ଓଡ଼ିଶା ନାଗରିକ ମହାମଂଚ ପକ୍ଷରୁ ସ୍ୱାଗତ
ଭୁବନେଶ୍ୱର, (ଓ୍ବାଇଏନ୍ଏସ୍):ପ୍ରଭୁ ଶ୍ରୀଜଗନ୍ନାଥଙ୍କ ମହାମାନବୀୟ ଲୀଳା ବିଶ୍ୱପ୍ରସିଦ୍ଧ ରଥଯାତ୍ରା ଚଳିତ ବର୍ଷ ବନ୍ଦ ପାଇଁ ସର୍ବୋଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶନାମାର ପୁନର୍ବିଚାର ସହ ଦୀର୍ଘ ୨୮୭ ବର୍ଷର ଧାରାବାହିକ ପରମ୍ପରାର ସୁରକ୍ଷା ପାଇଁ ଓଡ଼ିଶା ନାଗରିକ ମହାମଂଚର ସାଧାରଣ ସଂପାଦକ ପ୍ରଦୀପ କୁମାର ବିଶ୍ୱାଳଙ୍କ ତରଫରୁ ବରିଷ୍ଠ ଅଧିବକ୍ତା ପ୍ରଣବ ସାମନ୍ତରାୟ ଡବ୍ଲ୍ୟୁପି(ସି)୫୭୧/୨୦୨୦ରେ କରିଥିବା ମାମଲାର ବିଚାର ସର୍ବୋଚ୍ଚ ନ୍ୟାୟାଳୟର ମୁଖ୍ୟ ବିଚାରପତିଙ୍କ ଅଧ୍ୟକ୍ଷତାରେ ଗଠିତ ତିନିଜଣିଆ ଖଣ୍ଡପୀଠ କେତେକ ନିର୍ଦ୍ଦିଷ୍ଟ ସର୍ତାବଳୀ ଆଧାରରେ ରଥଯାତ୍ରା ଉପରୁ ପ୍ରତିବନ୍ଧକ ହଟାଇ ଦେଇଥିବା ରାୟକୁ ଓଡ଼ିଶା ନାଗରିକ ମହାମଂଚ ଏକ ସାମ୍ବାଦିକ ସମ୍ମିଳନୀରେ ସ୍ୱାଗତ କରିଛି । ଅଧ୍ୟକ୍ଷ ପ୍ରଦ୍ୟୁମ୍ନ ଶତପଥୀ ଏକ ସାମ୍ବାଦିକ ସମ୍ମିଳନୀରେ ସେବାୟତମାନେ ସର୍ବୋଚ୍ଚ ନ୍ୟାୟାଳୟର ନିର୍ଦ୍ଦେଶ ଅନୁସାରେ, ସାମାଜିକ ଦୂରତା ନିୟମ ପାଳନ ସହ ମାସ୍କ ପିନ୍ଧି ଶୃଙ୍ଖଳାର ସହ ରଥଯାତ୍ରାର ସମସ୍ତ ନୀତି ସମ୍ପନ୍ନ କରିବାକୁ ନିବେଦନ କରିଛନ୍ତି । ଯେ କୌଣସି ପ୍ରକାର ସାମାନ୍ୟ ବିଶୃଙ୍ଖଳା ବି ପ୍ରଭୁ ଶ୍ରୀଜଗନ୍ନାଥଙ୍କ ପ୍ରତି ଅସମ୍ମାନ ଓ ନ୍ୟାୟାଳୟର ବିଶ୍ୱାସ ପ୍ରତି ପ୍ରଚଣ୍ଡ ଆଘାତ କେବଳ ନୁହେଁ, ସମଗ୍ର ବିଶ୍ୱରେ ଭୟଙ୍କର ବଦନାମ ଅର୍ଜନ ସହ ଅକ୍ଷମଣୀୟ ଅପରାଧ ହେବ ବୋଲି ଶ୍ରୀ ଶତପଥୀ ବିଗତ ଦିନର ଇତିହାସ, ବିଶେଷକରି ନବକଳେବରର ଇତିହାସ ଆଧାରରେ ସତର୍କ କରାଇଦେଇଛନ୍ତି । ଏହି ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ସାଧାରଣ ସଂପାଦକ ପ୍ରଦୀପ ବିଶ୍ୱାଳ, ଅମରେନ୍ଦ୍ର ମହାପାତ୍ର, ଇଂ ଶିଶିର ନାୟକ, ମୋହନ ସୁନ୍ଦର ଦଳସିଂହ ରାୟ ପ୍ରମୁଖ ଉପସ୍ଥିତ ଥିଲେ ।
