କ ବାସ ଭବନରେ ପହଞ୍ôଚ ମରଶରୀରରେ ପୁଷ୍ପମାଲ୍ୟ ଅର୍ପଣ ପୂର୍ବକ ଶ୍ରଦ୍ଧାଞ୍ଜଳୀ ଜ୍ଞାପନ କରିଥିଲେ । ତାଙ୍କ ମୃତ୍ୟୁରେ ସମଗ୍ର ଅଞ୍ଚଳରେ ଶୋକର ଛାୟା ଖେଳି ଯାଇଛି ।