ସହାୟତା ଦାବିରେ ଗାଡି ଚାଳକ ଓ ହେଲ୍ପର
ଦିଗପହଣ୍ଡି,(ଓ୍ୱାଇଏନ୍ଏସ୍ ): କରୋନା ମୁକାବିଲା ପାଇଁ ଲକ୍ ଡାଉନ ଯୋଗୁ ସମସ୍ତେ ପ୍ରଭାବିତ ହୋଇଛନ୍ତି। ଦିଗପହଣ୍ଡି ଅଞ୍ଚଳରେ ଥିବା ଗାଡି ଚାଳକ ଓ ହେଲ୍ପର ମାନେ ବର୍ତ୍ତମାନ ଦୁର୍ଦ୍ଦଶା ମଧ୍ୟରେ ଗତି କରୁଛନ୍ତି।ତେଣୁ ସେମାନଙ୍କୁ ସରକାରୀ ସହାୟତା ନିମନ୍ତେ ଶ୍ରମିକ ସଙ୍ଗଠନ ଅଖିଳ ଭାରତ ଟ୍ରେଡ୍ ୟୁନିୟନ କଂଗ୍ରେସ ( ଏ ଆଇ ଟି ୟୁ ସି) ଗଞ୍ଜାମ ଜିଲା ସମ୍ପାଦକ ଅଳକ ନାଥ ମିଶ୍ର ଦାବୀ କରିଛନ୍ତି।ଦିଗପହଣ୍ଡି ବସଷ୍ଟାଣ୍ଡ ନିକଟ ଶ୍ରମିକ ସଙ୍ଗଠନ ଏ ଆଇ ଟି ୟୁ ସି କାର୍ଯ୍ୟାଳୟ ରୁ ସ୍ଥାନୀୟ ଖେମୁଣ୍ଡି ମିନିବସ୍ ଗାଡି ଚାଳକ ଓ ହେଲ୍ପର ସଙ୍ଘ ର ସମସ୍ତ କର୍ମକର୍ତ୍ତା ,ସଦସ୍ୟ ବୃନ୍ଦ ନୀରବ ଶୋଭାଯାତ୍ରା ରେ ବାହାରି ସ୍ଥାନୀୟ ତହସିଲ କାର୍ଯ୍ୟାଳୟ ଠାରେ ପହଞ୍ଚିଥିଲେ।ସାମାଜିକ ଦୂରତ୍ବ ଅବଲମ୍ବନ ପୂର୍ବକ ସେମାନେ ତହସିଲଦାର ଅଦ୍ଵୈତ କୁମାର ସ୍ବାଇଁ ଙ୍କୁ ସାକ୍ଷାତ କରି ସରକାରୀ ସହାୟତା ନିମନ୍ତେ ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀ ଙ୍କ ଉଦ୍ଦେଶ୍ୟରେ ଦସ୍ତଖତ ସମ୍ବଳିତ ସ୍ମାରକପତ୍ର ପ୍ରଦାନ କରିଥିଲେ। ପରେ ରାଜ୍ୟ ବିଧାନସଭା ବାଚସ୍ପତି,କେନ୍ଦ୍ର ସଡ଼କ ପରିବହନ ମନ୍ତ୍ରୀ,ଦକ୍ଷିଣାଞ୍ଚଳ ରାଜସ୍ବ କମିଶନର, ଗଞ୍ଜାମ ଜିଲାପାଳ,ବ୍ରହ୍ମପୁର ଉପଜିଲାପାଳ, ଦିଗପହଣ୍ଡି ବିଡ଼ିଓ,ଏନ୍ ଏ ସି ନିର୍ବାହୀଅଧିକାରୀ ଙ୍କୁ ସ୍ମାରକପତ୍ର ର ଅବିକଳ ନକଲ ଡାକ ଯୋଗେ ପ୍ରେରଣ କରାଯାଇଥିବା ନେଇ ଗାଡି ଚାଳକ ଓ ହେଲ୍ପର ସଙ୍ଘ ର ସମ୍ପାଦକ ହରିକୃଷ୍ଣ ଗୌଡ, କର୍ମକର୍ତ୍ତା ଗୋବିନ୍ଦ ନନ୍ଦ,ସନ୍ତୋଷ ବେହେରା, ସୁରେନ୍ଦ୍ର ସାହୁ, ମନୋଜ ଗୌଡ ପ୍ରମୁଖ ଜଣାଇଛନ୍ତି।
