ରାତିରେ ଛେଳି ଓ କୁକୁଡା ନେବାକୁ ଆସି ଧରାପଡିଲେ

ବାଲେଶ୍ୱର,(ଯୁଗାବ୍ଦ ନ୍ୟୁଜ୍): ବାଲେଶ୍ୱର ଜିଲ୍ଲା ସଦର ବ୍ଲକ ଅନ୍ତର୍ଗତ ଶାସଙ୍ଗ ଗ୍ରାମରେ ଚୋରଙ୍କୁ ଗୋଡାଇ ଗୋଡାଇ ଧରିଛନ୍ତି ଗ୍ରାମବାସୀ । ମଙ୍ଗଳବାର ରାତିରେ ବର୍ଦ୍ଧନପୁର ଗ୍ରାମର ୬ଜଣ ଯୁବକ ୩ଟି ବାଇକରେ ରାତି ୧ଟା ସମୟରେ ଆସି ଶାସଙ୍ଗ ଗ୍ରାମ ଅଧିନସ୍ଥ ପାଟଣା ସାହିର କାର୍ତ୍ତିକ ସେଠୀ ଓ ମଳିକ ସାହିର ମନ୍ମଥ ମଲ୍ଲିକଙ୍କ ଘରୁ ଯଥାକ୍ରମେ ୧୩ଟି କୁକୁଡା ଓ ୩ଟି ଛେଳି ଚୋରି କରି ମୁସଲିମ୍ ବସ୍ତି ଦେଇ ଯାଉଥିବା ବେଳେ ମୁସ୍ଲିମ୍ ବସ୍ତିର ସେକ୍ ମଦିଆ କୌଣସି ସୁତ୍ରରୁ ଖବରପାଇ ଚୋର ଚୋର ବୋଲି ପାଟି କରିଥିଲେ । ଏହି ପାଟି ଶୁଣି ମିର୍ ମାକ୍ସୁ, ସେକ୍ ଏନାମ୍, ମୁନ୍ନା ଗାନ୍, ସେକ୍ କଲ୍ଲୁ, ସେକ୍ ନଇମ୍, ସେକ୍ ହାଇଦର, ସେକ୍ ନସିମ୍ ଆଦି ମୁସ୍ଲିମ୍ ଯୁବକମାନେ ଚୋରମାନଙ୍କୁ ଗୁଡାଇ ଥିଲେ । ଚୋରମାନେ ଖଣ୍ଡା, ଭୁଜାଲି ଆଦି ଦେଖାଇଥିଲେ କିନ୍ତୁ ଏହି ମୁସଲିମ୍ ଯୁବକମାନଙ୍କ ବହୁ ଚେଷ୍ଟା ପରେ ବର୍ଦ୍ଧନପୁର ଗ୍ରାମର କମୁ ଦଳେଇଙ୍କ ପୁଅ ଅକ୍ଷୟ ଦଳେଇକୁ ଏକ ନମ୍ବରବିହୀନ ବାଇକ ସହିତ କାବୁ କରିଥିଲେ । ଅନ୍ୟ ୫ ଜଣ ଚୋର ଚୋରୀ ସାମଗ୍ରୀ ସହ ସେଠାରୁ ଚମ୍ପଟ ମାରିଥିଲେ । ଏହି ମୁସ୍ଲିମ୍ ପିଲାମାନେ ମହାନତା ଦେଖାଇ ଚୋରକୁ ଅଟକ ରଖି କୌଣସି ପ୍ରକାର ନିର୍ଯାତନା ନଦେଇ ଗ୍ରାମବାସୀଙ୍କୁ ଖବର ଦେବା ପରେ ଗ୍ରାମବାସୀମାନେ ସେଠାରେ ପହଞ୍ଚି ସଦର ଥାନାକୁ ଖବର ଦେଇଥିଲେ । ସଦର ଥାନାର ପୋଲିସ୍ ଅଧିକାରୀ ଶ୍ରୀ ପଟ୍ଟନାୟକଙ୍କ ତତ୍ତ୍ୱାବଧାନରେ ଏକ ଟିମ୍ ଆସି ଚୋର ଅକ୍ଷୟ ଦଳେଇ, ତା ବାଇକ୍ ଏବଂ ଗୋଟିଏ ଛେଳିକୁ ଜବତ କରିଥିଲେ । ଶାସଙ୍ଗରେ ବିଭିନ୍ନ ସମୟରେ ଏହି ପ୍ରକାର ଛେଳି, କୁକୁଡା ଚୋରି, ଛିନ୍ତାଇ ଭଳି ଘଟଣା ଘଟୁଥିବାରୁ ଏହାର ତଦନ୍ତ ପାଇଁ ଗ୍ରାମବାସୀମାନେ ଦାବି କରିଛନ୍ତି ।