ରାଜ୍ୟ ବାହାରକୁ ଚାଲାଣ ବେଳେ ୩ କ୍ଵିଣ୍ଟାଲ ଗଞ୍ଜେଇ ସହ ଭାଙ୍ଗ ଜବତ ୪ ଗିରଫ

ପାରଳାଖେମୁଣ୍ଡି, (ତାରିଣୀ ପ୍ରସାଦ ପଣ୍ଡା):ଗଜପତି ଜିଲ୍ଲା ପୋଲିସକୁ ପୁଣି ଏକ ସଫଳତା ମିଳିଥିବା ସୂଚନା ମିଳିଛି. ଗଜପତି ଏସପି ଜିତେନ୍ଦ୍ର କୁମାର ପଣ୍ଡା ଗତକାଲି ସନ୍ଧ୍ୟାରେ ଆୟୋଜିତ ପ୍ରେସମିଟରେ ସୂଚନା ପ୍ରଦାନ କରି କହିଛନ୍ତି ଯେ, ଅଡ଼ବା ଥାନା ପୁଲିସ ଦୁଇଟି ସ୍ଥାନରେ ଚଢ଼ଉ କରି ବିପୁଳ ପରିମାଣର ଗଞ୍ଜେଇ ଓ ଭାଙ୍ଗ ଜବତ କରିଛି। ଗୁଡ଼ୁରିପଙ୍କା ରାସ୍ତାରେ ଚଢ଼ଉ କରି ୩ କ୍ଵିଣ୍ଟାଲ ୩୭ କିଲୋ ଗଞ୍ଜେଇ ଜବତ କରିବା ସହ ଏଥିରେ ସମ୍ପୃକ୍ତ ସେହି ଗାଁର ଜଗନ୍ନାଥ ପରିଛାକୁ ଗିରଫ କରାଯାଇଛି। ସେହିପରି ଅଡ଼ବା ନିକଟରେ ଅଟୋ ସହ ୧୫୫ କିଲୋ ଭାଙ୍ଗ ଜବତ କରାଯାଇଛି। ଭାଙ୍ଗ ଚାଲାଣ ଅଭିଯୋଗରେ ବଡ଼ଗଡ଼ର ୩ ଅଭିଯୁକ୍ତ ଉପେନ୍ଦ୍ର ବଡ଼ରଇତ, ସୁଦାମ ଦଳାଇ ଓ ଶାନ୍ତନୁ ଦଳାଇଙ୍କୁ ଗିରଫ କରାଯାଇଛି. ଏହି ଚଢ଼ାଉ ଅଡବା ଥାନା ଅଧିକାରୀ ସୁଭ୍ରାନ୍ତ ପଣ୍ଡାଙ୍କ ନେତୃତ୍ୱରେ ହୋଇଛି. ଅଡବା ଥାନାରେ ଦୁଇଟି ପୃଥକ ମାମଲା ରୁଜୁ କରାଯାଇ ଅଭିଯୁକ୍ତମାନଙ୍କୁ କୋୖର୍ଟକୁ ଚାଲାଣ କରାଯାଇଥିବା ସୂଚନା ମିଳିଛି.