ଦୁର୍ଘଟଣାରେ ମହିଳାଙ୍କ ମୃତ୍ୟୁ

ନାଉଗାଁ, (ଯୁଗାବ୍ଦ ନ୍ୟୁଜ):ଜଗତସିଂହପୁର ଜିଲ୍ଲା ନାଉଗାଁ ଥାନା ଅନ୍ତର୍ଗତ ଗ୍ରାମ୍ୟ ଉନ୍ନୟନ ବିଭାଗ ରାସ୍ତାର ଶିଖର- ତିରୁଣା ରାସ୍ତାର ଡେରିକି ଗ୍ରାମ ଛକ ନିକଟରେ ଶୁକ୍ରବାର ସଂଧ୍ୟାରେ ୨ ବାଇକ୍ ମୁହାଁ ମୁହିଁ ହୋଇଥିଲା । ଯାହାଫଳରେ କୋରୁଅ ଗ୍ରାମର ଅନିତା ନାୟକ(୪୨ବର୍ଷ) ବାଇକରୁ ଛିଟିକି ପଡି ତଳେ ପଡି ଯାଇଥିଲେ । ତାଙ୍କର ଚିକିତ୍ସାଧୀନ ଅବସ୍ଥାରେ ଶନିବାର ମୃତ୍ୟୁ ଘଟିଛି । ତାଙ୍କ ମୁହଁ ଓ କାନରୁ ପ୍ରଚୁର ରକ୍ତସ୍ରାବ ଯୋଗୁ ନାଉଗାଁ ସ୍ୱାସ୍ଥ୍ୟ କେନ୍ଦ୍ରରେ ତାଙ୍କର ପ୍ରାଥମିକ ଚିକିତ୍ସା କରାଯାଇ ଜଗତସିଂହପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି କରାଯାଇଥିଲା । ସେଠାରେ ଅବସ୍ଥା ଗୁରୁତର ହେବାରୁ କଟକ ବଡ ମେଡିକାଲକୁ ସ୍ଥାନାନ୍ତର କରାଯାଇଥିଲା । କଟକ ମେଡିକାଲରେ ଚିକିତ୍ସିତ ହେଉଥିବା ବେଳେ ତାଙ୍କର ମୃତ୍ୟୁ ଘଟିଥିବା ପରିବାର ଲୋକଙ୍କ ପକ୍ଷରୁ ସୂଚନା ମିଳିଛି । ଅନିତାଙ୍କର ଗୋଟିଏ ପୁଅ ଓ ଝିଅ ଘରେ ରହିଛନ୍ତି । ଅନିତାଙ୍କ ବାପ ଘର ଶିଖର ପଂଚାୟତ ନଳାଙ୍ଗ ଗ୍ରାମରେ ହୋଇଥିବା ବେଳେ ଶାଶୁଘର କୋରୁଅ ଅଟେ । ତାଙ୍କ ସ୍ୱାମୀ ଅରୁଣଙ୍କ ସହିତ ନଳାଙ୍ଗରୁ କୋରୁଅ ଫେରୁଥିବା ବେଳେ ଦୁର୍ଘଟଣା ଘଟିଥିଲା । ଅନ୍ୟପଟରେ ଶିଖର-ତିରୁଣା ରାସ୍ତାର ଡେରିକିଛକ ନିକଟରେ ଜୈନିକ ବ୍ୟକ୍ତି ନିଜର ଘର ନିର୍ମାଣ ପାଇଁ ଦୀର୍ଘଦିନ ହେବ ରାସ୍ତା ପାଶ୍ୱର୍ରେ ଗୋଡି ଓ ବାଲି ଗଦା କରିଛନ୍ତି । ଉକ୍ତ ବାଲି ଓ ଗୋଡି ରାସ୍ତା ଉପରେ ଜମା ହେବା କାରଣରୁ ଗାଡି ଚାଳକମାନେ ନିଜର ଭାରାସାମ୍ୟ ହରାଇ ଦୁର୍ଘଟଣାର ସମ୍ମୁଖୀନ ହୋଇଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି । ଜିଲ୍ଲା ପ୍ରଶାସନ ଏଥିପ୍ରତି ତୁରନ୍ତ ଦୃଷ୍ଟି ଦେଇ ରାସ୍ତାକୁ ଅବରୋଧ କରି ଗୋଡି ଓ ବାଲି ଜମା କରୁଥିବା ବ୍ୟକ୍ତିଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି ହୋଇଛି ।