ବଜ୍ରପାତରେ ମଇଁଷି ଚରାଳି ସହ ୨ମାଙ୍କଡ ମୃତ, ଜଣେ ମହିଳା ଗୁରୁତର

ହିଞ୍ଜିଳିକାଟୁ,(ସୁଧାନିଧି ଚୌଧୁରୀ): ରବିବାର ସକାଳୁ ପ୍ରଚଣ୍ଡ ରୌଦ୍ରତାପ ସହ ଭୀଷଣ ଗୁଳଗୁଳି ଅନୁଭୂତ ହେଉଥିଲା। ଅପରାହ୍ନରେ କାଳବୈଶାଖୀ ପ୍ରଭାବରେ ବିଜୁଳି ଓ ଘଡ଼ଘଡି ସହ ପ୍ରବଳ ବର୍ଷା ସାଙ୍ଗକୁ ବଜ୍ରପାତ ଘଟିଥିଲା। ବଜ୍ରପାତରେ ହିଞ୍ଜିଳି ଥାନାର ୨ଟି ପୃଥକ ସ୍ଥାନରେ ଅଘଟଣ ଘଟିଛି । ଗୋଟିଏ ସ୍ଥାନରେ ବଜ୍ରପାତ ଘଟି ଜଣେ ମଇଁଷି ଚରାଳିଙ୍କ ଶୋଚନୀୟ ମୃତ୍ୟୁ ଘଟିଥିବା ବେଳେ ଅନ୍ୟ ଏକ ସ୍ଥାନରେ ବଜ୍ରପାତରେ ୨ଟି ମାଙ୍କଡ଼ର ମୃତ୍ୟୁ ଘଟିଥିବା ବେଳେ ଜଣେ ମହିଳା ଗୁରୁତର ଆହତ ହୋଇଛନ୍ତି। ମୃତକ ଜଣଙ୍କ ହେଲେ ହିଞ୍ଜିଳି ଥାନା ଚାନ୍ଦୁଲି ଗ୍ରାମର ସଞ୍ଜୟ କୁମାର ଗୈାଡ (୩୦) ଓ ଆହତ ଜଣଙ୍କ ହେଲେ ହିଞ୍ଜିଳିକାଟୁ ପୈାରାଞ୍ଚଳ କବିଚନ୍ଦ୍ର ମାର୍ଗର ଦରମରି ବେହେରା (୫୮) । ରବିବାର ଅପରାହ୍ନରେ ହିଞ୍ଜିଳି ଥାନା ଚାନ୍ଦୁଲି ଗ୍ରାମ ଆମ୍ବତୋଟା ନିକଟରେ ସଂପୃକ୍ତ ଗ୍ରାମର ସଞ୍ଜୟ ମଇଁଷି ଚରାଉଥିବା ବେଳେ ଅକସ୍ମାତ ବଜ୍ରପାତ ଘଟିବାରୁ ଘଟଣା ସ୍ଥଳରେ ସେ ଟଳି ପଡ଼ିଥିଲେ। ସ୍ଥାନୀୟ ଲୋକେ ଆହତଙ୍କୁ ଉଦ୍ଧାର କରି ଚିକିତ୍ସା ପାଇଁ ହିଞ୍ଜିଳିକାଟୁ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଅନ୍ୟପକ୍ଷରେ ହିଞ୍ଜିଳିକାଟୁ ପୈରାଞ୍ଚଳ କବିଚନ୍ଦ୍ର ମାର୍ଗ ଅଞ୍ଚଳର ଜୈନିକା ମହିଳା ଘର ବାରିପଟରେ ବାସନ ସଫା କରୁଥିବା ବେଳେ ବଜ୍ରପାତ ଘଟିବାରୁ ଦରମରି ଗୁରୁତର ଆହତ ହୋଇଥିଲେ। ନିକଟରେ ଥିବା ଗଛରେ ୨ଟି ମାଙ୍କଡଙ୍କ ମଧ୍ଯ ମୃତ୍ୟୁ ଘଟିଥିବା ଜଣା ପଡିଛି।ସ୍ଥାନୀୟ ଲୋକେ ଆହତ ମହିଳାଙ୍କୁ ଉଦ୍ଧାର କରି ଚିକିତ୍ସା ପାଇଁ ହିଞ୍ଜିଳିକାଟୁ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ। ଖବର ପାଇ ହିଞ୍ଜିଳି ପୁଲିସ ଡାକ୍ତରଖାନାରେ ପହଞ୍ଚି ମୃତଦେହକୁ ଜବତ କରିଛି। ଏ ନେଇ ହିଞ୍ଜିଳି ଥାନାରେ କେସ ନଂ – ୧୭/୨୪ ରେ ଏକ ଅପମୃତ୍ୟୁ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି। ସୋମବାର ବ୍ୟବଚ୍ଛେଦ ସକାଶେ ବ୍ରହ୍ମପୁର ବଡ ଡାକ୍ତରଖାନାକୁ ପଠାଯିବ ବୋଲି ହିଞ୍ଜିଳି ଥାନା ଆଇଆଇସି ଶ୍ରୀନିବାସ ସେଠି କହିଛନ୍ତି।