ନାବାଳିକାକୁ ଚେଙ୍କ ଘଟଣାରେ ଶିଶୁ କଲ୍ୟାଣ ସମିତିର ତାଗିଦ

ପାରଳାଖେମୁଣ୍ଡି, (ତାରିଣି ପ୍ରସାଦ ପଣ୍ଡା)- ପାରଳାଖେମୁଣ୍ଡି ସହରରେ ଜଣେ ୧୨ବର୍ଷର ନାବାଳିକାଙ୍କୁ ଚେଙ୍କ ଦିଆଯାଇଥିବା ଜିଲା ଶିଶୁ କଲ୍ୟାଣ ସମିତି ସୂତ୍ରରୁ ପ୍ରକାଶ । ଘଟଣାରୁ ପ୍ରକାଶ ଯେ କରଣ ସାହି ବାସିନ୍ଦା ଜନୈକ ମହିଳା କୌଣସି କାରଣରୁ ତାଙ୍କ ୧୨ବର୍ଷର ଶିଶୁ କନ୍ୟାକୁ ଚେଙ୍କ ଦେଇଥିଲେ । ଏହି ଖବର କୌଣସି ସୂତ୍ରରୁ ପାରଳାଖେମୁଣ୍ଡି ଚାଇଲ୍ଡଲାଇନ ଜାଣିବାପରେ ଚାଇଲ୍ଡ ଲାଇନର ଏକ ଟିମ୍ ସଂଯୋଜକ ନାଗେଶ୍ୱର ଚୌଧୁରୀଙ୍କ ନେତୃତ୍ୱରେ ପହଞ୍ଚି ଉକ୍ତ ଶିଶୁକୁ ଉଦ୍ଧାର କରି ଜିଲା ଶିଶୁ କଲ୍ୟାଣ ସମିତିରେ ଉପସ୍ଥାପନ କରିଥିଲେ । ଶିଶୁ କଲ୍ୟାଣ ସମିତିରେ କାଉଁସିଲିଂ କରିବା ସମୟରେ ଉକ୍ତ ଶିଶୁ ତାଙ୍କୁ ଚେଙ୍କ ଦିଆଯାଇଥିବା ଘଟଣାକୁ ସ୍ୱୀକାର କରିଥିବାର ଶିଶୁ କଲ୍ୟାଣ ସମିତି ସୂତ୍ରରୁ ପ୍ରକାଶ । ପୂର୍ବରୁ ଉକ୍ତ ମହିଳା ଏବଂ ବକ୍ସି ସାହି ଠାରେ ରହୁଥିବା ତାଙ୍କ ସ୍ୱାମୀ କୌଣସି କାରଣରୁ ପୃଥକ ଭାବେ ବସବାସ କରୁଥିଲେ । ମାତ୍ର ଉକ୍ତ ନାବାଳିକା ଏବଂ ତାଙ୍କର ଜଣେ ଭାଇ ମାଁଙ୍କ ପାଖରେ ତଥା କରଣ ସାହିରେ ରହୁଥିଲେ । କୌଣସି ଘଟଣାକୁ କେନ୍ଦ୍ର କରି ମହିଳାଙ୍କ ଦ୍ୱାରା ଚେଙ୍କ ଦିଆଯାଇଥିଲେ ମଧ୍ୟ ଉକ୍ତ ଶିଶୁ କନ୍ୟାଟି ତାଙ୍କ ମାଙ୍କ ପାଖରେ ରହିବାପାଇଁ ଇଛା ପ୍ରକଟ କରିବାରୁ ତାଙ୍କୁ ବର୍ତ୍ତମାନ ଉକ୍ତ ମହିଳାଙ୍କୁ ହସ୍ତାନ୍ତର କରାଯାଇଥିଲେ ମଧ୍ୟ ଏପରି ପୁନର୍ବାର ନକରିବାପାଇଁ ମହିଳାଙ୍କୁ ଶିଶୁ କଲ୍ୟାଣ ସମିତି ପକ୍ଷରୁ ତାଗିଦ କରାଯିବା ସହ ଲିଖିତ ଆକାରରେ ମଧ୍ୟ ପ୍ରତିଶ୍ରୁତି ନିଆଯାଇଛି । ସେହିପରି ଉକ୍ତ ମହିଳା ତାଙ୍କ ଶିଶୁ କନ୍ୟାଙ୍କ ସହ ପ୍ରତି ଏକ ମାସକୁ ଥରେ ଶିଶୁ କଲ୍ୟାଣ ସମିତି ଆସି ସାକ୍ଷାତ କରିବାପାଇଁ ମଧ୍ୟ କୁହାଯାଇଥିବା ଶିଶୁ କଲ୍ୟାଣ ସମିତିର ଅଧ୍ୟକ୍ଷ ପ୍ରମୋଦ କୁମାର ରାଉଳ ସଭ୍ୟ ହିରଣ୍ୟ ରାୟ ପ୍ରମୁଖ ଜଣାଇଛନ୍ତି ।